Lajme

Skandaloze: “Mbrëmjet Strugane të Poezisë” me njoftime dhe ftesa vetëm në gjuhën maqedonase

Një nga manifestimet më të njohura kulturore ndërkombëtare në vend, “Mbrëmjet Strugane të Poezisë”, ka nxitur reagime dhe diskutime në opinion pas publikimit të programit zyrtar vetëm në gjuhën maqedonase njofton agjencia e lajmeve INA.

Programi i edicionit të 65-të të këtij manifestimi, i cili financohet me mjete publike dhe mbledh poetë e pjesëmarrës nga vende të ndryshme të botës, është shpërndarë pa version në gjuhën shqipe, duke hapur debat mbi përfaqësimin gjuhësor në ngjarjet dhe institucionet publike.

Reagimet janë përqendruar veçanërisht në faktin se Struga njihet si një qytet multietnik dhe shumëgjuhësh, ku komunitetet jetojnë dhe veprojnë së bashku prej dekadash. Për këtë arsye, mënyra e komunikimit zyrtar të një manifestimi me karakter ndërkombëtar po shihet si një çështje që tejkalon dimensionin kulturor dhe prek edhe aspektin e barazisë institucionale.

Kritikët vlerësojnë se ngjarje të tilla, të financuara nga fondet publike dhe të organizuara në një mjedis shumëetnik, duhet të sigurojnë komunikim gjithëpërfshirës dhe qasje të barabartë për të gjitha komunitetet.

Debati vjen në një periudhë kur përdorimi i gjuhëve në komunikimet zyrtare vazhdon të mbetet një nga temat më të ndjeshme në shoqëri, ndërsa çështja e përfaqësimit dhe respektimit të diversitetit kulturor e gjuhësor vazhdon të ngjallë diskutime të shumta.

“Mbrëmjet Strugane të Poezisë” konsiderohen një nga ngjarjet më të rëndësishme letrare në rajon dhe më gjerë, duke mbledhur çdo vit poetë, shkrimtarë dhe artistë nga vende të ndryshme të botës. Pikërisht për shkak të këtij karakteri ndërkombëtar, çështja e komunikimit shumëgjuhësh po shihet si një element i rëndësishëm i përfshirjes dhe përfaqësimit të të gjithë qytetarëve.(INA)

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net