Lajme

Fidan: Turqia dhe Shqipëria janë dy kombe, dy shtete me afërsi historike

Ministri i Punëve të Jashtme të Türkiyes, Hakan Fidan, duke folur rreth marrëdhënieve Türkiye-Shqipëri tha se “Türkiye dhe Shqipëria janë dy kombe, dy shtete me afërsi historike dhe lidhje të palëkundura si shtet ashtu dhe si komb”, raporton Anadolu.

Këtë vlerësim Fidan e bëri pas takimit të tij me homologun shqiptar Igli Hasani në Tiranë.

Ai falënderoi Hasanin për mikpritjen duke shtuar se edhe më parë është gjendur në Shqipëri për detyra të ndryshme.

Fidan tërhoqi vëmendjen se me homologun e tij ka zhvilluar “një takim shumë të frytshëm”, duke shtuar se gjatë vizitës së tij do të takohet edhe me presidentin dhe kryeministrin e Shqipërisë.

Kryediplomati turk theksoi se mes liderëve të të dyja vendeve ka “një miqësi dhe solidaritet të sinqertë. “Türkiye dhe Shqipëria janë dy kombe, dy shtete me afërsi historike dhe lidhje të palëkundura si shtet ashtu dhe si komb”, tha Fidan.

Fidan nënvizoi se Türkiye dhe Shqipëria janë të vendosura për të avancuar marrëdhëniet dypalëshe në çdo fushë. Ai tha se të dyja vendet vazhdojnë të punojnë në shumë fusha të ndryshme si ekonomia, tregtia, diplomacia, çështjet rajonale dhe kultura.

Duke theksuar se bashkëpunimi mes dy vendeve mund të ndikojë në zhvillimin rajonal, Fidan tregoi se ka mekanizma të krijuar për ta çuar këtë edhe më tej. Fidan tha se në vitin 2024 synojnë të zhvillojnë takimin “E parë të Këshillit të Bashkëpunimit Strategjik të Nivelit të Lartë”. “Ne kemi një vendosmëri që në fazën e parë të rrisim vëllimin e tregtisë mes dy vendeve në 2 miliardë dollarë”, u shpreh Fidan.

Kryediplomati turk informoi se në Shqipëri ka patur rastin të takohet edhe me biznesmenë turq dhe theksoi nevojën për avancimin e marrëdhënieve ekonomike mes dy vendeve.

– Lufta kundër terrorizmit

Fidan më tej njoftoi se me homologun e tij kanë shkëmbyer mendime në fusha të ndryshme, përfshirë luftën kundër terrorizmit dhe sigurisë rajonale.

“Ritheksuam ndjeshmërinë e Türkiyes lidhur me pastrimin edhe të mbetjeve të fundit të FETO-s në Shqipëri. Ne patëm mundësinë të diskutonim se çfarë lloj masash mund të ndërmerren për këtë çështje dhe si të veprohet”, tha Fidan.

Ai gjithashtu rikujtoi se Shqipëria në vitin 2023 ka marrë përsipër anëtarësimin e përkohshëm në Këshillin e Sigurimit të Kombeve të Bashkuara (KS-OKB), duke e vlerësuar këtë periudhë si të suksesshme dhe një arritje të rëndësishme për diplomacinë shqiptare.

“Bashkëpunimi rajonal dhe solidariteti i Türkiyes do të vazhdojë me Shqipërinë si në platformat globale ashtu edhe në ato rajonale”, tha Fidan duke përgëzuar Shqipërinë për marrjen e presidencës së radhës së Organizatës së Bashkëpunimit Ekonomik të Detit të Zi nga Türkiye.

Ai e cilësoi këtë platformë të rëndësishme duke e theksuar nevojën e rigjallërimit më tej dhe se duhet të zbatohen projekte të kualifikuara.

Fidan tha se në takim gjithashtu kanë biseduar rreth çështjeve rajonale dhe globale. “Në veçanti, diskutuam për ndikimin e luftës Rusi-Ukrainë në Evropë, ndikimin e saj në sigurinë e Evropës, ndikimin e saj në ekonominë evropiane, ndikimin e saj në ekonominë dhe sigurinë globale”, tha Fidan.

Lajme

Mickoski: Jemi me çmime më të lira të naftës, vendet fqinje vërshuan tek ne, kemi rezerva

Ky është përkthimi i deklaratës së Kryeministrit të Maqedonisë së Veriut, Hristijan Mickoski, lidhur me situatën e furnizimit me karburante:

Mickoski: Furnizimi me naftë është stabil, inspektorët janë në terren për shkak të kufizimeve në disa pompa

Kryeministri Hristijan Mickoski deklaroi se Inspektorati Shtetëror i Tregut (ISHhT) është në terren pas ankesave të qytetarëve se në disa pika karburanti ka kufizime gjatë furnizimit me dizel, por theksoi se furnizimi me naftë dhe derivate të naftës në vend është stabil.

Ai bëri të ditur se këto dukuri janë vërejtur kryesisht në komunat kufitare, ku ka presion të shtuar për shkak të çmimeve dukshëm më të larta të karburanteve në shtetet fqinje.

“Inspektorati Shtetëror i Tregut është në terren. Janë vërejtur sjellje të tilla në disa pompa në komunat kufitare sepse ka një presion të madh nga shtetet fqinje, ku çmimi i energjentëve është për mbi 40 deri në 50 për qind më i lartë se tek ne. Në Serbinë fqinje, çmimi është midis 120 dhe 130 denarë për litër, ndërsa tek ne dizeli është 71 denarë. Si rezultat i këtij presioni, kemi një rritje kolosale të konsumit të naftës dhe derivateve, dhe mbase për këtë arsye në pika të caktuara karburanti ka mungesë të sasive,” tha Mickoski.

Ai shtoi se sipas informacioneve që ka marrë nga Inspektorati, në mbarë territorin e shtetit qytetarët dhe bizneset po furnizohen pa ndërprerje.

Rezervat shtetërore janë të mjaftueshme
Mickoski nënvizoi se rezervat shtetërore janë të mjaftueshme për një periudhë të gjatë dhe se gjendja energjetike në vend është stabile.

“Rezervat shtetërore mund të mbulojnë konsumin e plotë për më shumë se 62 ditë, furnizimi do të thosha se është më se i shkëlqyer. Kur filluam të ristartojmë naftësjellësin me fqinjin tonë jugor (Greqinë), shumëkujt i dukej e çuditshme dhe e pamundur, por u kaluan të gjitha testet dhe mund ta shfrytëzojmë edhe atë kapital. Mund ta vëmë në dispozicion edhe të fqinjëve. Maqedonia në këtë moment ka gjendje stabile energjetike, është faktor stabiliteti në rajon dhe qytetarët paguajnë çmimin më të lirë për naftën dhe derivatet,” shtoi Mickoski.(INA)

Lajme

Nata e Zjarreve” në Prekaz mbylli aktivitetet në kuadër të Epopesë së UÇK-së

Epopeja e Ushtrisë Çlirimtare të Kosovës kulmoi sonte në Prekaz me ceremoninë tradicionale të Natës së Zjarreve, një nga momentet më simbolike të përkujtimit të rënies heroike të familjes Jashari.

Në 28-vjetorin e kësaj ngjarjeje historike, qytetarë të shumtë nga të gjitha trojet shqiptare u mblodhën në Kompleksin Memorial në Prekaz për të nderuar sakrificën e komandantit legjendar Adem Jashari dhe familjes Jashari që ranë për lirinë e Kosovës.

Ceremonia u zhvillua në zemrën e Prekazit. Pjesëtarë të Ushtrisë së Kosovës ndezën flakadanin pranë Kullës së Lirisë, duke nisur kështu ritin tradicional të Natës së Zjarreve. Pas nderimit që i bënë kullës, ata marshuan drejt vendit ku prehen dëshmorët e kombit, pranë varreve të komandantit legjendar Adem Jashari, bacës Shaban, Hamzës, dajës Osman dhe të gjithë anëtarëve të tjerë të familjes Jashari.

Flakadanë u ndezën edhe pranë shtëpisë së heroinës Nënë Shkurte dhe tek bunkeri i komandantit Adem Jashari. Nga këto tri drejtime, nga kullat e Jasharajve, nga shtëpia e Nënës Shkurte dhe nga bunkeri, pjesëtarët e Ushtrisë së Kosovës u nisën drejt një pike të përbashkët, duke simbolizuar bashkimin e forcave që luftuan për lirinë e vendit.

Në këtë marshim simbolik u bashkuan edhe ushtarët e Forcës së Sigurisë së Kosovës, të cilët konsiderohen vazhdimësi e Ushtrisë së Kosovës si dhe qytetarë, nxënës dhe të rinj nga kjo trevë. Të gjithë së bashku marshuan drejt vendit ku ranë dëshmorët e kombit.

Nxënësit e shkollës “Hamzë Jashari” u rreshtuan me respekt para varrezave për të bërë nderime. Ata vendosën lule një nga një mbi varret e heronjve të familjes Jashari, në shenjë mirënjohjeje dhe respekti për sakrificën e tyre.

Flakadanët e ndezur gjatë ceremonisë simbolizojnë përhapjen e zjarrit të lirisë dhe të luftës çlirimtare gjithandej Kosovës.

Ndërsa, zjarri më i madh që ndizet gjatë kësaj nate përfaqëson zjarrin e pushkës së komandantit legjendar Adem Jashari, simbol i qëndresës dhe sakrificës për liri.

Lajme

Bileta e fluturimit Dubai-Shkup arrin çmimin 20 mijë euro!

Situata në Lindjen e Mesme ka lënë të bllokuar rreth 700 deri në 800 shtetas maqedonas, të cilët e kanë pothuajse të pamundur kthimin në shtëpi për shkak të përshkallëzimit të konfliktit, shkruan faktor.mk.

Sipas Arkan Kerim nga Oda Turistike-Hotelierike, fluturimet janë ndërprerë pasi aeroporti i Dubait ka ndaluar punën, duke paralizuar transportin ajror midis Azisë dhe Evropës.

Çmimet e biletave kanë arritur nivele rekord, ku një vend i vetëm nga Dubai për në Shkup ka kushtuar deri në 20.000 euro. Kthimi mbetet sfidë edhe përmes rrugëve alternative si Arabia Saudite, për shkak të procedurave të vështira për pajisjen me viza për qytetarët maqedonas.