Lajme

Medreseja, Fetahu mbledh strukturat e BFI-së

Bashkësia Fetare Islame nuk ka një qëndrim konkret pas deklaratës së fundit të ministres së Arsimit, Vesna Janevska e cila tha se nxënësit që dalin nga shkollat e mesme fetare nuk mund të regjistrohen në asnjë fakultet tjetër, perveç atyre fetare. Kreu I BFI-së, Shaqir Fetahu I kontaktuar nga Alsat deklaroi shkurt se kryesia e BFI-së do ta diskutojnë këtë çështje ditën e hënë. Megjithatë nga ajo çfarë pamë nga konkursi I fundit për vitin shkollor 2024/25 nxënësit e rinjë janë paraqitur sipas kushteve të deritanishme dhe nuk krijohet përshtypja se medreseja ta ketë ndryshuar karakterin e saj në shkollë të mesme të përgjithshme, gjimnaz.

Ditë më parë, ministrja e Arsimit Vesna Janevska sqaroi për ALSAT ngërçin e krijuar me këtë kategori nxënësish dhe theksoi se edhe për këtë vit të ri akademik, ligji është i qartë: pavarësisht idesë për futjen e lëndëve shtesë në të dhe ndryshimin e karakterit të saj, Medreseja nuk mund të trajtohet dhe të ketë statusin si shkollat e mesme apo gjimnazet e tjera në vend.

“Është firmosur dokument në të cilin medreseja duhet të shndërrohet në gjimnaz privat. Kjo, sërish nuk nënkupton se ato që do të mësojnë në shkollë fetare do të mund të regjistrohen në fakultete. Vetëm ata që do të përfundojnë gjimnazin katërvjeçar sipas programeve shtetërore të Byrosë për Zhvillimin e Arsimit do të mund të regjistrohen në fakultete. Thelbi nuk është ta ndryshojmë karakterin, thelbi është të kemi shtet të organizuar. Vlerësoj se është masë populiste sepse nuk ka bazë ligjore që t’u thuhet atyre fëmijëve se munden. Pra, këtë vit ata që përfunduan shkollat fetare nuk mund të regjistrohen në asnjë fakultet tjetër”, tha Vesna Janevska, ministre e Arsimit dhe Shkencës .

Më 26 mars të vitit 2024, kryeministri teknik Talat Xhaferi njoftoi me vendim të qeverisë se u gjet zgjidhje [për themelimin e shkollës së mesme private “Medreseja Isa Beu” në fshatin Kondovë të Shkupit e akredituar me status të rregullt të gjimnazit]. Xhaferi u fotografua edhe me kreun e BFI-së Shaqir Fetai, i cili pati shprehur mirënjohje për këtë zgjidhje.

“Me këtë status nxënësit e Medresesë do të kenë të drejtë të regjistrohen në të gjitha universitetet e vendit dhe jashtë vendit. Bashkësia Fetare Islame konsideratën që pas shumë vitesh Medreseja “Isa beu” akreditohet. falënderime të veçanta Qeverisë me në krye kryeministrin Talat Xhaferi, Ministrin e Arsimit Jeton Shaqiri, Byronë për zhvillimin e arsimit me në krye Drejtorin Abdulfeta Fetai, etj. Urime nxënës, medresantë të respektuar!”, thonë nga BFI.

Asokohe ishte theksuar se kërkimi i zgjidhjeve kishte nisur që nga koha kur vetë Xhaferi kishte qenë kryetar parlamenti, duke themeluar një grupi pune për aspektet ligjore të statusit të Medresesë Isa Beu dhe kategorizimin e saj si gjimnaz i rregullt./Alsat.mk

Lajme

Ahmeti: Deklaratat e Kurtit për gjuhën shqipe u përdorën nga antishqiptarët, më gërryente në shpirt

Kryetari i Bashkimi Demokratik për Integrim, Ali Ahmeti, ka folur lidhur me statusin e gjuhës shqipe në Maqedonia e Veriut.

Në Debat Plus, Ahmeti tha se qëndrimet e kryeministrit të Kosovës, Albin Kurtit kanë ndikuar në “delegjitimimin” e kërkesave të shqiptarëve dhe i kanë dhënë argumente politike kryeministrit të Maqedonisë së Veriut, Hristijan Mickoski.

Kurti: S’po rrezikohet gjuha shqipe në Maqedoni të Veriut, pasi s’ka qenë kurrë gjuhë zyrtare

Sipas tij, edhe deklarimet se gjuha shqipe nuk ka qenë gjuhë zyrtare kanë krijuar një situatë shqetësuese, duke u përdorur nga qarqe antishqiptare.

Ahmeti u shpreh se kjo ka ndikuar negativisht në të drejtat dhe përfaqësimin e shqiptarëve, duke theksuar se “gjuha po kontestohet dhe nuk përdoret më si më parë në institucione”.

“Që ne na delegjitimoi dhe që u dha argument Kristian Mickoskit dhe fuqi politike, që kryeministri po i mbështesë ata forca politike. Kryeministri i Kosovës po del dhe thotë se gjuha shqipe kurrë s’ka qenë zyrtare. Dhe javë të tëra antishqiptarët më të mëdhenj, e vendosnin në ekran kryeministrin e Kosovës, që mua më gërryente në shpirt, ja kryeministri i Kosovës thotë që gjuha shqipe s’ka qenë zyrtare dhe nuk është.

Ishte kryeministri i Kosovës që shqiptarëve këtu ua hoqi të drejtën legjitime, legjitimitetin… kjo me ka brengosur nga kryeministrit. Sepse i tërë devalvimi i situatës këtu, asnjë hap prapa nuk ka shkuar. Që dy vjet këtu nga një hap shkohet. Kontestohet gjuha, dhe nuk përdoret më, siç është përdorur nëpër institucione. Përfaqësimi i drejtë është heq”, ka thënë Ahmeti.

Këto komente vijnë në një kohë kur debati për gjuhën shqipe është intensifikuar në Maqedoninë e Veriut, pas protestave të studentëve shqiptarë në Shkup, të cilët kërkojnë që provimet profesionale të mund të mbahen edhe në gjuhën shqipe, në përputhje me legjislacionin ekzistues.

Lajme

Ministri izraelit i Mbrojtjes: Lufta me Iranin mund të rifillojë “së shpejti”

Ministri i Mbrojtjes i Izraelit, Israel Katz, ka paralajmëruar se lufta me Iranin mund të rifillojë “së shpejti”, transmeton Anadolu.

“Është e mundur që së shpejti të na duhet të veprojmë përsëri për të siguruar arritjen e objektivave”, tha Katz gjatë një aktiviteti ushtarak në selinë e Ministrisë së Mbrojtjes në Tel Aviv.

“Irani ka pësuar goditje jashtëzakonisht të rënda gjatë vitit të kaluar, goditje që e kanë kthyer vite prapa në të gjitha fushat”, shtoi ai në deklaratat e tij të raportuara nga gazeta Yedioth Ahronoth.

Kërcënimet izraelite për një rifillim të mundshëm të sulmeve ndaj Iranit shihen nga vëzhguesit si pjesë e përpjekjeve për të shtyrë SHBA-në drejt një veprimi të ri ushtarak.

Javën e kaluar, Katz tha se Izraeli po pret një “dritë jeshile” nga SHBA-ja për të rifilluar luftën kundër Iranit.

Sipas Axios, Komanda Qendrore e SHBA-së (CENTCOM) ka përgatitur plane që mund të përfshijnë sulme ndaj infrastrukturës iraniane, si dhe opsione më të gjera si rritja e presionit detar në Ngushticën e Hormuzit.

Propozimet thuhet se synojnë ta detyrojnë Iranin të kthehet në negociata me më shumë fleksibilitet, veçanërisht për çështjen bërthamore.

SHBA-ja dhe Izraeli nisën sulme ndaj Iranit më 28 shkurt, duke nxitur kundërpërgjigje nga Teherani ndaj aleatëve të SHBA-së në Gjirin Persik dhe duke mbyllur Ngushticën e Hormuzit.

Një armëpushim u shpall më 8 prill përmes ndërmjetësimit të Pakistanit, i ndjekur nga bisedime në Islamabad më 11 prill, por nuk u arrit marrëveshje. Presidenti amerikan, Donald Trump, më vonë e zgjati armëpushimin pa një afat të ri, me kërkesë të Pakistanit.

Lajme

Qeveria: Ulja e çmimeve të karburanteve vazhdon deri më 18 maj

Qeveria informon opinionin se, pas diskutimeve me kompaninë OKTA dhe me qëllim të zbutjes së presioneve të çmimeve mbi qytetarët dhe ekonominë, zbritja e karburanteve vazhdon deri më 18 maj 2026.

Kjo është një masë që siguron ulje të çmimeve me pakicë, me zbritjen që arrin në 3 denarë për litër për naftën dhe 2 denarë për litër për benzinat me 95 dhe 98.

Nga Qeveria thonë se mbesin të përkushtuar për të marrë masa në kohë dhe efektive për të mbrojtur standardet e jetesës së qytetarëve, veçanërisht përballë një krize çmimesh të importuara dhe sfidave globale të energjisë.

“Në koordinim me institucionet kompetente dhe operatorët ekonomikë, ne do të vazhdojmë të monitorojmë situatën dhe të reagojmë në përputhje me rrethanat, me qëllim sigurimin e stabilitetit dhe parashikueshmërisë në treg. Kujdesi për qytetarët dhe mbështetja e ekonomisë mbeten përparësia jonë kryesore”, njoftojnë nga Qeveria.