Lajme

Çmimet e banesave “prekin tavanin”: Në Kumanovë metri katror shkon deri në 1.700 euro

Kumanovë, 08 Mars 2026 – Tregu i patundshmërive në Maqedoninë e Veriut po përjeton një goditje të fortë çmimesh, ku Kumanova ka shënuar një rritje rekorde prej 24% në gjysmën e dytë të vitit 2025. Ky kërcim i lartë i ka çuar çmimet në zonën qendrore të qytetit deri në 1.700 euro për metër katror, një shifër që deri dje ishte e paimagjinueshme për këtë rajon.

Pse po shtrenjtohen banesat?

Investitorët dhe ekspertët e fushës theksojnë se çmimi nuk vjen vetëm nga dëshira për fitim, por nga një sërë faktorësh zinxhir:

Oferta e ulët dhe kërkesa e lartë: Ka shumë pak ndërtime të reja në zonat qendrore, ndërsa kërkesa mbetet e qëndrueshme.
Burokracia e ndërtimit: Investitorët ankohen se marrja e një leje ndërtimi për kolektiva banimi (kategoria A2) në Kumanovë është aq e vështirë sa “sikur të kërkoje leje për një central bërthamor”.
Kostot e tjera: Pagesa e lartë për blerjen e tokës, tregu i pasigurt i punës dhe procedurat e stërgjatura gjyqësore për planet urbanistike.

Krahasimi me qytetet e tjera

Kumanova po radhitet menjëherë pas Shkupit dhe Ohrit për nga shtrenjtësia, duke lënë pas shumë qytete të tjera:

Kumanovë: 1.700 €/m²
Koçan: 1.200 – 1.300 €/m²
Gjevgjeli: 1.100 – 1.200 €/m²
Kriva Pallankë: rreth 1.100 €/m²

Projektet e bllokuara dhe lejet e pakta

Një problem tjetër serioz është ngecja e projekteve ekzistuese. Në Kumanovë, një lagje e tërë me rreth 20 ndërtesa ka mbetur “peng” i gabimeve teknike në lartësitë e rrugëve dhe lumit, duke bërë që qytetarët të mos futen dot në banesat e tyre prej vitesh.

Gjithashtu, statistikat e komunës janë alarmante: Në vitin 2024 u lëshuan 5 leje ndërtimi, ndërsa gjatë vitit të kaluar u dha vetëm një leje. Pa ndërtime të reja dhe pa thjeshtim të procedurave administrative, çmimet vështirë se do të stabilizohen.

Lajme

Kasami për protestën: BDI “hedh gurin dhe fsheh dorën”

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në “TV Koha” duke komentuar protestën e së nesërmes në Tetovë thotë se BDI në një farë forme luan rolin e saj në stilin “hedh gurin dhe fsheh dorën”!

Sipas tij, bëhet fjalë për situatë absurd.

“BDI nuk deklarohen se qëndrojnë zyrtarisht pas protestës. Këshilltarët e BDI-së para një kohe kërkuan seancë të jashtëzakonshme të Këshillit komunal dhe kur morën informatë se kjo nuk është çështje e Këshillit komunal dhe në situatë kur Këshilli komunal mund të përsërisë gabimin që është bërë në 2007, me automatizëm Këshilli komunal shkon në zgjedhje në bazë të Ligjit dhe Kushtetutës dhe e heshtën atë çështje. Duke e ditur që faji më shumë është i atyre, sepse nuk kemi ne aspak faj si VLEN as në pushtetit qendror e as në atë lokal, ata po mundohen edhe një herë të ‘hedhin gurin dhe të fshehin dorën’. Konkretisht ata duhet të tregojnë se cili është faji i kësaj qeverise aktuale të komunës dhe kësaj qeverie aktuale në pushtetin qendror”, ka thënë Kasami.

Lajme

Kasami: Vendimi i Gjykatës Kushtetuese nuk do të ndryshojë asgjë

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha ka thënë se vendimi i Gjykatës Kushtetuese për emrat e rrugëve në Tetovë, nuk do të ndryshojë asgjë.

I pyetur se çfarë do të ndodhë me fatin e rrugës “Dervish Cara”, Sheshin “Iliria” dhe cili do të jetë epilogu, Kasami shprehet i prerë:

“Vendimi i Gjykatës Kushtetuese nuk do të ndryshojë asgjë. Komuna do të vazhdojë të përdorë emërtimet e vitit 2007 e këndej, institucionet do të vazhdojnë të përdorin emërtimet si gjithmonë, ndërkohë Komuna e Tetovës do të vazhdojë me procesin e emërtimit të rrugëve. Ky proces do të përfundojë konform Ligjit dhe Kushtetutës dhe nga ai moment edhe këta rrugë dhe shumë rrugë tjera do të kenë emërtime shqiptare”, ka thënë mes tjerash Kasami.

Lajme

Kasami: BDI dhe Gjykata Kushtetuese të sinkronizuar dakorduan vendimin

Bashkëkryetari i VLEN-it dhe kryetari i komunës së Tetovës, Bilall Kasami në emisionin “On Time” në TV Koha duke komentuar protestën e nesërme tha se qytetarët nuk do t`i përgjigjen pozitivisht protestës së BDI-së, duke pranuar se integristët megjithatë kishin harxhuar kohën e tij, siç tha ai, “për të trajtuar një problem inekzistent”.

Ai tha se le të tregojnë se cila është përgjegjësia e Tetovës, cila është përgjegjësia e kësaj qeverie që ne siç tha, “të dalim e t`u përgjigjemi”.

“E vetmja përgjegjësi këtu është e Gjykatës Kushtetuese dhe e BDI-së që në mënyrë të sinkronizuar dakordojnë një vendim për abrogim të këtij vendimi në momentin kur jemi në fazën finale të emërtimit të rrugëve konform Kushtetutës dhe Ligjit. Dhe një herë duhet të pyes publikisht BDI-në ‘A është edhe një tentim i BDI-së, për të ndalur procesin e emërtimit të rrugëve në Tetovë?”, ka thënë Kasami.