Lajme

Zhdukja biznesmenes kineze në Greqi, hetohen investimet në Bogovë dhe transaksionet e dyshimta

Zhdukja e 50-vjeçares kineze Yu Ting vijon të mbetet pa përgjigje, ndërsa autoritetet greke po zgjerojnë hetimet në disa drejtime. Në qendër të verifikimeve kanë hyrë edhe aktivitetet dhe planet e saj në Shqipëri, ku ishte pajisur me leje qëndrimi dhe po shqyrtonte mundësi investimi.

Sipas mediave greke, Yu Ting u largua nga banesa e saj në Artemidë më 20 maj, rreth orës 10:05, me destinacion qendrën e Athinës. Familjarët kanë deklaruar se ajo do të mblidhte pagesat e qirave nga disa apartamente të dhëna me qira për shtetas kinezë. Pas zbritjes nga autobusi, gjurmët e saj humbën dhe çdo komunikim u ndërpre.

Bashkëshorti i 50-vjeçares, Vasilis Karavasilis, ka përjashtuar mundësinë e një largimi vullnetar. Ai dyshon se gruaja mund të jetë rrëmbyer ose vrarë, por deri tani hetuesit nuk kanë publikuar prova që të mbështesin një skenar të caktuar.

Gjatë verifikimeve ka rezultuar se Yu Ting kishte marrë më 17 janar 2026 një leje qëndrimi njëvjeçare nga strukturat e Kufirit dhe Migracionit në Vlorë.

Dokumenti lidhej me interesin e saj për të zhvilluar investime në Shqipëri.

Një nga projektet që ajo po shqyrtonte ishte ndërtimi i një impianti për prodhimin dhe ambalazhimin e ujit në zonën e Bogovës. Sipas dëshmive, biznesmenia kishte vizituar dy herë një burim uji dhe ishte prezantuar si përfaqësuese e një grupi investitorësh kinezë.

Një agjente shqiptare e pasurive të paluajtshme, e cila kishte bashkëpunuar me të, ka deklaruar se interesi për projektin ishte real, por investimi nuk u finalizua.

Lidhjet me Shqipërinë dolën sërish në pah përmes një takimi të zhvilluar vetëm katër ditë përpara zhdukjes. Sipas raportimeve, në takim ishin të pranishëm Yu Ting, agjentja shqiptare, një shtetas kinez, një prift dhe një ish-oficer policie.

Prifti ka deklaruar se biseda ishte përqendruar te investimet dhe pasuritë e paluajtshme. Sipas tij, Yu Ting ishte prezantuar si përfaqësuese e investitorëve kinezë me interes për blerjen e tokave, hoteleve dhe pronave të tjera në Greqi.

Agjentja shqiptare ka konfirmuar se bashkëpunonte me 50-vjeçaren që prej vitit 2022. Gjatë kësaj periudhe, sipas saj, investitorëve kinezë u ishin paraqitur më shumë se 20 prona, por asnjë negociatë nuk ishte mbyllur me marrëveshje konkrete.

Edhe motra e Yu Ting ka dëshmuar se ajo planifikonte të udhëtonte drejt Shqipërisë për të parë parcela toke dhe se e kishte informuar për lejen njëvjeçare të qëndrimit.

Paralelisht, policia greke po heton edhe një konflikt të mundshëm financiar në Athinë. Yu Ting dyshohet se ishte përfshirë në bisedime për blerjen e një pike karburanti. Një tjetër shtetase kineze pretendon se kishte investuar 100 mijë euro, por marrëveshja nuk u realizua.

Autoritetet greke nuk kanë përjashtuar asnjë pistë. Ende nuk dihet nëse zhdukja lidhet me aktivitetet e saj të biznesit, me konfliktet financiare apo me rrethana të tjera.

Rasti mbetet i hapur, ndërsa lidhjet e Yu Ting me Shqipërinë janë kthyer në një nga elementet kryesore të hetimit.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.