Lajme

Vuçiç e vajton ndalimin e dinarit nga Kosova

Presidenti i Serbisë Aleksandar Vuçiç, tha të premten se vendimi i autoriteteve në Kosovë për të ndaluar përdorimin e dinarit serb ka për qëllim spastrimin etnik të serbëve ndërsa tha se do të kërkojë një mbledhje urgjente të Këshillit të Sigurimit të Kombeve të Bashkuara.

Ai i bëri këto komente gjatë një konference shtypi në Beograd pas vendimit të Bankës Qendrore të Kosovës që hyri në fuqi me 1 shkurt sipas të cilit euro është valuta e vetme që mund të përdoret për pagesa të gatshme në Kosovë.

“Qëllimi dhe pjesa e parë e gjithçkaje për të cilën do të flas sot, është spastrimi etnik i popullatës serbe nga territori i Kosovës, apo si thuhet në Konventën e Gjenocidit, nënshtrimi i qëllimshëm i serbëve ndaj kushteve të padurueshme jetese”, tha presidenti serb duke nënvizuar se me marrëveshjet e Brukselit, Serbia ka të drejtë të financojë institucionet serbe në Kosovë.

“Ne besojmë se regjimi i Kurtit do të vazhdojë me përçarje dhe marifete të reja, besoj se do të ndërmarrin veprime kundër jetës normale të serbëve, sepse e vetmja mënyrë për të fituar, siç mendojnë ata, është që të mos ketë më serb në Kosovë. Do të bëjmë gjithçka që është në fuqinë tonë që serbët të mbeten në Kosovë”, tha ai.

Presidenti serb tha se do të gjejë një zgjidhje qoftë edhe përmes bankave private për të kryer pagesat ndaj qytetarëve serbë.

Autoritetet në Kosovë kanë lanë të hapur mundësinë për një periudhë kalimtare për zgjidhjen e shqetësimeve të komunitetit serb që vazhdon të përdorë dinarin serb, mes shqetësimeve të diplomatëve perëndimorë se çështja mund të nxisë tensione të reja.

Komisioni Evropian shprehu sot siç tha keqardhjen për vendimin e autoriteteve në Kosovë që është miratuar pa këshillime paraprake.

“Nuk e kemi kritikuar Kosovën për vendosjen e euros apo vendimin se cila valutë duhet të përdoret. Kemi komentuar vetëm faktin se ky vendim u miratua pa këshillime paraprake. Sepse në këtë moment keni njerëz, institucione, përfshirë edhe spitale të cilat veprojnë në një kuadër, duke marrë ndihmë financiare nga Serbia, dhe ato duhet të kenë kohë të mjaftueshme që të përgatiten”, tha zëdhënësi i Komisionit Evropian Eric Mamer.

Departamenti amerikan i Shtetit i tha Zërit të Amerikës se është thellësisht i zhgënjyer me planet aktuale të Kosovës për dinarin dhe bëri thirrje sërish që zbatimi i këtij vendimi të shtyhet menjëherë, i cili nuk është këshilluar paraprakisht.

Kryetari i parlamentit të Kosovës, Glauk Konjufca tha sot se dinari serb ka qenë gjithmonë i paligjshëm në vend dhe është keqpërdorur nga Serbia për financimin e strukturave paralele.

“Të cilat nuk është se kanë qenë vetëm mjekët edhe mësuesit por kanë qenë edhe persona që kanë kryer veprime ilegale shumë të rrezikshme të cilët e kanë cenuar sigurinë e shtetit tone”, tha zoti Konjufca.

Autoritetet në Prishtinë thanë se duhet të hapen kanalet e komunikimit ndërmjet Bankës Qendrore të Kosovës dhe asaj të Serbisë për këtë çështje, por presidenti serb hodhi poshtë një mundësi të tillë, duke theksuar se kjo do të nënkuptonte njohje të pavarësisë së Kosovës që Serbia vazhdon ta kundërshtojë./VOA

Lajme

MPB me detaje për dy të rinjtë e rrahur, posedonin drogë dhe kanë tentuar të ikin

Ministria e Punëve të Brendshme ka ngritur padi penale ndaj tre personave në lidhje me një incident të ndodhur më 7 tetor 2026, rreth orës 20:25, në rrugën “Crnogorska” në Shkup, ku gjatë një aksioni policor u sekuestrua marihuanë dhe një zyrtari policor iu mor arma e shërbimit.

Sipas MPB-së, policia kishte marrë më herët informacione operative se do të kryhej një vepër penale që lidhej me shitblerjen e marihuanës. Për këtë arsye, zyrtarët policorë i dhanë shenjë ndalimi një automjeti të tipit “BMW” me targa të Shkupit.

Kur policët iu afruan automjetit për identifikim dhe kontroll, shoferi e ndezi makinën, goditi një shtyllë dhe në të njëjtën kohë hodhi nga dritarja një qese me marihuanë.

Në atë moment, njëri nga policët nxori armën zyrtare dhe urdhëroi personat të ndalonin, duke u prezantuar si polici. Sipas njoftimit, personi që ndodhej në ulësen e pasagjerit ia mori armën zyrtarit policor, ndërsa shoferi u largua me shpejtësi nga vendi i ngjarjes.

Policët që ndodheshin në afërsi u vunë në ndjekje të automjetit, i cili lëvizte me shpejtësi të madhe në rrugën “Gjorçe Petrov”, në drejtim të autostradës Shkup–Tetovë. Automjeti nuk iu bind sinjaleve zanore dhe dritore të policisë, ndërsa një zyrtar policor qëlloi edhe tre të shtëna paralajmëruese në ajër.

Gjatë ndjekjes, BMW-ja u përplas me barrierën mbrojtëse të autostradës dhe u rrotullua. Nga automjeti dolën shoferi P.A. (24) dhe pasagjeri E.P. (21), të cilët u privuan nga liria.

Arma e shërbimit u sekuestrua, ndërsa pas kontrollit të terrenit u gjet edhe qesja me marihuanë.

Padi penale ndaj tre personave

Në koordinim me Prokurorinë Themelore Publike në Shkup, Njësia për Krim të Dhunshëm pranë SPB-së Shkup, më 14 tetor 2026, ka paraqitur padi penale ndaj E.P. dhe P.A. për veprat penale:

Pengim i personit zyrtar në kryerjen e veprimit zyrtar, sipas nenit 382 të Kodit Penal.

Prodhim dhe trafikim i paautorizuar i drogave narkotike, substancave psikotrope dhe prekursorëve, sipas nenit 215 të Kodit Penal.

Ndërkaq, ndaj M.T., për të cilin ekzistojnë dyshime se është i lidhur me rastin, është paraqitur padi penale për veprën që lidhet me prodhimin dhe trafikimin e paautorizuar të drogave narkotike, sipas nenit 215 të Kodit Penal.

Hetim edhe për veprimet e policisë

MPB-ja njofton se për rastin është informuar edhe Departamenti për Kontroll të Brendshëm, Hetime Kriminalistike dhe Standarde Profesionale, i cili po ndërmerr masa dhe aktivitete për të shqyrtuar parregullsitë e mundshme gjatë veprimeve të zyrtarëve policorë. (TvShenja)

Lajme

Teleferiku i “Vodnos” pritet të rikthehet në funksion rreth Vitit të Ri

Pas rreth shtatë muajsh jashtë përdorimit, teleferiku i Vodnos në Shkup mund të rikthehet në funksion rreth Vitit të Ri, nëse punimet për rikonstruksionin përfundojnë sipas planit.

Nga Ndërmarrja Publike e Transportit (JSP) Shkup bëjnë të ditur se gjatë tetorit pritet të mbërrijnë ekipet e kompanisë austriake „Doppelmayr“, e cila do të kryejë riparimet dhe kontrollet teknike.

Teleferiku u ndal në maj, pasi gjatë kontrolleve u konstatuan disa mangësi teknike. Për riparimin e tyre është lidhur kontratë me kompaninë që e ka prodhuar dhe instaluar sistemin.

Oferta e „Doppelmayr“ arrin në 43,35 milionë denarë me TVSH, ndërsa kontrata ka vlerë maksimale prej 53,1 milionë denarësh me TVSH. Ajo përfshin furnizimin me pjesë rezervë, montimin, servisimin dhe testimin e pajisjeve.

Nga JSP theksojnë se teleferiku do të rikthehet në përdorim vetëm pasi të përmbushen të gjitha kushtet teknike dhe të sigurisë.

Lajme

Arenë “lufte” edhe sot në protestë, i vihet flaka institucionit financiar dhe Ministrisë së Arsimit

Sot mbahet dita e dytë e protestës studentore në Tiranë.
Studentët e shumë Universitetit të Mjekësisë, UBT-së, Politeknikut, fakultetit të Drejtësisë etj. janë grumbulluar para Ministrisë së Arsimit, ndërsa ka nisur hedhja e sendeve piroteknike drejt godinës, teksa para saj u pozicionua dhe policia.

Tensione ka pasur edhe në Fakultetin e Shkencave të Natyrës, ndërsa disa protestues kanë thyer derën kryesore dhe janë futur në ambientet e brendshme të fakultetit.
Gjimnazistët e shkollës “Partizani” i janë bashkuar studentëve dhe të rinjve në revoltë.
Gjithashtu, edhe në universitetet e Elbasanit dhe Shkodrës kanë nisur bojkotimi i mësimit, në shenjë solidariteti me studentët në Tiranë, ndërsa në Durrës, Vlorë dhe Gjirokastër çdo gjë vijon normalisht. /Topchannel