Kryetari i Kuvendit të Maqedonisë së Veriut, Afrim Gashi ka pritur sot në takim zyrtar kryetaren e Kuvendit të Kosovës, Albulena Haxhiu, me ç’rast u diskutua për thellimin e bashkëpunimit parlamentar, marrëdhëniet e mira dypalëshe dhe procesin e integrimit evropian të rajonit.

Gashi e vlerësoi vizitën si dëshmi të përkushtimit të përbashkët për avancimin e marrëdhënieve të fqinjësisë së mirë dhe forcimin e dialogut ndërmjet dy parlamenteve. Ai theksoi se bashkëpunimi ndërmjet Maqedonisë së Veriut dhe Kosovës karakterizohet nga dinamika intensive dhe shprehu bindjen se ai do të vazhdojë të thellohet edhe në të ardhmen.

Sipas Gashit, të dy vendet ndajnë vizionin për një rajon paqësor, të sigurt dhe ekonomikisht të zhvilluar, të integruar në strukturat euroatlantike. Në këtë drejtim, ai nënvizoi rëndësinë e dialogut dhe koordinimit për çështjet me interes të përbashkët rajonal.

Nga ana tjetër, kryetarja e Kuvendit të Kosovës, Albulena Haxhiu u zotua për vazhdimin dhe avancimin e bashkëpunimit konstruktiv mes dy institucioneve. Ajo bëri të ditur se kjo është vizita e saj e parë zyrtare në një shtet të huaj në cilësinë e kryetares së Kuvendit të Kosovës, duke e cilësuar atë si dëshmi të rëndësisë së marrëdhënieve të shkëlqyera mes dy vendeve.

Haxhiu shprehu gjithashtu mirënjohje për mbështetjen e vazhdueshme të Maqedonisë së Veriut ndaj anëtarësimit të Kosovës në organizata dhe iniciativa shumëpalëshe e rajonale.
Integrimi evropian dhe bashkëpunimi rajonal kanë qenë gjithashtu ndër temat kryesore të takimit. Të dy bashkëbiseduesit vlerësuan se bashkëpunimi duhet të kontribuojë në përshpejtimin e integrimit evropian të vendeve të rajonit, duke u bazuar në meritë, përmbushjen e kritereve dhe zbatimin e qëndrueshëm të reformave.

Gashi dhe Haxhiu theksuan edhe rëndësinë e nxitjes së kontakteve mes qytetarëve, të rinjve, komuniteteve akademike dhe bizneseve, duke vlerësuar se këto lidhje përbëjnë një bazë të rëndësishme për miqësi dhe partneritet afatgjatë.
Në takim u shkëmbyen mendime edhe për zhvillimet aktuale në rajon dhe në botë, me theks të veçantë te nevoja për ruajtjen e paqes, sigurisë dhe stabilitetit.

Në përfundim, të dy kryetarët shprehën bindjen se vizita zyrtare do të ndikojë në forcimin e mëtejshëm të besimit të ndërsjellë dhe në identifikimin e mundësive konkrete për thellimin e bashkëpunimit ndërmjet dy parlamenteve.

Grabitje e armatosur në Shkup, dy persona kërcënojnë me armë një çift bashkëshortësh.

Një grabitje e armatosur ka ndodhur mbrëmjen e së dielës në fshatin Kuçevishtë të Shkupit, ku dy persona kanë hyrë me forcë në një shtëpi dhe, nën kërcënimin e armës së zjarrit, kanë grabitur një shumë parash.

Sipas njoftimit të policisë, më 25 tetor 2026, në orën 23:20, një 35-vjeçar nga fshati Kuçevishtë ka denoncuar rastin në SPB Shkup.

Ai ka deklaruar se rreth orës 23:00, dy persona të gjinisë mashkullore kanë hyrë me forcë në shtëpinë e tij dhe kanë kërcënuar me armë zjarri atë dhe bashkëshorten e tij.

Më pas, autorët kanë marrë paratë e qarkullimit ditor të një kompanie të postës së shpejtë, ku ishte e punësuar bashkëshortja e denoncuesit.

Nga policia njoftojnë se po ndërmerren masa për zbardhjen e plotë të rastit dhe identifikimin e autorëve.

Në Haraçinë kanë nisur sot punimet për ndërtimin e Sheshit të Dëshmorëve, një projekt që synon t’i japë qendrës së komunës një pamje të re, moderne dhe dinjitoze.

Sheshi do të krijojë një hapësirë të re për qytetarët, duke shërbyer njëkohësisht si vend përkujtimi dhe nderimi për dëshmorët që dhanë jetën për lirinë.

Projekti ishte paralajmëruar dhe diskutuar me qytetarët, ndërsa sot nis zbatimi i tij konkret.

Sheshi i Dëshmorëve po bëhet realitet!

Premtimet marrin kuptim kur shndërrohen në projekte konkrete që i shërbejnë komunitetit dhe ruajnë kujtesën historike.