Lajme

Gjermania nuk i pranon shtetasit e Maqedonisë me pasaportë të vjetër

Pasaporta e Maqedonisë me emrin e vjetër mund të jetë ende në përdorim në disa vende evropiane, por jo edhe në Gjermani. Burime diplomatike për DW shpjegojnë se me pasaportën pa emrin kushtetues nuk mund të futeni në Gjermani, nëse udhëtari vjen nga Maqedonia e Veriut apo ndonjë vend të tretë.

Ministri teknik i Punëve të Brendshme, Pançe Toshkovski, të hënën në deklaratë për mediat theksoi se “pasaporta e vjetër përdoret në Gjermani, Zvicër, Shqipëri, Kosovë”. Sipas tij, është turp që nuk vlen edhe në vend për shkak të rregullimit aktual ligjor, ndërsa zgjidhjen e sheh në ndryshimin e Ligjit për dokumentet e udhëtimit.

Edhe ministri i Punëve të Jashtme, Bujar Osmani i cili këto ditë po i viziton konsullatat në Gjermani, Zvicër dhe Itali, nga Berni e përshëndeti vendimin e Zvicrës për lejimin që qytetarët e Maqedonisë të udhëtonin me dokumentet e vjetra të udhëtimit. Mirëpo, Osmani nuk specifikoi nëse mendon për udhëtime me pasaportat e vjetra nga Zvicra drejt Maqedonisë, apo edhe anasjelltas, duke qenë se rekomandimi i deritanishëm për shtetasit e Maqedonisë jashtë vendit që nuk kanë pasaportë të re ka qenë që të nxjerrin dokumentet e udhëtimit.

Sa i përket Gjermanisë, situata atje është e qartë. Burime diplomatike thonë për DW se autoritetet gjermane po bëjnë gjithçka për të lehtësuar gjendjen e qytetarëve të Maqedonisë të cilët nuk kanë arritur të marrin pasaportën me emrin kushtetues dhe se ndihma ka për qëllim para së gjithash mbrojtjen e të drejtave të tyre. Kjo do të thotë se qytetarët e Maqedonisë mund të përdorin pasaportat e tyre me emrin e vjetër kushtetues për identifikim personal në atë vend, por nuk do të mund të hyjnë në vend nëse nuk kanë dokument të ri udhëtimi me emrin Maqedonia e Veriut.

Kjo do të thotë se mund të largohen nga Gjermania për në Maqedoninë e Veriut me pasaportën e vjetër, por jo anasjelltas.

Shoqata e Maqedonisë “Këshilli Qendror i shtetasve të Maqedonisë në Gjermani” me seli në Berlin, gjatë fundjavës ka paralajmëruar padi kundër Maqedonisë, nëse deri më 23 shkurt autoritetet nuk e ndryshojnë vendimin për vlefshmërinë e pasaportave me emrin e vjetër kushtetues dhe nëse nuk sigurohet dhënie më e shpejtë e pasaportave të reja.

Nga Shoqata thonë se me shpalljen e pasaportave me afat si të pavlefshme, pa ofruar kapacitete të mjaftueshme për dhënien e pasaportave të reja, kanë krijuar probleme të mëdha me të cilat shkelen të drejtat e njeriut të qytetarëve të Maqedonisë.

Pas hyrjes në fuqi të dispozitave të Marrëveshjes së Prespës të nënshkruar me Greqinë, nga 13 shkurti është ngushtuar rrethi i vendeve ku qytetarët e Maqedonisë mund të udhëtojnë dokumentet e vjetra të cilave nuk u ka skaduar afati, por janë të shtypura me emrin e vjetër të shtetit.

Me përjashtim të vendeve fqinjë si Kosova, Serbia dhe Shqipëria kur lejohet hyrja me letërnjoftim, në Bullgari dhe Greqi, si dhe në shumicën e vendeve evropiane, hyrje lejohet vetëm me dokumente me emrin e ri të shtetit. /DW

Lajme

Çairi bëhet me pishinë të re

Kryetari i komunës së Çairit, Izet Mexhiti, ka njoftuar për hapjen e pishinës në Çair, një projekt që sipas tij ka kushtuar 1 milion euro.
Mexhiti, ka thënë se ata po realizojnë një nga një projektet të cilat i kanë realizuar.
“Pishina sportive, me investim prej 1 milion eurosh, sot hap dyert. Një projekt i madh që për shumë kohë ka qenë nevojë dhe kërkesë e qytetarëve, e që sot bëhet realitet.
Premtim pas premtimi, po i realizojmë. Një nga një. Çdo projekt që kemi zotuar ka hyrë në rrugën e realizimit dhe çdo ditë po dëshmojmë se puna, përkushtimi dhe përgjegjësia japin rezultate. Javë pas jave, bashkë me qytetarët, po përurojmë vepra që mbeten. Si sot këtë pishinë sportive.
Kjo është qeverisja jonë. Ky është VLEN. Fjalët i kthejmë në punë, ndërsa zotimet në rezultate.
Urime!”, ka shkruar Mexhiti.

Lajme

Deputeti Bytyqi: Qytetarët do të paguajnë mbi 60 milionë euro vetëm kamatë për borxhin e ri

Deputeti i LSDM-së, Fatmir Bytyqi, në konferencën e sotme për shtyp në Kuvend, tha se huamarrja e re qeveritare prej 260 milionë eurosh do të jetë shumë më e shtrenjtë, duke marrë parasysh normën e lartë të interesit, me shtetin që paguan midis 58 dhe 64 milionë euro vetëm për interesa.

Bytyqi theksoi se çmimi për huamarrje kaq të shtrenjtë do të paguhet nga qytetarët edhe para se të ndihet ndonjë efekt ekonomik.
“Sipas EURIBOR-it aktual gjashtëmujor prej 2.562% dhe marzhit të dakorduar prej 2.10 pikë përqindjeje, kjo kredi aktualisht do të kushtojë rreth 4.66% në vit. Në varësi të orarit përfundimtar të shlyerjes, shteti do të paguajë afërsisht midis 58 dhe 64 milionë euro vetëm për interesa, dhe me tarifën e njëhershme prej 3.64 milionë eurosh, barra e drejtpërdrejtë financiare varion nga 61 deri në 67 milionë euro, pa kosto shtesë të agjencisë dhe kosto të tjera. Ky është çmimi i vërtetë që qytetarët do të paguajnë edhe para se të ndiejnë ndonjë efekt ekonomik”, tha Bytyqi.

Në të njëjtën kohë, Bytyqi theksoi se paratë nga borxhi i ri nuk do të përdoren për të përmirësuar standardin e jetesës së qytetarëve, por për tenderët kriminalë të Qeverisë.
“Gjëja më e frikshme është se këto para nuk shkojnë te qytetarët, nuk shkojnë për një standard më të lartë, por për tenderët partiakë, kompanitë e preferuara dhe luksin e qeverisë. Prandaj, LSDM, siç njoftoi, do ta kundërshtojë këtë borxh”, tha Bytyqi.

Lajme

Çmime të reja të naftës për festën e Bajramit

Çmimet e benzinës dhe vajit ekstra të lehtë rriten me 0.5 denarë, çmimi i dizelit mbetet i njëjtë.

Çmimet me pakicë të benzinës EUROSUPER BS-95 dhe EUROSUPER BS-98, si dhe të vajit ekstra të lehtë për përdorim shtëpiak (EL-1) do të rriten me 0.50 denarë për litër nga mesnata, njoftoi Komisioni Rregullator i Energjetikës.

Çmimi me pakicë i EURODIZEL (D-E V) nuk do të ndryshojë.

Çmimi i naftës M-1 NS do të rritet me 0.330 denarë dhe një kilogram do të kushtojë 51.144 denarë.