Lajme

Angelov: Jo VMRO-ja, luftën në 2001 e nisi UÇK-ja dhe Ali Ahmeti!

Joserioze dhe e papërgjegjshme është deklarata e Ministres së Mbrojtjes, Slavjanka Petrovska, se luftën në vitin 2001 e nisi VMRO-DPMNE-ja dhe se sot e kësaj ditë dëshiron luftë – ka shkruar në Facebook, Kryetari i partisë “Dinjiteti” dhe ish-gjenerali i “branitellave”, Stojançe Angelov.

Sipas Angelovit, deklarata e Petrovskës është dhënë gjatë një mitingu partiak të LSDM-së, më 28 Prill në përvjetorin e vrasjes së 8 pjesëtarëve të forcave maqedonase të sigurisë në Vicë të Tetovës.

Në reagimin e tij, Angelovi shkruan se luftën në vitin 2001, nuk e nisi VMRO-DPMNE-ja, por UÇK-ja, duke u thirrur në komunikatën numër 4. Madje ai pretendon se “branitellat” kanë shpëtuar Maqedoninë nga ndarja.

“Ministre Petrovska, jo VMRO-DPMNE-ja por Ali Ahmeti dhe UÇK-ja nisën luftën që të shkëpusin një pjesë të territorit maqedonas. Por, ne “branitellat” nuk lejuam që të shkëputet asnjë pëllëmbë toke maqedonase” – tha Angelov.

Por, kjo deklaratë e Angelovit, bie ndesh me pohimet ish-kreut të UÇK-së, Ali Ahmetit. Gjatë një tubimi në Dibër, Ahmeti u shpreh se UÇK-ja ka shpëtuar Maqedoninë nga ndarja, duke zbuluar prapaskena të vitit të trazuar 2001.

“Unë e kam patur në dorë propozimin e qeverisë së atëhershme për ndarjen e Maqedonisë dhe ky ka qenë momenti më i vështirë i imi për të marrë vendime. Nuk kam qenë udhëheqësi i një klubi, as nuk kam qenë udhëheqës dhe dirigjent artistik. 12.000 ushtarë kam patur” – tha Ali Ahmeti.

Ndryshe, përvjetori I ngjarjeve të 28 prillit të vitit 2001 në Malësi të Tetovës ka qenë në fokusin e aktiviteteve parazgjedhore të partive opozitare maqedonase, kurse në retorikën parazgjedhore liderë partiakë nuk kanë hezituar ta implikojnë vitin 2001 në fushatën zgjedhore. /tvklan.mk/

Lajme

Shënohet 8 dhjetori, Dita e Shën Klimentit të Ohrit

Maqedonia e Veriut sot shënon Ditën e Shën Klimentit të Ohrit. Në Kuvend sot në orën 11:00, Komiteti për ndarjen e Çmimit Shtetëror “Shën Klimenti i Ohrit” do të ndajë çmimin shtetëror “Shën Klimenti i Ohrit” për vitin 2025, përcjell TV21.

Fitues i çmimit shtetëror “Shën Klimenti i Ohrit” për arritje në fushën e edukimit dhe arsimit është akademiku Vitomir Mitevski, filozof dhe filolog klasik, ndërsa çmimin për arritje në fushën e kulturës dhe artit e marrin Zhivoin Glishiç, kompozitor, dhe Bedi Ibrahim, artist figurativ.

Çmimi shtetëror “Shën Klimenti i Ohrit” është mirënjohja më e lartë për arritje shumëvjeçare në fushën e edukimit, arsimit, kulturës, artit, shëndetësisë, mbrojtjes dhe përmirësimit të mjedisit jetësor, si dhe në veprimtarinë sociale me interes publik të Republikës së Maqedonisë së Veriut.

Lajme

Tetovë: Dy shoferë kapen duke drejtuar automjetin nën ndikimin e alkoolit, arrestohen

Më 07.12.2025 në orën 02:00, punonjësit e policisë nga Stacioni Policor për Sigurinë e Komunikacionit Rrugor Tetovë, në rrugën rajonale Tetovë – f. Jazhincë, në f. Leshkë, e kanë privuar nga liria personin D.T. (54) nga f. Rataj. Gjatë kontrollit në komunikacionin rrugor, punonjësit e policisë kanë ndaluar automjetin e tipit “Fiat Punto”, të cilin e drejtonte D.T., dhe pas masave të marra është konstatuar se ai ishte nën ndikimin e alkoolit, gjegjësisht i janë matur 1.96 promilë alkool në gjak.
Gjithashtu, në orën 02:40, në rrugën rajonale Tetovë – f. Vollkovi, në f. Brvenicë, punonjësit e policisë nga Stacioni Policor për Sigurinë e Komunikacionit Rrugor Tetovë e kanë privuar nga liria personin N.S. (40) nga f. Brvenicë. Gjatë kontrollit në komunikacionin rrugor, punonjësit e policisë kanë ndaluar automjetin e tipit “Mercedes”, të cilin e drejtonte N.S., dhe pas masave të marra është konstatuar se ai ishte nën ndikimin e alkoolit, gjegjësisht i janë matur 1.63 promilë alkool në gjak.
Ata janë mbajtur në stacionin policor dhe pas dokumentimit të rasteve do t’u hartohen parashtresa përkatëse sipas nenit 297-a “Drejtim i pakujdesshëm i automjetit motorik”.

Lajme

Gashi dhe Al-Ghanim diskutojnë bashkëpunimin politik, ekonomik dhe parlamentar

Kryetari i Kuvendit Afrim Gashi, ka njoftuar se në kuadër të Doha Forum 2025 ka zhvilluar një takim me Hasan bin Abdullah Al-Ghanim, Kryetar i Këshillit të Shuratit të Katarit.
“Diskutuam për forcimin e marrëdhënieve bilaterale dhe për mundësitë e reja të bashkëpunimit politik, ekonomik dhe parlamentar.
Theksova rëndësinë e diplomacisë parlamentare dhe gatishmërinë tonë për intensifikimin e dialogut në të gjitha nivelet. Shpreha vlerësimin tim për rolin konstruktiv dhe paqeruajtës të Katarit në çështjet rajonale dhe globale, ndërsa nënvizuam angazhimin e përbashkët për një partneritet edhe më dinamik në të ardhmen, përfshirë edhe në platformat multilateral”, ka deklaruar Gashi.