Lajme

Javën e ardhshme pritet finalizimi i të gjitha procedurave për ndryshimin e kryesisë në M-NAV

Këshilli mbikëqyrës i M-NAV e pranoi propozimin e Qeverisë për emërimin e Hekuran Asanit dhe Milan Koraqit për drejtorë në kompaninë në vendin e drejtorëve të deritanishëm Fahrudin Hamidi dhe Luve Stamenkovski. Informacionin për MIA-n e konfirmuan nga M-NAV.

Të hënën pritet Këshilli mbikëqyrës të mbajë edhe një mbledhje në të cilën duhet të nënshkruhen procesverbalet nga seanca, pas së cilës vendimi së bashku me dokumentacionin do të dërgohen në Regjistrin qëndror, ku duhet të regjistrohen Asani dhe Koraqi si drejtorë të rinj. Përfundimi i të gjitha procedurave pritet të finalizohet javën e ardhshme.

Shkarkimi i drejtorëve aktual pasoi pas ndërhyrjes në M-NAV më 4 janar. Prokuroria dje kumtoi se janë arrestuar edhe tre personat e tjerë nga gjithsej tetë të dyshuar për ndërhyrjen në M-NAV.

Për ndërhyrjen në M-NAV, Prokuroria Themelore Publike Shkup ka hapur procedurë hetuese kundër tetë personave për të cilët ekziston dyshimi i bazuar se në cilësinë e bashkëkryerësve kanë kryer vepër penale – Rrezikim i sigurisë së trafikut ajror sipas Nenit 303 paragrafi 2 në lidhje me nenin 22 të Kodit Penal.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.