Lajme

Kasami do të jetë kandidati i opozitës shqiptare për president të shtetit

Nëse Arben Taravari mbetet në qëndrimin se nuk është i interesuar të jetë kandidat për president të shtetit, atëherë atë garë, për koalicionin e partive opozitare shqiptare, do ta zhvillojë Bilall Kasami. Këtë në intervistë për 360 shkallë e tha personalisht Kasami, lideri i Lëvizjes Besa, transmeton Portalb.mk.

“Fillimist u bisedua që të jetë zotëri Taravari, por nuk përjashtohet, ka kombinime që edhe unë të jem”, tha numri një i Besa-s.

Kasami pretendon se biseda me Taravarin në këtë temë nuk ka përfunduar.

“Zotëri Taravari tha se nuk është i interesuar, por ne nuk flasim për interesa personale, për pretendime personale, por flasim për interesin e shqiptarëve për sjelljen e ndryshimeve. Nëse së bahsku vlerësojmë se zotëri Taravari do të jetë kandidati më i mirë për president, unë besoj tërësisht se z. Taravari do të jetë i gatshëm ta zhvillojë këtë garë, aq më shumë që në të gjitha bisedat që kemi pasur, të gjitha konsultimet, z. Taravarin e theksojnë si kandidat serioz që të shkojë në rrethin e dytë”, u përgjigj numri një i Lëvizjes Besa.

Nga vendimi se cili do të jetë kandidati presidencial, varet edhe kush do ta udhëheqë listën e deputetëve të “Lidhjes Evropiane për Ndryshim” në njësinë e 6 zgjedhore. Nëse Taravari është kandidat për shef të shtetit, atëherë Kasami do të jetë bartës liste dhe e kundërta, thotë lideri i Besa-s.

“Parimisht jemi marrë vesh që liderët e partive politike të jenë bartës të procesit, që nënkupton se, në njësitë zgjedhore prej ku vijnë presidentët e partive të caktuara, ata do të jenë bartës në ato njësi zgjedhore. Në njësinë zgjedhore 6 ku jemi së bashku me liderin e Aleancës, kemi marrëveshje parimore që të dytë të jemi bartës të procesit, ende nuk kemi vendosur kush në cilin pozicion të jetë dhe në përputhje me këtë do të varet edhe vendimi ynë për njësinë e 5 zgjedhore. Edhe njëherë, para se të shohim ku do të jetë Besa, ne pamë se cili është pozicioni i cili mund të sjellë ndryshime dhe kur të vijë ky ndryshim, atëherë do ta kemi më të lehtë të ulemi dhe të flasim – kush, ku do të marrë përgjegjësi për qeverisje me shtetin, tha Kasami në intervistë.

Sipas marrëveshjes parimore, bartës liste i LEN-it në njësinë e 1 zgjedhore do të jetë Izet Mexhiti, në njësinë e 2-të zgjedhore – Afrim Gashi. Përfaqësuesi i Vetëvendosjes, Bekim Qoku, edhe pse është nga Struga (NJZ 5), do të jetë në listën e LEN-it në njësinë e 6 zgjedhore.

Kryetari i Aleancës për Shqiptarët, Arben Taravari deklaroi më 1 shkurt për Portalb.mk, se nuk ka pranuar të jetë kandidat për president shqiptar në zgjedhjet e ardhshme presidenciale. Ai tha se kjo është biseduar si mundësi, por që nuk e ka pranuar. Ishte kryetari i Lëvizjes Besa, Bilalll Kasami i cili më 31 janar tha se është biseduar që Taravari të jetë kandidat president.

Zgjedhjet presidenciale në Maqedoninë e Veriut do të mbahen me 24 prill (e mërkurë), ndërsa raundi i dytë do të mbahet me 8 maj (e mërkurë) së bashku me zgjedhjet parlamentare.

Lajme

Pse po zgjatet finalizimi i Korridorit 8 deri në dhjetor 2029, arsyet e inxhinerëve dhe qeverisja e kaluar?

Finalizimi i pjesës perëndimore të Korridorit 8 pritet të shtyhet të paktën deri në dhjetor të vitit 2029, pasi inxhinieri mbikëqyrës ka kërkuar zyrtarisht zgjatje të afatit për përfundimin e projektit.

Lajmin e bëri të ditur zëvendëskryeministri dhe ministri i Transportit, Aleksandar Nikolloski, gjatë vizitës në punimet e autostradës Tetovë-Gostivar dhe Gostivar-Bukojçani, së bashku me kryeministrin Hristijan Mickoski dhe drejtorin e NP “Rrugë Shtetërore”, Koce Trajanovski.

Sipas Nikolloskit, kërkesa për shtyrje vjen si pasojë e dy viteve të humbura, për të cilat ai fajësoi qeverinë e kaluar, duke thënë se në atë periudhë nuk ishte bërë pothuajse asgjë për përgatitjen e terrenit dhe krijimin e kushteve për ndërtim. Ai theksoi se kjo nuk është vetëm vlerësim politik, por konstatim i përfshirë edhe në raportin zyrtar të inxhinierit mbikëqyrës, i cili ka kërkuar shtyrje minimale prej dy vitesh për të kompensuar vonesat.

“Pjesa e dytë, për fat të keq, duhet të them se qeveria e kaluar për dy vite nuk kishte bërë asgjë. Kjo nuk është vetëm deklaratë e imja apo e kryeministrit apo e drejtorit të NPRRSH-së. Për këtë në muajin nëntor kemi marrë njoftim zyrtar nga inxhinieri mbikëqyrës, i cili kërkoi zgjatje të afatit për përfundimin e projektit për të paktën dy vite, sepse duhej të kompensoheshin ato dy vite të humbura nga qeveria e mëparshme dhe ne nuk kemi zgjidhje tjetër përveç ta bëjmë këtë, kështu që afati do të shkojë të paktën deri në dhjetor 2029, gjë që nuk do të thotë se projekti nuk do të përfundojë edhe më herët”, tha Nikolloski.

Sipaa tij, gjitha sfidat në trasenë po zgjidhen me koordinim të mirë mes institucioneve, ndërsa Qeveria i ka mundësuar operatorit një front të hapur pune në të gjithë trasenë.

“Ne shpesh flasim për këto projekte në paraqitjet tona publike, në konferenca për shtyp, në intervista, ja tani të shihen në terren. Tashmë e kemi kaluar një seksion, autostradën nga Tetova deri në Gostivar, në publik është krijuar perceptimi se është autostradë, por në fakt është rrugë ekspres dhe për herë të parë në këtë segment do të ndërtohet autostradë. Seksioni i dytë është ky ku jemi tani. Diçka që për shumëkënd ishte e paimagjinueshme, që ndonjëherë do të ketë autostradë që e anashkalon Strazhën dhe pjesën më të vështirë të lidhjes me Ohër dhe Strugë dhe gjithë Korridorin 8. Këtu para nesh shihet se po punohet intensivisht në ura, në hapjen e trasesë së autostradës, në skarpata, vërtet po kryhen punë të jashtëzakonshme inxhinierike. Si Qeveri po bëjmë gjithçka që t’u mundësojmë kompanive ndërtuese të përfundojnë sa më shpejt projektet dhe qytetarët t’i përdorin ato. Kjo është shumë e rëndësishme edhe për PBB-në, jam krenar që në tremujorin e tretë të vitit të kaluar rritja në ndërtimtari ishte 21%, ndërsa në të katërtin 16.7%. Presim rezultate të mira edhe për tremujorin e parë të këtij viti dhe vazhdimësi në periudhën e ardhshme”, theksoi zëvendëskryeministri Nikolloski.

Ai potencoi tre sfida në ndërtimin e këtyre segmenteve. E para lidhet me dislokimin e rrjeteve telekomunikuese ndërkombëtare dhe vendore, instalimeve elektrike dhe furnizimit me ujë për Pollogun.

Lajme

Mexhiti: E ndalova nënshtrimin e Haqim Ramadanit pas zgjedhjeve ndaj kryetarit të ri në Bërvenicë

Njëri nga kryetarët e VLEN-it, Izet Mexhiti, në emisionin “Debat në SHENJA”, deklaroi se ka ndërhyrë për të mos lejuar rikthimin e Haqim Ramadanit në Komunën e Bërvenicës, pas zgjedhjes së kryetarit të ri.

Sipas tij, situata në këtë komunë ka qenë e ndjeshme pas procesit zgjedhor dhe përplasjeve gjatë fushatës.

“Nuk ka pse të pajtohen Haqim Ramadani me z. Mickoski. Ka pasur fushatë dhe përplasje, sidomos me kandidatin që u zgjodh në Bërvenicë. Z. Haqim Ramadani ka qenë sekretar në komunë dhe nuk kam lejuar që të shkojë në Komunën e Bërvenicës t’i bie ndër këmbë kryetarit të ri. Ai është ekspert i fushës, me 17 vite përvojë në decentralizim, dhe e kam tërhequr në Komunën e Çairit”,deklaroi Mexhiti.

Lajme

Mexhiti: Mickoski për herë të parë në kongres të partive shqiptare

Njëri nga kryetarët e VLEN-it, Izet Mexhiti, në emisionin “Debat në SHENJA”, vlerësoi si zhvillim të rëndësishëm pjesëmarrjen e kryeministrit të vendit në një kongres të partive shqiptare.

Sipas tij, kjo është hera e parë që një kryeministër merr pjesë në një aktivitet të tillë politik të partive shqiptare.

“Është hera e parë që një kryeministër i vendit merr pjesë te partitë shqiptare. Edhe kur kanë qenë partnerë, nuk ka ndodhur. Madje, edhe z. Gruevski nuk ka marrë pjesë as në Marrëveshjen e Ohrit. Ky është një hap përpara, që z. Mickoski erdhi dhe e nderoi VLEN-in, i nderoi shqiptarët, duke qëndruar rreth dy orë”, deklaroi Mexhiti. /SHENJA/