Lajme

“I kemi paguar” – qytetarët përballen sërish me gjoba të vjetra

Në redaksinë e Alsat kanë arritur ankesa nga qytetarë të cilët thonë se po pranojnë dokumente për pagesën e gjobave të trafikut, ndonëse pretendojnë se i kanë paguar në të kaluarën. Nga Ministria e Punëve të Brendshme pranojnë se raste të tilla mund të ndodhin. Sipas MPB-së, ri-evidentimi i gjobave të paguara mund të jetë rezultat i mosrespektimit të udhëzimeve të përcaktuara në procesverbal ose i plotësimit të gabuar të fletëpagesës.

“Deri te ri-evidentimi i gjobave tashmë të paguara mund të vijë nëse nuk respektohen rregullat e përcaktuara në udhëzimin juridik të procesverbalit, përkatësisht nëse fletëpagesa është plotësuar gabimisht”
*Deri te rievidentimi i gjobave të paguara mund të vij nëse fletëpagesa është plotësuar gabimisht – MPB.

Institucioni njofton se deri në këtë moment nuk ka pranuar ankesa zyrtare lidhur me raste të tilla. Megjithatë, qytetarët që konsiderojnë se bëhet fjalë për gabim teknik ose administrativ mund të paraqesin ankesa në çdo stacion policor.

“Ekziston afat ligjor për paraqitjen e ankesave, i cili duhet të dorëzohet brenda tetë ditëve nga dita e hapjes së procesverbalit” – MPB.

Nga MPB shtojnë se qytetarët që aktualisht gjobiten nuk kanë nevojë të paraqesin dëshmi për pagesën në rast se fletëpagesa është plotësuar sipas udhëzimeve të përfshira në procesverbal. /Alsat.mk

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.