Lajme

Paga mesatare më e lartë në rajon në Slloveni, më të ulëtat në Maqedoni e Bosnjë

Pagën mesatare më të lartë në rajon e fitojnë punëtorët në Slloveni, ndërsa më të ultën në Bosnjë e Hercegovinë dhe në Maqedonë të Veriut, thonë analiza e përgatitur nga Anadolu Agency (AA).

Sipas të dhënave të fundit, paga mesatare e paguar për muajin qershor në Slloveni ishte 1.501,97 euro, Kroaci 1.315 euro, Serbi 855.82 euro, Mali i Zi 838 euro, Bosnjë e Hercegovinë 702.51 euro dhe Maqedonia e Veriut 680.70 euro.

Thuhet se paga mesatare bruto për muajin qershor në Slloveni ka arritur në 2.366,79 euro (me taksa dhe kontribute).

Paga mesatare mujore për gjashtëmujorin e parë të këtij viti është gjithashtu më e lartë se ajo e gjysmës së parë të vitit 2023, nominalisht 6,5 për qind në shumën bruto (pra 3,5 për qind në terma reale), dhe nominalisht 4,0 për qind në shuma neto (në terma reale me 1,1 për qind).

Rritja e pagave në bazë gjashtëmujore në sektorin privat është më e lartë se në sektorin publik.

Krahasuar me pagën e muajit maj, paga mesatare bruto në sektorin privat është më e ulët për 1,1 për qind, ndërsa në sektorin publik është rritur me 5,2 për qind (në sektorin institucional të shtetit, që është pjesë e sektorit publik, është më e lartë për 6,3 për qind).

Arsyeja kryesore për një rritje të tillë të pagave në sektorin publik është rregullimi i vlerës së koefincietit të pagave me 3,36 për qind nga 1 qershori 2024 (pra në masën 80 për qind të rritjes së çmimeve të konsumit të mallrave në periudhën dhjetor 2022- dhjetor 2023), për të cilën përfaqësuesit e sindikatave të sektorit publik dhe Qeveria ranë dakord në fund të vitit të kaluar.

Megjithatë, paga mesatare mujore bruto për gjashtëmujorin e parë të vitit 2024 (krahasuar me pagën për të njëjtën periudhë të vitit 2023) në sektorin privat, është rritur më shumë (me 7,6 për qind) sesa në atë publik, dhe është më e lartë për 4,4 për qind, (në sektorin institucional të shtetit është rritur me 3,8 për qind).

Mesatarisht, paga më e lartë për muajin qershor është paguar për shpërndarjen e energjisë elektrike, gazit dhe avullit (3.630,28 euro bruto ose 2.241,33 euro neto), dhe më e ulëta në katering (1.746,26 euro bruto ose 1.142,43 euro neto).

Në të njëjtën kohë, në Kroaci, paga mesatare mujore neto e paguar për punonjës në persona juridikë për muajin qershor ishte 1.315 euro, që është nominalisht dhe realisht për 0,7 për qind më e ulët krahasuar me muajin maj.

Paga mesatare mujore bruto për punonjës në Kroaci për qershorin e vitit 2024 ishte 1.819 euro, që është nominalisht dhe realisht më e ulët për 0,7 për qind krahasuar me muajin maj.

Paga më e lartë mesatare mujore neto për të punësuarit në muajin qershor është paguar në sektorin e shëndetësisë, në vlerë prej 1.981 euro, ndërsa më e ulëta në sektorin e prodhimit të veshjeve, në vlerë prej 845 euro.

Paga më e lartë mesatare mujore bruto për punonjës për muajin qershor ka qenë në prodhimin e koksit dhe derivateve të naftës, në vlerë prej 2.942 euro, ndërsa më e ulëta në prodhimin e veshjeve, në vlerë prej 1.091 euro.

Rritja e pagave bruto në periudhën janar-maj 2024 në Serbi, krahasuar me të njëjtën periudhë të vitit të kaluar, ishte 15,3 për qind, ose 9,5 për qind në terma reale, ndërsa pagat mesatare neto ishin më të larta për 15,2 për qind, ose 9,4 për qind në terma reale.

Krahasuar me të njëjtin muaj të një viti më parë, paga mesatare bruto për muajin maj 2024 është më e lartë për 16,3 për qind, dhe reale për 11,3 për qind, ndërsa paga mesatare neto është më e lartë për 16,2 për qind dhe reale për 11,2 për qind.

Në të njëjtën kohë, në Mal të Zi, paga mesatare (neto) në qershor, në krahasim me majin shënoi rritje prej 0,7 për qind, ndërsa paga mesatare (neto) në qershor 2024 krahasuar me të njëjtin muaj të një viti më parë, shënoi rritje prej 5,4 për qind.

Nëse merret parasysh se çmimet e konsumit në qershor, krahasuar me majin, shënuan rritje prej 0,1 për qind, rezulton se fitimet reale për të njëjtën periudhë shënuan rritje prej 0,6 për qind.

Në Bosnjë e Hercegovinë, paga mesatare në qershor ishte më e lartë për 57 euro krahasuar me pagën mesatare të paguar në vitin 2023, kur ishte 645.71 euro.

Sipas të dhënave të Entit Shtetëror të Statistikave të Maqedonisë së Veriut, indeksi i pagës mesatare mujore neto të paguar për punonjës në qershor 2024 krahasuar me qershorin 2023 është 114,8.

Kjo rritje vjen kryesisht si rezultat i rritjes së pagës mesatare mujore neto të paguar për punonjës në sektorët e mëposhtëm: veprimtaritë financiare dhe të sigurimit (24,6 për qind), veprimtaritë e shërbimeve administrative dhe ndihmëse (22,9 për qind), administrata publike dhe mbrojtja, si dhe sigurimet shoqërore të detyrueshme (19,6 për qind).

Rritje e pagës mesatare mujore neto të paguar për punonjës, krahasuar me muajin paraardhës është shënuar në sektorët e mëposhtëm: veprimtari financiare dhe sigurime (21,1 për qind), tregtia me shumicë dhe pakicë dhe riparimi i mjeteve motorike dhe motoçikletave (5,4 për qind) dhe veprimtaritë e shërbimeve administrative dhe ndihmëse (4,5 për qind).

Paga mesatare mujore e paguar neto për punonjës për qershor 2024 është 680 euro.

Lajme

27 vjet nga marrëveshja e Kumanovës

Sot bëhen 27 vjet nga nënshkrimi i marrëveshjes ushtarako-teknike të Kumanovës, me të cilin iu dha fund luftës në Kosovë, duke u dorëzuar ish-ushtria e Jugosllavisë dhe kapitullimi i kriminelit Sllobodan Millosheviq.

Me këtë marrëveshje, Serbia është detyruar të tërheqë të gjitha forcat e saj policore dhe ushtarake nga Kosova. Marrëveshjen e Kumanovës, ndërmjet NATO-s dhe RFJ-së, e nënshkruar më 9 qershor 1999, hyri në fuqi më 11 qershor 1999. Atë e nënshkruan Michael Jackson, komandanti i parë i KFOR-it në Kosovë, dhe ish-shefi i Shtabit të Armatës serbe, gjenerali Nebojsha Pavkoviq, i akuzuari i Hagës për krime lufte dhe gjenocid.

Marrëveshja është arritur pas fushatës së bombardimeve të NATO-s mbi caqet serbe, e cila ka zgjatur për 78 ditë me radhë, si dhe pas përpjekjeve të ndryshme diplomatike për t’i dhënë fund luftës në Kosovë, gjatë të cilës mbi 10 mijë njerëz janë vrarë, rreth 5 mijë të tjerë të zhdukur dhe mbi 1 milion shqiptar të zhvendosur. Shkatërrimet materiale po ashtu kanë qenë masive.

Ndër të tjera në marrëveshje parashihej:

c) që nga Kosova të largohen të gjithë personat dhe organizatat me aftësi militare duke përfshirë armatën e rregullt dhe forcat e marinës, civilë të armatosur, paramilitarë, forcat ajrore, garda kombëtare, policia kufitare, rezervistët, policia ushtarake, shërbimet informative, MUP-it, policia lokale, speciale, antirebeliste, antiterroriste dhe çdo grup i përcaktuar kështu nga KFOR-i.

d) u caktua një zonë sigurie ajrore 25 kilometra përtej kufirit të Kosovës

e) u caktua një zonë 5 kilometrash përtej kufirit me RFJ-në që nuk guxonte të vendosen armatimet e rënda dhe ushtria, përveç ushtarët kufitarë.

Më 12 qershor të vitit 1999, në Kosovë kanë zbarkuar trupat e para të këmbësorisë së NATO-s, ndërsa ka nisur largimi i forcave serbe.

Sekretari i përgjithshëm i NATO-së, Havijer Solana, më 10 qershor 1999 kishte lëshuar urdhrin për ndalimin e bombardimit dhe Këshilli i Sigurisë së OKB-së miratoi rezolutën 1244, ku u dërguan 37.200 ushtarë të KFOR-it nga 36 shtete.

Misioni ishte i ndarë në pesë zona të përgjegjësisë, që i përkisnin KFOR-it amerikan, anglez, francez, gjerman dhe italian.

Me hyrjen e NATO-s, në Kosovë ka nisur edhe vendosja e misionit të përkohshëm të Organizatës së Kombeve të Bashkuara, i cili do të administronte vendin për një periudhë të caktuar kohore.

Në të njëjtën kohë, është shpërbërë edhe Ushtria Çlirimtare e Kosovës, për t’u shndërruar në Trupat Mbrojtëse të Kosovës.

Lajme

Mbi 1,600 gra të lindura në Maqedoni të Veriut lindën foshnje në Gjermani vitin e kaluar

Numri i përgjithshëm i shtetasve të RMV-së të regjistruar si të huaj që jetojnë në Gjermani deri në dhjetor të vitit të kaluar ishte 161.120, që është 2.000 më shumë se në vitin 2024, kur ky numër ishte 158.995.

Nga viti 2015 deri në vitin 2025, numri i qytetarëve të RMV të regjistruar si të huaj në Gjermani është rritur me më shumë se 65,000.

Statistikat tregojnë se vetëm vitin e kaluar në Gjermani kanë lindur 1.620 të porsalindur, të cilët, sipas klasifikimit statistikor gjerman, kanë nëna që kanë lindur në Maqedoni të Veriut.

Gjermania mbetet një nga destinacionet më të dëshirueshme për qytetarët e RMV-së që kërkojnë mundësi më të mira ekonomike, të ardhura më të larta dhe një të ardhme më të sigurt për fëmijët e tyre. Mijëra qytetarë të RMV-së janë zhvendosur atje vitet e fundit dhe disa prej tyre tashmë po krijojnë familje dhe po bëhen prindër, gjë që kontribuon në rritjen e numrit të fëmijëve të lindur në maternitetet gjermane nga prindër me origjinënga RMV-ja.

Lajme

Pesëvjeçari nga Gostivari u helmua me barna, dërgohet në Klinikën e Pediatrisë

Më 8 qershor 2026, rreth orës 18:40, në Stacionin Policor të Gostivarit është raportuar se në Repartin e Pediatrisë ishte pranuar një fëmijë pesëvjeçar nga fshati Çegran, i cili kishte pësuar helmim nga barnat.

Sipas informacioneve fillestare, fëmija ka rënë në kontakt me barna të lëna në një vend të arritshëm dhe i ka gëlltitur ato. Pas marrjes së ndihmës së parë mjekësore, ai është transportuar në Klinikën e Fëmijëve në Shkup për trajtim dhe ekzaminime të mëtejshme.

“Më 08.06.2026 në ora 18:40 në Stacionin Policor Gostivar është
raportuar se në Repartin e Pediatrisë, për shkak të helmimit me barna,
është sjellë një fëmijë pesëvjeçar nga fshati Çegran i Gostivarit. Sipas
raportimit, fëmija ka rënë në kontakt me barna që ishin lënë në një vend
të arritshëm dhe i ka gëlltitur ato. Fëmija është transportuar në Klinikën
e Fëmijëve në Shkup për kujdes dhe ekzaminime të mëtejshme”, thuhet në njoftimin e policisë.