Lajme

Nënkryetari i Tetovës, Albi Qamili: Gjykata Kushtetuese po shfuqizon një vendim që BDI asnjëherë nuk e fuqizoi

Nënkryetari i Komunës së Tetovës, Albi Qamili, ka reaguar pas vendimit të fundit të Gjykatës Kushtetuese lidhur me emërtimin e rrugëve në Tetovë, duke e cilësuar atë si pasojë të drejtpërdrejtë të lëshimeve dhe zgjidhjeve të papërfunduara të qeverisjes së kaluar.

Sipas Qamilit, bëhet fjalë për një vendim që në praktikë nuk është zbatuar asnjëherë, pasi procedurat e nevojshme nuk janë përfunduar nga ata që e miratuan. Ai theksoi se sot po shfuqizohet një akt që nuk arriti kurrë të fitojë fuqi të plotë juridike për shkak të mosrespektimit të procedurave ligjore nga pushteti i atëhershëm.

“Është e qartë se kemi të bëjmë me një tjetër pasojë të politikave gjysmake të BDI-së. Vendimi që po shfuqizohet sot nuk u implementua asnjëherë dhe nuk u bë i plotfuqishëm pikërisht për shkak të mangësive procedurale të atyre që e sollën”, deklaroi Qamili.

Ai shtoi se Komuna e Tetovës tashmë ka ndërmarrë hapa konkretë për të zgjidhur këtë çështje në mënyrë të qëndrueshme. Për këtë qëllim, është formuar Komisioni për Riemërtimin e Rrugëve, i cili po punon intensivisht në përgatitjen e një zgjidhjeje gjithëpërfshirëse që do të reflektojë realitetin shoqëror, historik dhe kulturor të qytetit.

Qamili theksoi se administrata aktuale është e vendosur të mbyllë njëherë e mirë këtë proces me një zgjidhje ligjërisht të qëndrueshme, duke shmangur gabimet që, sipas tij, kanë prodhuar situatën aktuale.

“Qytetarët e Tetovës meritojnë vendime të qëndrueshme dhe jo improvizime politike që dështojnë sapo përballen me testin e ligjit”, përfundoi ai.

https://www.facebook.com/share/p/18vG7VFRpb/

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net