Lajme

Vizbegu u bë me shkollë të re fillore për një mijë nxënës, pritet të hapet më 1 shtator

Në lagjen e Vizbegut në komunën e Butelit është ndërtuar një shkollë e re fillore “Vizbeg” në të cilin do të mund të mësojnë rreth njëmijë nxënës. Qeveria përmes MASH-it për ndërtimin e saj ka destinuar rreth 110 milionë denarë. Pritet të hapet nga 1 shtatori i këtij viti për vitin shkollor 2024/2025.

Shkolla ka 20 klasa të pajisura për program mësimor gjithpërfshirës, kabinete për shkenca natyrore dhe shoqërore, për muzikë dhe art, ashensor për nxënësit me nevoja të posaçme, bibliotekë… Pjesa tjetër e shkollave në komunën e Butelit, si dhe në komunën e Çairit dhe Shuto Orizares, ku janë regjistruar fëmijët nga ajo pjesë e qytetit, janë duke u shkarkuar.

Zëvendëskryeministri për Çështje Ekonomike, Koordinim të Resorëve Ekonomik dhe Investimeve Fatmir Bytyqi gjatë vizitës deklaroi se nevoja për ndërtimin e shkollës së re në këtë pjesë të qytetit u bë e dukshme dhe me këtë objekt shkollor modern zgjidhen problemet e qytetarëve.

“Shkolla e re jo vetëm që do të plotësojë në mënyrë hapësinore nevojat për një proces cilësor arsimor, por do të shërbejë si qendër për zhvillimin social dhe kulturor të fëmijëve. Të gjithë fëmijët, përfshirë edhe ata me nevoja të veçanta, do të kenë qasje në arsimin fillor cilësor”, tha Bytyqi, duke theksuar rëndësinë e investimit në arsim, i cili, tha ai, është gurthemeli i prosperitetit ekonomik të vendit.

Ai apeloi te kryetari i komunës së Butelit sa më shpejtë t’i përfundojë procedurat ligjore që objekti të vihet në funksion dhe nga 1 shtatori të fillojë me realizimin e mësimit.

Sekretarja shtetërore në MASH, Biljana Kazanxhiska, ka deklaruar se në këtë pjesë të komunës së Butelit ka mungesë të objektit shkollor sepse, siç tha ajo, po zhvillohet, urbanizohet dhe po shtohet popullsia dhe është e nevojshme më të vegjlit të mësojnë afër vendbanimit të tyre.

“Objekti është kompletuar plotësisht dhe është bërë pranimi teknik, mbetet që zyrtarisht të përfundojnë procedurat ligjore nga vetëqeverisja lokale, që së shpejti të caktohet një drejtor për këtë objekt të bukur që do të vihet në përdorim”, tha Kazanxhiska.

Ajo theksoi edhe se këtë vit MASH ka buxhet më të madh për investimet kapitale deri tani prej mbi 1,3 miliardë denarë përkatësisht mbi gjysmë më shumë se vitin e kaluar. Me këto mjete, tha ajo, do të rikonstruohen 90 objekte shkollore, do të fillojë ndërtimi i pesë kapaciteteve të reja hapësinore në 15 shkolla.

Në pyetjen e një gazetari, zëvendëskryeministri Bytyqi iu përgjigj se vizita për të inspektuar shkollën e sapondërtuar nuk ishte pjesë e fushatës parazgjedhore.

“Ka kohë deri në parazgjedhje, që janë rreth 20 ditë para vetë zgjedhjeve, dhe i thashë se personalisht jam i interesuar për këtë, sepse në mandatin tim tre vjeç e gjysmë tashmë po vij në këtë lokacion për herë të tretë. Një herë kur nuk kishte asgjë, ishte një fushë. Qytetarët kanë 33 vjet që flasin për këtë shkollë, tre vjet më parë ishte vetëm një fushë, isha hera e dytë kur sapo kishin filluar punimet dhe sot jam i lumtur që shoh që më në fund po përfundojmë atë që dikush duhet të kishte përfunduar me dekada. Sepse si një person që jeton në komunën e Butelit, si zëvendëskryeministër që u shërben të gjithëve në vend, dua shumë që fëmijët të kenë mundësi të mësojnë në një objekt që u garanton arsim cilësor për t’u bërë qytetarë të mirë të këtij vendi”, tha Bytyqi.

Lajme

Elezi: VLEN po e kthen përfaqësimin e drejtë dhe adekuat në ligj

Përfaqësuesi i VLEN-it, Afan Elezi, ka deklaruar se përfaqësimi i drejtë dhe adekuat nuk është dhuratë politike, por parim kushtetues që buron nga Marrëveshja Kornizë e Ohrit dhe një nga shtyllat kryesore të karakterit multietnik të shtetit.

Sipas tij, për më shumë se dy dekada kjo çështje ka mbetur pa një zgjidhje ligjore të qëndrueshme, duke u trajtuar përmes mekanizmave të përkohshëm dhe interpretimeve të ndryshme, por pa një ligj të veçantë.

“Për gati 23 vite kjo çështje mbeti pa ligj të veçantë. Arsyet i dimë, kishim arnime, mekanizma të përkohshëm dhe interpretime të ndryshme, por asnjëherë ligj”, ka theksuar Elezi.

Ai ka vlerësuar se me ardhjen e VLEN-it në përfaqësimin e shqiptarëve janë hapur procese që, sipas tij, nuk janë iniciuar gjatë dy dekadave të kaluara.

“Për vetëm 24 muaj ne sollëm ligj dhe po e avancojmë Marrëveshjen e Ohrit. Ky është një hap historik dhe një përgjigje serioze ndaj boshllëkut institucional që u krijua pas shfuqizimit të balancuesit”, ka deklaruar Elezi.

Në fund, ai ka bërë thirrje që të gjitha subjektet politike të mbështesin këtë proces, duke theksuar se tashmë është koha për vendime konkrete dhe jo për retorikë politike.

“Ky është momenti kur secili duhet të tregojë nëse është në anën e historisë. Nuk ka më vend për patriotizëm të rrejshëm. VLEN nuk bën zhurmë për të drejtat e shqiptarëve, por i kthen ato në ligj. VLEN shqiptarët po i bën ligj”, ka përfunduar Elezi.

Lajme

Deputetja e VLEN Mimoza Musa merr pjesë në Konferencën e 5-të në Parlamentin Evropian në Bruksel

Deputetja e Kuvendit të Republikës së Maqedonisë së Veriut nga koalicioni VLEN, Mimoza Musa, mori pjesë më 23 dhe 24 qershor në Konferencën e 5-të me temë “Kapërcimi i hendekut ndërmjet pjesëmarrjes politike të të rinjve dhe politikave rinore”, e mbajtur në Parlamentin Evropian në Bruksel.

Në këtë aktivitet, së bashku me deputetë dhe përfaqësues të shoqërisë civile nga vendet e Ballkanit Perëndimor, u diskutuan tema të rëndësishme që lidhen me politikat rinore dhe përfshirjen e të rinjve në proceset vendimmarrëse.

Gjatë punimeve të konferencës, u trajtuan çështje si avancimi i politikave për të rinjtë, sfidat e shëndetit mendor te gjeneratat e reja, si dhe nevoja për rritjen e pjesëmarrjes së tyre në jetën publike dhe politike. Po ashtu, u theksua rëndësia e perspektivës evropiane për vendet e rajonit dhe forcimi i bashkëpunimit ndërmjet Ballkanit Perëndimor dhe Bashkimit Evropian.

Pjesëmarrësit shkëmbyen përvoja dhe ide mbi mënyrat se si mund të krijohen më shumë mundësi për të rinjtë, duke synuar politika më gjithëpërfshirëse dhe më afër nevojave të tyre.

Deputetja Musa vlerësoi rëndësinë e këtyre forumeve ndërkombëtare si hapësira ku ndërtohen ura bashkëpunimi dhe ku forcohet dialogu për të ardhmen e gjeneratave të reja në rajon.

https://www.facebook.com/share/p/1HGPU1rqzd/

Lajme

Ali Ahmeti priti në selinë e BDI-së të riun nga Gostivari, Naser Veliun

Kreu i Bashkimit Demokratik për Integrim (BDI), Ali Ahmeti, priti sot në selinë e partisë Naser Veliun nga Gostivari, nipin e bashkëveprimtarit të tij të hershëm, të ndjerit Naser Veliu.

Gjatë takimit, Veliu u prezantua si elektroinxhinier i diplomuar në universitete prestigjioze në Mbretërinë e Bashkuar. Takimi u vlerësua si një mundësi për bashkëbisedim me të rinj të arsimuar dhe me përgatitje profesionale, të cilët, sipas Ahmetit, përfaqësojnë një brez me potencial për të kontribuar në zhvillimin shoqëror dhe institucional.

Ahmeti theksoi rëndësinë e përfshirjes së të rinjve në procese shoqërore dhe profesionale, duke vlerësuar se kapitali njerëzor i arsimuar jashtë vendit është një vlerë e shtuar për komunitetin dhe vendin.

Në përfundim të takimit, ai i uroi Naser Veliut suksese të mëtejshme në rrugëtimin e tij profesional dhe personal.

Ja postimi plotë:

Sot kisha kënaqësinë ta pres në selinë e BDI-së Naser Veliun, të riun nga Gostivari, nipin e bashkëveprimtarit tim të hershëm, të ndjerit Naser Veliu.

Naseri është elektroinxhinier, i diplomuar në universitete prestigjioze në Angli. Takime me të rinj të arsimuar, të përgatitur profesionalisht dhe me vizion për të ardhmen janë gjithmonë të këndshme dhe japin shpresë se brezat e rinj do të vazhdojnë të kontribuojnë me dije, përkushtim dhe përgjegjësi për zhvillimin e shoqërisë sonë.

I uroj suksese të mëtejshme në rrugëtimin e tij profesional dhe personal.