Lajme

Paralajmëroi burgosjen e Vuçiqit nëse hyn në Kosovë pa leje, deklarohet Sveçla

Ministri i Brendshëm, Xhelal Sveçla ka folur për deklaratën e tij se nëse Vuçiq tenton të futet pa leje në Kosovë, do të arrestohet.

Sveçla tha se kjo është deklaratë mëse normale e një shteti sovran.

“Nuk mund të pretendojmë se nuk ka ndodhur Banjska, se s’ka ndodhur kidnapimi i policëve. Ne me vetëdije kemi vendosur që të kthejmë normalitetin në çdo cep të vendit, të vendosim ligjshmëri edhe në pjesë të tjera. Destruktiviteti i Serbisë duhet të luftohet jo vetëm nga ne, por edhe nga aleatët tanë.

Ka pasë deklarata, ftesa qëndrime që Vuçiq duhet të vijë në Kosovë. Deklarata ime ka qenë e zakonshme, është obligim i yni ta mbrojmë sovranitetin dhe integritetin territorial të Kosovës. Është deklaratë mëse normale e një vendi të pavarur dhe sovran. Nëse Vuçiq pretendon me u futë në Kosovë me ushtri, ne do të përgjigjemi”, tha Sveçla në Euronews Albania.

Ai po ashtu është shprehur se autoritetet kosovare kanë prova se presidenti i Serbisë, Aleksandër Vuçiç, ka qenë drejtpërdrejtë i përfshirë në trajnimin e grupit terrorist që kreu sulmin në Banjskë të Zveçanit.

Sveçla tha se Kosova i ka të gjithë skenarët dhe përgatitjet e duhura për t’iu përgjigjur agresionit të mundshëm serb.

“Kishim fatin të mblidhnim shumë dëshmi lidhur me grupin terrorist. Tani e dimë se para sulmit në Banjskë, ky grup është trajnuar në një poligon zyrtar ushtarak të Serbisë. Së fundi vuçiç vizitoi këtë poligon, ku ushtria e rregullt serbe pati një trajnim ushtarak. Kemi incizimet, kemi pranim dorëzimet e armatimit nga magazinat e ushtrisë për këtë grup terrorist, tha Sveçla.

“Kemi informata inteligjente, dëshmi gojore, që tregojnë se Vuçiq ishte drejtpërdrejtë i përfshirë në trajnimin e këtij grupi. Kemi të gjitha dëshmitë. Është tjetër nëse dëshirojmë t’i injorojmë apo minimizojmë. Ne për këto arsye kemi pasur edhe takime të Këshillit të Sigurisë. Ne kemi skenarët, përgatitjet dhe mobilizimin e kapaciteteve tona për t’iu përgjigjur çdo lloj agresioni të grupeve terroriste të financuara nga Serbia”.

Ai tha gjithashtu se gjatë qeverisjes së kryeministrit Albin Kurti, është punuar që situata në veri të Kosovës t’i kthehet normalitetit.

“Ne po punojmë që 17 % e territorit të Kosovës t’i kthehet normalitetit. Të gjithë e dimë se për 22-23 vite situata në veri të Kosovës, në 4 komunat veriore nuk ka qenë normale. Ka qenë një agresion i hapur i Serbisë përmes instrumenteve të saj, që është shpërfaqur herë shumë agresive, duke shtypur popullin shqiptar atje, si në vitin 2000 kur u shpërngulën nga Mitrovica e Veriut 11 mijë shqiptarë e u vranë 11 persona”, tha Sveçla.

Lajme

Durmishi: Gjithmonë jemi për paga më të larta, por duhet të ketë arsyetim ekonomik

Ministri i Ekonomisë dhe Punës, Besart Durmishi, sonte në emisionin “Biznis21” në TV21 deklaroi se çështja e pagës minimale është shndërruar në një arenë politike ditore dhe se çdo rritje eventuale duhet të ketë arsyetim ekonomik.

“Më vjen keq që një temë kaq serioze si paga minimale është bërë arenë e politikës ditore. Ne kemi rreth 30 mijë persona që marrin pagë minimale, nga gjithsej 750 mijë sa kemi në nivel shteti. Nga këta 30 mijë persona, gjysma prej tyre janë njerëz që kanë hapur vetë biznese, përkatësisht kompani si tregtarë individualë dhe kanë edhe të ardhura të tjera”, tha Durmishi.

Ai shtoi se si qeveri gjithmonë janë të qëndrimit se pagat duhet të rriten, por se duhet të merren parasysh edhe parametra të tjerë ekonomikë.

“Sinqerisht, asnjëherë nuk kemi thënë se rritja është e mjaftueshme. Gjithmonë jemi të qëndrimit se pagat duhet të rriten, por duhet të ketë bazë ekonomike. Duhet të shohim edhe produktivitetin dhe të mos shkaktojmë probleme të tjera. Nëse shkojmë me zgjidhje ad-hoc dhe me përmbushjen e kërkesave populiste të opozitës, nëse reagojmë në këtë mënyrë pa arsyetim ekonomik, mund të shkaktojmë inflacion. Ndërkohë, kompanitë me numër më të vogël të të punësuarve mund të përballen me implikime financiare dhe të detyrohen të ndërmarrin hapa për të larguar punonjës”, deklaroi Durmishi.

Lajme

Kujdes shoferë: Pezullimi i patentës nis pas SMS-it të dytë

Ndalimi i drejtimit të automjetit i vendosur me vendim të formës së prerë të gjykatës nuk do të shënohet më fizikisht në patentën e shoferit. Në vend të kësaj, po futet një sistem dixhital njoftimi nëpërmjet SMS-ve dhe email-it , njofton Ministria e Brendshme.

Sipas metodës së re të zbatimit të sanksionit, procesi i njoftimit zhvillohet në dy faza . Qytetarët fillimisht do të marrin një mesazh fillestar SMS , i cili përmban informacion në lidhje me llojin dhe kohëzgjatjen e ndalimit. Ky mesazh dërgohet afërsisht shtatë ditë pasi të jetë përfunduar deklarata me të dhënat e kontaktit .

Tetë ditë pas marrjes së mesazhit të parë, dërgohet një mesazh i dytë SMS dhe ndalimi i drejtimit të mjetit fillon zyrtarisht të ecë që nga momenti i marrjes së këtij mesazhi të dytë.

Ministria e Brendshme thekson se sistemi i ri eliminon nevojën që qytetarët të marrin një patentë të re shoferi me ndalim, gjë që më parë nënkuptonte kosto shtesë.

Deri më tani, sipas të dhënave të Ministrisë, më shumë se 3,000 ndalime drejtimi mjetesh , të vendosura me vendime gjyqësore të formës së prerë, janë zbatuar nëpërmjet këtij sistemi të ri.

Qytetarëve të cilëve u është lëshuar një sanksion i tillë u kërkohet të përditësojnë të dhënat e tyre të kontaktit – telefonin celular dhe adresën e email-it – në departamentet e çështjeve administrative, në mënyrë që të marrin njoftime në kohë dhe të shmangin keqkuptimet gjatë ekzekutimit të sanksionit.

Lajme

Altron Ismani zgjidhet kryetar i nëndegës së BDI-së në Drenovec

Në degën e Bashkimit Demokratik për Integrim në Tetovë është mbajtur një takim me përfaqësues dhe banorë nga Drenoveci, ku Altron Ismani është zgjedhur me unanimitet kryetar i nëndegës së BDI-së në këtë vendbanim.

Takimi u karakterizua nga një pjesëmarrje e madhe dhe një atmosferë uniteti, duke dëshmuar përkrahjen e fuqishme të qytetarëve për përfaqësuesit e tyre. Mbështetje të madhe mori Altron Ismani, i cili u vlerësua si figura që do ta përfaqësojë Drenovecin në periudhën e ardhshme.

Pas zgjedhjes, Ismani falënderoi bashkëbanorët për besimin e dhënë, duke theksuar se përkrahja që mori përbën një nder të madh, por edhe një përgjegjësi të rëndësishme.

“Ju falënderoj nga zemra secilin prej jush për mbështetjen, besimin dhe respektin që treguat ndaj meje. Ky besim për mua nuk është vetëm një nder, por mbi të gjitha është një përgjegjësi e madhe për të punuar me përkushtim, ndershmëri dhe transparencë për të mirën e lagjes sonë dhe të gjithë banorëve të saj”, tha Ismani.

Gjatë takimit u theksua edhe rëndësia e unitetit dhe bashkëpunimit mes qytetarëve, duke vlerësuar se vetëm përmes angazhimit të përbashkët mund të tejkalohen sfidat dhe të arrihen qëllimet për një të ardhme më të mirë për Drenovecin.