Lajme

Mickoski: Do të vijë koha kur të rinjtë do të kthehen në vend

Do të vijë koha kur të rinjtë që e kanë braktisur Maqedoninë për arsye të ndryshme do të kthehen në shtëpi dhe ne duhet ta udhëheqim luftën këtu sepse vetëm shtëpia është shtëpi, tha kryeministri Hristijan Mickoski.

Mickoski në RTVM tha se gjatë periudhës së tranzicionit, shumë njerëz të varfër u bënë jashtëzakonisht të pasur dhe kjo është arsyeja pse një numër i madh qytetarësh u zhgënjyen dhe vendosën të largohen nga atdheu i tyre.

“Kur ndodhi pavarësia, erdhi tranzicioni, kur kapitali shoqëror u transformua brutalisht në kapital privat dhe kur nga shumë të barabartë, disa u bënë jashtëzakonisht të pasur. Kjo mbeti në atë kujtesë kolektive, një numër i madh i prindërve tanë humbën vendet e tyre të punës brenda natës, u kthyen në shtëpi me pritje të tradhtuara, plot zhgënjime, me sytë nga e ardhmja, sepse ajo kohë ishte e pasigurt, dhe nuk e përjashtoj mundësinë që shumica prej tyre i këshilluan fëmijët e tyre, kaq të zhgënjyer, të kërkonin lumturinë e tyre diku jashtë”, tha Mickoski.

Sipas tij, është e nevojshme të rikrijohet ndjenja e përkatësisë ndaj atdheut dhe identitetit. Ai theksoi se Qeveria po punon për një strategji gjithëpërfshirëse për të rinjtë dhe kjo, siç tha ai, është një nga prioritetet kryesore.

“Dhe jo vetëm për këtë, por edhe për formimin e një familjeje, për mbështetjen e prindërve. Planifikohen stimulime për të rritur shkallën e lindshmërisë, për të mbajtur dhe për t’i kthyer të rinjtë në vend. Këto janë masa për të përjashtuar nënat nga taksat – për fëmijën e parë për një periudhë prej një viti, për të dytin për dy vjet dhe për të tretin derisa të arrijnë moshën madhore. Gjithashtu duhet të punojmë për ndryshimin e mentalitetit të të rinjve”, theksoi Mickoski.

Lajme

Sulm ndaj punonjësve të EVN-së në Shkup: Arrestohet 47-vjeçari pasi rrëzoi punëtorin nga shkallët dhe goditi kolegun e tij

Një incident i rëndë është regjistruar të hënën në mëngjes në zonën e Shuto Orizarës në Shkup, ku dy punonjës të “EVN Maqedoni” janë sulmuar fizikisht gjährend në kryerje të detyrës zyrtare, ndërsa autoritetet policore kanë arrestuar menjëherë autorin e dyshuar të ngjarjes.

Sipas informacioneve zyrtare nga Sektori për Punë e Brendshme (SPB) Shkup, efektivët e policisë kanë privuar nga liria shtetasin D.G. (47) nga Shkupi, i cili dyshohet se ka ndërhyrë në mënyrë të dhunshme ndaj ekipeve të terrenit, duke rrëzuar me forcë shkallët në të cilat po punonte njëri nga punonjësit dhe më pas duke sulmuar fizikisht e me një send të fortë një punonjës tjetër të kompanisë që ndodhej në vendngjarje.

Pas dokumentimit të plotë të rregullit dhe rastit, Njësiti për Krime me Dhunë pranë SPB Shkup do të dorëzojë kallëzim penal përkatës kundër të dyshuarit, për shkak të ekzistimit të dyshimit të bazuar për veprën penale “Dhunë”, duke sjellë në vëmendje sfidat dhe rreziqet me të cilat përballen punonjësit e shërbimeve publike gjatë ushtrimit të detyrave të tyre të përditshme profesionale.(INA)

Lajme

Mediat turke: Roberto Carlos e ka pranuar Islamin

Legjenda braziliane e futbollit dhe ish-lojtari i Real Madridit e Fenerbahçes, Roberto Carlos, raportohet se ka përqafuar Islamin rreth katër javë më parë në Brazil.

Lajmi është bërë publik nga deputeti turk Ali Şahin, i cili tha se këtë informacion e ka marrë nga Sheikh Jihad Hammadeh, një figurë e njohur e komunitetit mysliman në Brazil dhe nënkryetar e këshilltar fetar i Shoqatës Kombëtare të Juristëve Islamikë (ANAJI).

Sipas Şahin, Roberto Carlos kishte qenë në kontakt me Sheikh Hammadeh për një periudhë kohore dhe rreth katër javë më parë e kishte vizituar atë. Gjatë takimit, ish-futbollisti thuhet se ka shqiptuar shehadetin, deklaratën e besimit islam, duke përqafuar Islamin.

Carlos, 53 vjeç, konsiderohet ndër mbrojtësit e majtë më të mëdhenj në historinë e futbollit. Ai kaloi pjesën më të madhe të karrierës te Real Madridi, ndërsa në vitin 2007 u transferua te gjiganti turk Fenerbahçe.

Megjithatë, Roberto Carlos nuk e ka konfirmuar publikisht deri tani këtë lajm, ndaj raportimi mbetet i pakonfirmuar nga vetë futbollisti.

Lajme

Ambasadorja amerikane në Dibër, shijon Liqenin dhe bukuritë e qytetit!

Ushtruesja e detyrës së ambasadores së Shteteve të Bashkuara të Amerikës në Shkup, Nicole Varnes, dje pasdite qëndroi në Dibër, ku u takua me kryetarin e komunës, Fisnik Mela.

“Vizita u zhvillua në një atmosferë miqësore, ndërsa Warnes pati mundësinë të njihej nga afër me bukuritë natyrore, potencialin turistik dhe mikpritjen e Dibrës”, njoftuan nga Komuna.

Vizita nisi me kafe pranë Liqenit të Dibrës dhe vazhdoi me një shëtitje me varkë, duke i mundësuar të ftuarës së lartë të shijonte peizazhin dhe bukuritë e veçanta natyrore të liqenit.

Gjatë vizitës u theksua rëndësia e bashkëpunimit dhe forcimit të marrëdhënieve të mira, si dhe promovimi i potencialeve turistike dhe natyrore të Komunës së Dibrës.

Ambasadorja u takua gjithashtu me përfaqësues të komunitetit të biznesit dibran në SHBA, të udhëhequr nga Ibrahim Kolyari, i cili ka kompani edhe në Dibër dhe njihet si filantrop.