Lajme

Në Universitetin “Nënë Tereza”, 1.800 vende të lira për studentët e vitit të parë

Procesi i regjistrimit në fakultetet në Maqedoninë e Veriut ka startuar, disa nga studentët e ardhshëm tashmë kanë aplikuar në mënyrë elektronike dhe u ka ngelur vetëm të dorëzojnë në fakultetet përkatëse dokumentet e nevojshme. Disa nga studentët të ardhur para objektivit tonë treguan se cilat drejtime i kanë zgjedhur dhe a i shohin ato si një rrugë drejt një karriere të suksesshme.

Studentët e ardhshëm të Universitetit “Nënë Tereza” thonë se të ardhmen e tyre e shohin në vend.

“Më pëlqen ky drejtim. E shoh veten këtu, pse jo nëse kushtet janë më të mira. Nëse do të jetë ashtu siç e kam paramenduar, e shoh veten në vendlindje.”, – tha një student.

“Do ta shohim si do të zhvillohet gjithçka. Më shumë dua mësues ose trajner. Shpresoj se do të gjejë punë dhe do të punoj këtu.”, – tha një student tjetër.

“Marketing dhe menaxhment. Të drejtën ta them për punën që e bëj momentalisht kam nevojë për këtë drejtim, prandaj e kam zgjedhur këtë drejtim.”, – u shpreh një student.

Edhe përkundër faktit që tregu i punës kërkon më shumë kuadër të fushës së drejtimeve deficitare, për këtë vit akademik fokusi i studentëve është tek shkencat shoqërore, njofton rektori i Universitetit “Nënë Tereza”, Izet Zeqiri. Ai njoftoi se në këtë universitet të ri, nga 1.800 vende të lira, aktualisht kanë aplikuar rreth 600 studentë, ndërsa risi është drejtimi i psikologjisë.

“Gjithsej janë 1.800 vende të lira. Si risi është se kemi pasur 5 fakultete, 40 programe studimore. Vitin e kaluar ka startuar 3 fakultete të reja të themeluara nga Kuvendi. Sivjet kemi akredituar edhe një drejtim të psikologjisë.”, – deklaroi rektori i Universitetit “Nënë Tereza”, Izet Zeqiri.

Procesi i aplikimit të studentëve po zhvillohet në të gjitha universitetet e vendit. Më pas vijon publikimi i listës së studentëve të pranuar dhe të pranuarit duhet të regjistrojnë semestrin e parë, me të cilin do të marrin statusin studentë.

Lajme

Shaqiri: Sistemin “Safe City” do ta kontestojmë në Gjykatën Kushtetuese

Deputeti i Aleancës për Shqiptarët, Rijad Shaqiri ka kundërshtuar zbatimin e sistemit “Safe City”, me ç’rast shoferët që bëjnë shkelje në komunikacion do të evidentohen përmes kamerave të sigurisë dhe do të gjobiten.

Shaqiri deklaroi se këtë vendim do ta kontestojnë në Gjykatën Kushtetuese, sepse i njejti diskriminon qytetarët e Shkupit, Tetovës dhe Kumanovës.

“Ky ligj do të zbatohet vetëm për qytetarët në tre komunat si Shkupi, Tetova dhe Kumanova. Po ju bëhet e padrejtë qytetarëve që janë në këto qytete. Do ta kontestojmë këtë ligj deri në Gjykatën Kushtetuese”, deklaroi Shaqiri.

Lajme

Ademi: Kur thamë JO për “Safe City, Dafina trillon duke menduar se të gjithë janë VREDI

Shpifjet për “Safe City” janë përpjekje për të mbuluar boshtin VMRO-VREDI-Levica

Sekretari i përgjithshëm i Bashkimit Demokratik për Integrim, Arbër Ademi, ka reaguar ashpër ndaj, siç i cilëson ai, shpifjeve dhe trillimeve që u shfaqën në opinion publik pas qëndrimit të BDI-së kundër projektit “Safe City” në formën e propozuar nga pushteti.

Sipas Ademit, në momentin kur BDI tha “JO” për këtë projekt, u aktivizua “refleksi i njohur i pushtetit”, duke zëvendësuar argumentet me shpifje dhe përgjigjet me trillime. Ai akuzon përfaqësuesen e VMRO-DPMNE-së, Dafina, se doli publikisht duke fabrikuar pretendime për “takime” dhe “oferta”, duke e shndërruar, siç thotë ai, shtetin në teatër dhe Kuvendin në skenë improvizimesh politike.

“Kur mungojnë faktet, shpiken dialogë; kur s’ka përgjigje, prodhohet tym”, thekson Ademi, duke sqaruar se nuk ka pasur asnjë takim mes kryetarit të BDI-së, Ali Ahmeti, dhe përfaqësueses së VMRO-DPMNE-së, e aq më pak pazare për hyrje në Qeveri.

“Ta sqarojmë pa ekuivok: Kryetari i BDI-së, Ali Ahmeti, nuk ka pasur asnjë takim me të dhe nuk ka pasur kurrë pazare për hyrje në Qeveri. Kaq. Ne nuk jemi VREDI dhe ajo e di mirë këtë”, thekson Ademi.

Sipas tij, e gjithë zhurma mediatike ka një qëllim të qartë politik: të mbulojë realitetin që po konsolidohet në skenën politike, atë që ai e quan boshti VMRO-VREDI-Levica. Ademi vlerëson se po ndërtohet një alibi për të justifikuar një pushtet pa legjitimitet, i mbështetur nga, siç shprehet ai, servilizmi i atyre që qëndrojnë në pushtet me çdo kusht, edhe kur nuk përfaqësojnë askënd përveç interesave personale.

“Kur një koalicion nuk ka legjitimitet, i rritet propaganda. Kur mungon drejtësia, shtohet shpifja”, përfundon reagimin e tij sekretari i përgjithshëm i BDI-së.

Lajme

Flamuri Kuq e Zi/ Pas 20 shkurtit nis gjykimi ndaj Qyrës

Pas 20 shkurtit do të mbahet seanca e parë gjyqësore në rastin e denoncimit për shkelje, të cilën stacioni policor në Strugë e dorëzoi në fillim të dhjetorit të vitit të kaluar kundër kryetarit të Strugës, Mendi Qyra dhe Komunës së Strugës.

Arsyeja është se gjatë shënimit të Ditës së Flamurit Shqiptar më 28 nëntor në Strugë, nuk ishte vendosur flamuri shtetëror.

Gjyqi në Strugë konfirmoi këtë informacion për Alsat. Thanë se në seancë do të thirret Qyra, kundër të cilit është dorëzuar denoncimi dhe parashtruesi i denoncimit, MPB-ja, pas së cilës do të merret vendimi përfundimtar. Të dyja palët do të kenë mundësinë të prezantojnë provat e tyre. E gjithë kjo vjen pasi Gjykata e Strugës pranoi kërkesën e stacionit policor të Strugës për nisjen e procedurës.

Rasti udhëhiqet nga gjyqtarja Jasna Partalkoska. Nëse gjykata konstaton faj, kryetari dhe komuna përballen me gjoba sipas ligjit, për subjektin juridik, në këtë rast Komuna e Strugës nga 20.000 deri në 200.000 denarë, dhe për personin përgjegjës, në këtë rast Mendi Qyra, nga 10.000 deri në 30.000 denarë./ Alsat.mk