Lajme

Maqedoni, ekspozim më të madh ndaj korrupsionit kanë Ministria e Arsimit, e Mjedisit dhe MPB-ja

Qendra për Komunikime Qytetare (QKQ) sot publikoi dokumentin për rangimin e Qeverisë, ministrive dhe komunave në bazë të 32 treguesve për performansat për parandalim të korrupsionit në prokurimet publike. Institucionet janë të ranguara në tre zona – e kuqe, e verdhë dhe zona e gjelbër, varësisht nga pikët e fituara për mënyrën se si ato i zbatojnë prokurimet publike. Niveli maksimal i mbrojtjes është e paraqitur me 100 %, ndërsa niveli me aspak mbrojtje nga korrupsioni është paraqitur me 0 %. Asnjëri institucion nuk është në zonën e gjelbër të nivelit të lartë të mbrojtjes nga korrupsioni, me realizim të performansave për parandalim të korrupsionit prej më tepër se 80 %, transmeton Portalb.mk.

4 ministri dhe 43 komuna gjenden në zonën e kuqe, përkatësisht procedurat e tyre për prokurime publike zbatohen me nivel të ulët të mbrojtjes nga korrupsioni për shkak se këto kanë fituar më pak se 50 %.

“Ekspozimin më të madh ndaj korrupsionit e kanë Ministria për Arsim dhe Shkencë, Ministria për Mjedis Jetësor dhe Planifikim Hapësinor, Ministria për Punë të Brendshme si dhe Ministria për Sistem Politik dhe Marrëdhënie Ndërmjet Bashkësive”, thuhet në dokument.

Te grupi i komunave, niveli më i ulët i realizimit të performansave për parandalim të korrupsionit në prokurimet publike është konstatuar në komunën Kratovë dhe komunën Gostivar. Në zonën e kuqe është edhe Qyteti i Shkupit, si dhe 40 komuna tjera.

Performansat më të larta për parandalim të korrupsionit janë konstatuar në Ministrinë për Mbrojtje dhe Ministrinë për Bujqësi, Pylltari dhe Ekonomi me Ujëra, me një nivel prej 72 % në realizimin e performansave për parandalim të korrupsionit. Te komunat, realizimin më të lartë të performansave për parandalim të korrupsionit në prokurimet publike e ka Komuna e Kavadarit, edhe atë deri 70 %, si dhe komunat Veles dhe Probishtip me 66 %.

Niveli i ulët i mbrojtjes, nuk nënkupton doemos që ka korrupsion në prokurimet publike të institucionit konkret, por se nuk ndërmerren të gjitha masat e mundshme, të cilat duhet të parandalojnë korrupsionin dhe si rrjedhojë, më e madhe është mundësia që në këto institucione të ndodh korrupsion.

Ky rangim është përpunuar në kuadër të programit “Qytetarët kundër korrupsionit”, i përkrahur nga USAID.

Kujtojmë se Maqedonia e Veriut mbetet një regjim hibrid në raportin e fundit të Freedom House “Kombet në tranzit”. Freedom House në atë kategori vendos 11 vende, të cilat kanë karakteristika të autokracisë dhe demokracisë. Për shkak se ato nuk i përkasin plotësisht asnjërit bllok, institucionet e tyre janë të cenueshme, gjë që në vitin 2023 ka çuar në më shumë regres sesa avancim, thuhet në raport.

Lajme

Në fund të muajit nis ndërtimi i autostradës Shkup-Bllacë

Kryeministri Hristijan Mickoski paralajmëroi aktivitet të intensifikuar ndërtimor, duke paralajmëruar ndërtimin e gjashtë segmenteve të autostradave në të gjithë vendin në periudhën e ardhshme

Drejt fundit të këtij muaji, ndoshta më 26 gusht, tregoi Mickoski, do të fillojë ndërtimi i segmentit të autostradës Bllacë – Shkup, për të cilin, tha ai, kanë përfunduar të gjitha procedurat formale.

“Më në fund, për këtë projekt dhjetëvjeçar që u paralajmërua, kemi një kontraktor, është një kompani vendase, kemi mbikëqyrje, janë plotësuar të gjitha kushtet për të filluar ndërtimin e kësaj autostrade. Në shtator pres që të fillojë edhe një segment autostrade, pra Bukojçan – Kërçovë, dhe me dinamikë të shtuar të përfundojë autostrada Kërçovë – Ohër. Pres që segmenti nga Izvor deri në Vrbjan të fillojë në gjysmën e dytë të tetorit, ndërsa i gjithë segmenti të jetë në tremujorin e parë të vitit 2027”, tha Mickoski pasi inspektoi aktivitetet ndërtimore të fazës së parë të ndërtimit të sistemit të kanalizimit në Idrizovë në komunën e Gazi Babës.

Lajme

Hidhet bombë drejt një shtëpie në ‘fshatin e milionerave’ në Shkup

Një mjet shpërthyes është hedhur drejt një shtëpie në fshatin Bardovcë të Shkupit dhe ka shkaktuar dëme material.

Siç njoftoi policia, më 16.08.2026 rreth orës 02:35, K.B. (70) nga Shkupi ka raportuar se në fshatin Bardovcë të Shkupit, drejt shtëpisë së tij është hedhur një send që ka shkaktuar shpërthim dhe ka dëmtuar shkallët e hyrjes së shtëpisë.

Është thyer një dritare, si dhe është dëmtuar një automjet udhëtarësh, dera dhe sende të tjera, transmeton Lideri.mk. Fshati Bardovcë është i njohur për shtëpitë dhe rezidencat luksoze, si dhe banorët e saj të pasur./Lideri

Lajme

Nxënësit shqiptarë të Idrizovës pa mësim në shqip nga klasa e gjashtë

Në shkollën fillore “Njegosh” në Idrizovë të Komunës Gazi Babë, nxënësit shqiptarë edhe këtë vit mund të mësojnë në gjuhën shqipe deri në klasën e pestë. Nga klasa e gjashtë deri në të nëntën, ata duhet të vazhdojnë arsimin në shkolla të komunave të tjera. Pavarësisht që problemi është i kahmotshëm, edhe këtë vit nuk parashihet një zgjidhje konkrete. Ministrja e Arsimit, Vesna Janevska tha për Alsat se është mirë që fëmijët të mësojnë në gjuhën e tyre amtare. Mirëpo, për këtë rast ministrja Janevska nuk tha që dikasteri që ajo drejton nuk ka marrë ndonjë vendim për hapjen e paraleleve në shqip në Idrizovë.

“Në këtë moment nuk mund t’ju them saktësisht nëse dhe sa kërkesa eventualisht kemi, por dua të them se në këtë moment, ndoshta, nuk mund të pohoj me siguri, bëhet fjalë për punësime të reja. Dhe duke qenë se kemi të paktën 2.500 mësues që nuk kanë fond të plotë të orëve mësimore, ndërsa ne u paguajmë pagat, çdo punësim i ri përbën problem”,tha Vesna Janevska, ministre e Arsimit.

Ministrja Janevska çështjen e mësimit shqip në Idrizovë e lidh edhe me mungesën e nxënësve dhe me numrin e madh të mësuesve që aktualisht nuk kanë fond të plotë të orëve. Sipas saj, nëse në Idrizovë vërtetohet se nevojiten paralele në gjuhën shqipe, atëherë do të shqyrtohet edhe mundësia e angazhimit të mësuesve që tashmë janë në sistem. Janevska thotë se aktualisht nuk mund të konfirmojë nëse kërkesa për mësim në shqip do të nënkuptonte punësime të reja. Ajo thekson se Ministria nuk lejon punësime të reja përveç rasteve kur ato janë të domosdoshme.

“Optimizimin më intensiv e fillojmë këtë vit. Vitin e kaluar ishte shumë minimal, këtë vit gjithashtu minimal, duke pasur parasysh stafin dhe duke u kujdesur që racionalizimin ta bëjmë vetëm përmes pensionimeve. Mendoj se kemi filluar t’i afrohemi një gjendjeje normale, ose një numri normal të mësuesve që duhet të jenë të punësuar.Është e saktë se nuk lejojmë punësime, përveç rasteve kur ato janë të domosdoshme. Nëse konstatohet se edhe këtu është e domosdoshme, Ministria do të veprojë në përputhje me ligjin”, tha Vesna Janevska, ministre e Arsimit.

Ndërkohë, nga Komuna e Gazi Babës nuk japin një përgjigje konkrete nëse nga shtatori nxënësit shqiptarë të klasave të gjashta deri në të nëntat do të mund të mësojnë në shqip në Idrizovë. Nga komuna thonë se aktualisht po punohet për gjetjen e një lokacioni të përshtatshëm për ndërtimin e një shkolle të re fillore në Idrizovë.

“Bëhet fjalë për një projekt të rëndësishëm për banorët e Idrizovës nga të gjitha komunitetet etnike, veçanërisht për fëmijët dhe familjet e tyre. Prandaj, qëllimi ynë është që të gjitha procedurat e nevojshme të zhvillohen në mënyrë të plotë dhe në përputhje me procedurat ligjore”, theksojnë nga Komuna Gazi Babë.

Nga Komuna e Gazi Babës thanë se mbeten të përkushtuar për realizimin e këtij projekti dhe, pas përfundimit të procedurave përgatitore dhe administrative, do të mund të kalohet në fazat e ardhshme për ndërtimin e shkollës së re. /Alsat.mk