Lajme

Irani: Pesë kushtet tona për përfundimin e luftës

Përgjigja e Iranit ndaj propozimit të SHBA-së për t’i dhënë fund luftës nuk është “pozitive”, tha një zyrtar i lartë iranian për Reuters të mërkurën, duke shtuar se Teherani po e studion ende propozimin.

Zyrtari tha se përgjigja e Iranit iu dorëzua Pakistanit për t’iu transmetuar Uashingtonit.

Irani ka studiuar propozimin e SHBA-së për t’i dhënë fund luftës dhe i konsideron kushtet e tij të tepërta, raportoi Press TV iranian të mërkurën, duke cituar një zyrtar i cili tha se Teherani do ta përfundojë luftën kur të vendosë dhe nëse kushtet e tij përmbushen.

Televizioni shtetëror iranian njoftoi se Irani ka pesë kushte për t’i dhënë fund luftës, të cilat i dërgoi përmes ndërmjetësve Shteteve të Bashkuara të Amerikës dhe Presidentit Donald Trump.

Pas shqyrtimit të propozimit 15-pikësh të Trump, të cilin e konsideruan “të tepërt”, ata u përgjigjën se do të diktonin kohën e përfundimit të luftës dhe paraqitën pesë kushtet e tyre:

Ndërprerja e “agresionit dhe vrasjes”;

Mekanizma konkretë për të siguruar që Irani të mos sulmohet përsëri;

Pagesa e dëmeve të luftës dhe dëmshpërblimeve;

Fundi i luftës në të gjitha frontet dhe për të gjitha grupet e rezistencës të përfshira në të gjithë rajonin;

Njohja dhe garancitë ndërkombëtare në lidhje me kontrollin e Ngushticës së Hormuzit nga Irani.

Por kushtet nuk përmendin programin bërthamor ose zhvillimin e armëve bërthamore.

Pesë kushtet e Iranit u publikuan menjëherë pasi zyrtarët pakistanezë konfirmuan më parë se Irani kishte marrë propozimin prej 15 pikash të SHBA-së për t’i dhënë fund sulmit SHBA-Izrael.

Trump pretendoi se SHBA-të po negocionin një armëpushim me Iranin, duke thënë se Uashingtoni po fliste me “njerëzit e duhur” në Iran dhe se “ata janë shumë të etur për të arritur një marrëveshje”. /tesheshi.com/

Lajme

Gashi: Kurban Bajrami na kujton vlerat e humanizmit dhe bashkimit shoqëror

Kryetari i Kuvendit të Republikës së Maqedonisë së Veriut, Afrim Gashi, u ka drejtuar një mesazh urimi qytetarëve të besimit islam me rastin e festës së Kurban Bajramit, duke theksuar vlerat e sakrificës, humanizmit dhe afërsisë mes njerëzve.

Kur’ban Bajram banner
Në urimin e tij, Gashi vlerësoi se kjo festë e shenjtë përfaqëson një moment të rëndësishëm për forcimin e solidaritetit, mirëkuptimit dhe respektit të ndërsjellë në shoqëri. Ai theksoi se Kurban Bajrami rikujton rëndësinë e kujdesit për njëri-tjetrin dhe ndarjes së mirësisë me familjen, fqinjët dhe të gjithë ata që kanë nevojë për mbështetje dhe ngrohtësi njerëzore.

Sipas tij, festa shërben gjithashtu si thirrje për më shumë unitet, paqe dhe harmoni, duke forcuar bindjen se vetëm përmes bashkëpunimit mund të ndërtohet një e ardhme më e mirë për të gjithë qytetarët.

Në fund të mesazhit, në emër të Kuvendit dhe në emrin e tij personal, Gashi uroi që festa të sjellë begati, shëndet, qetësi shpirtërore dhe lumturi në familjet e qytetarëve myslimanë, duke përfunduar me urimin: “Urime Kurban Bajramin!”.

Lajme

Tragjedia në unazën e Shkupit, drejtori i Doganave: Kamioni nga Kosova i plotësonte të gjitha kushtet

Kamioni me targa të Kosovës që shkaktoi aksidentin e rëndë rrugor në unazën e Shkupit në të cilin humbën jetën katër persona, hyri në pikën kufitare të Bllacës, ishte bosh dhe nuk kishte parregullsi në procedurën doganore, tha Boban Nikolovski, Drejtor i Doganave të Maqedonisë, në një intervistë në “TV Telma”.

“Gjithçka që lidhej me procedurën doganore për automjetin e mallrave dhe shoferin i plotësonte të gjitha kushtet e kërkuara në procedurën doganore për të kaluar nëpër atë pikë kalimi kufitar. Ajo që ndodhi më vonë është një rast që duhet të shqyrtohet nga institucionet e tjera shtetërore”, tha Nikollovski.

Dirigjenti i parë i Operas dhe Baletit Kombëtar, baritoni Riste Velkov, djali i tij 20-vjeçar Adam dhe dy djemtë njëzetvjeçarë – Marko Gjorgjievski dhe Petar Milanov, miq të Adamit, janë të vdekurit në këtë aksident tragjik trafiku.

Kujtojmë se Prokuroria ka caktuar masën e paraburgimit për shtetasin e Kosovës i cili drejtonte automjetin.

Lajme

VLEN uron besimtarët myslimanë me rastin e Kurban Bajramit

Koalicioni VLEN ka përcjellë urimet e tij me rastin e festës së shenjtë të Kurban Bajramit, duke u dëshiruar të gjithë besimtarëve myslimanë paqe, shëndet, mirësi dhe begati në familjet e tyre.

Në mesazhin e urimit, VLEN thekson se Kurban Bajrami është një festë që bart vlera të larta njerëzore dhe shpirtërore, duke kujtuar sakrificën, bujarinë dhe përkujdesjen ndaj të tjerëve.

“Le të jetë kjo ditë një mundësi për afrim mes njerëzve, për falje dhe solidaritet, ku askush nuk mbetet vetëm dhe ku fjala e mirë, vizita dhe dora e shtrirë marrin kuptim të veçantë”, thuhet në urimin e VLEN-it.
Nga koalicioni shprehen se fryma e Kurban Bajramit duhet të shërbejë si nxitje për forcimin e mirëkuptimit, respektit dhe bashkimit në shoqëri.