Lajme

Maqedoni, pacientët me kancer presin deri në 12 orë për terapi

Pacientët me kancer që trajtohen në Klinikën Universitare të Radiologjisë dhe Onkologjisë në Shkup vazhdojnë të përballen me pritje të gjata për marrjen e terapisë, ndërsa mbingarkesa e sistemit po rëndon edhe më tej gjendjen e tyre.

Shumë pacientë udhëtojnë nga qytete të ndryshme të vendit drejt Shkupit, pasi radioterapia ofrohet vetëm në kryeqytet. Disa prej tyre thonë se janë të detyruar të presin deri në 12 orë për të marrë terapinë, ndërsa radhët fillojnë që në orët e para të mëngjesit.

“Problemi nuk janë mjekët, por sistemi dhe mungesa e organizimit. Do të ishte shumë më mirë nëse do të hapeshin qendra edhe në pjesën lindore dhe perëndimore të vendit”, tha një paciente.

Edhe Shoqata për mbështetjen e pacientëve me kancer “EZRA” vlerëson se sistemi shëndetësor ndodhet në një situatë alarmante. Drejtoresha ekzekutive e shoqatës, Liridona Beqiri, theksoi se pritjet e gjata nuk janë vetëm problem organizativ, por tregues i dështimit të sistemit në ofrimin e shërbimeve shëndetësore.

Ndërkohë, Enti Shtetëror i Revizionit ka rekomanduar decentralizimin e trajtimit onkologjik, me qëllim uljen e pritjeve dhe lehtësimin e pacientëve që udhëtojnë nga qytetet e tjera.

Sipas drejtorit të Klinikës së Onkologjisë, Igor Stojkovski, vetëm gjatë vitit 2025 janë regjistruar rreth 5.500 pacientë të rinj me kancer, ndërsa klinika realizon rreth 38.000 deri në 39.000 aplikime të terapive onkologjike në vit.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.

Lajme

DAP me paralajmërim për qytetarët: Dërgohen mesazhe të rreme, mos hapni linqe

Drejtoria e të Ardhurave Publike paralajmëron për mesazhe të rreme SMS, përmes të cilave qytetarët njoftohen se rimbursimi i tatimit është gati.

Në mesazhe përfshihet një link, i cili mund të përdoret për keqpërdorimin e të dhënave personale dhe bankare.

Nga DAP-i apelojnë qytetarët të mos e hapin linkun dhe të mos vendosin të dhëna të ndjeshme.

Të gjitha informacionet duhet të kontrollohen ekskluzivisht përmes kanaleve zyrtare të DAP-it dhe ueb-faqes ujp.gov.mk.

Qytetarëve u bëhet thirrje të jenë të kujdesshëm dhe t’i paralajmërojnë edhe të afërmit e tyre për mashtrimin e mundshëm.

Lajme

Dera e ashensorit u hap dhe u mbyll papritur, lëndohet rëndë një vajzë 3-vjeçare nga Shkupi

Më 24.08.2026, në orën 20:00, në SPB Shkup, E.Z. (30) nga Shkupi ka denoncuar se më 22.08.2026 rreth orës 18:15, derisa ajo dhe fëmijët e saj ndodheshin në ashensorin e një ndërtese banimi në territorin e Radishanit, dera e ashensorit papritmas është hapur dhe mbyllur,.

Nga hapja e mbyllja e shpesh vajza trevjeçare është tërhequr dhe ka pësuar lëndime të rënda trupore, të konstatuara në Institucionin e Shëndetit Publik “Shën Naum Ohridski” në Shkup.

Po ndërmerren masa për zbardhjen e rastit./ZYRTARE.net