Lajme

LSDM: Policë të pafajshëm po ndëshkohen për skandalin e Afrim Gashit në kufi

Partia opozitare maqedonase LSDM, ka dalë me reagim pasi dje MPB njoftoi se ka nisur procedurë disiplinore kundër gjashtë zyrtarëve policorë, në lidhje me kalimin e delegacionit të Afrim Gashit në pikën kufitare “Bllacë”, i cili mori pjesë në një dasmë në Kosovë.

Nga LSDM thonë MPB i konfirmoi të gjitha informacionet e publikuara nga ata dhe se fajin për skandalet në kufi Gashi dhe OBRM-PDUKM ua hedhin policëve.

“Për gjashtë policët MPB propozon procedurë për përcaktimin e përgjegjësisë. Në vend që t’i kërkohet llogari shefit Naum Ramuka, i cili ka dhënë urdhra, po ndëshkohen njerëz të pafajshëm, të ndershëm. Ky është turp”.

“Doli se Mickoski një gjë thotë në publik dhe bën një gjë krejtësisht tjetër. Ndërsa predikimet për përgjegjësi mbahen kundër njerëzve të pafajshëm dhe Toshkoski zbaton mbrojtje policore-partiake për shefin e tyre të preferuar Ramuka”.

“Kjo është edhe një arsye që Prokuroria të veprojë për këtë rast. Prokuroria kompetente duhet ta parandalojë këtë padrejtësi dhe fajtorët e vërtetë të mbajnë përgjegjësi”, thonë nga LSDM.

Lajme

Shënohet 8 dhjetori, Dita e Shën Klimentit të Ohrit

Maqedonia e Veriut sot shënon Ditën e Shën Klimentit të Ohrit. Në Kuvend sot në orën 11:00, Komiteti për ndarjen e Çmimit Shtetëror “Shën Klimenti i Ohrit” do të ndajë çmimin shtetëror “Shën Klimenti i Ohrit” për vitin 2025, përcjell TV21.

Fitues i çmimit shtetëror “Shën Klimenti i Ohrit” për arritje në fushën e edukimit dhe arsimit është akademiku Vitomir Mitevski, filozof dhe filolog klasik, ndërsa çmimin për arritje në fushën e kulturës dhe artit e marrin Zhivoin Glishiç, kompozitor, dhe Bedi Ibrahim, artist figurativ.

Çmimi shtetëror “Shën Klimenti i Ohrit” është mirënjohja më e lartë për arritje shumëvjeçare në fushën e edukimit, arsimit, kulturës, artit, shëndetësisë, mbrojtjes dhe përmirësimit të mjedisit jetësor, si dhe në veprimtarinë sociale me interes publik të Republikës së Maqedonisë së Veriut.

Lajme

Tetovë: Dy shoferë kapen duke drejtuar automjetin nën ndikimin e alkoolit, arrestohen

Më 07.12.2025 në orën 02:00, punonjësit e policisë nga Stacioni Policor për Sigurinë e Komunikacionit Rrugor Tetovë, në rrugën rajonale Tetovë – f. Jazhincë, në f. Leshkë, e kanë privuar nga liria personin D.T. (54) nga f. Rataj. Gjatë kontrollit në komunikacionin rrugor, punonjësit e policisë kanë ndaluar automjetin e tipit “Fiat Punto”, të cilin e drejtonte D.T., dhe pas masave të marra është konstatuar se ai ishte nën ndikimin e alkoolit, gjegjësisht i janë matur 1.96 promilë alkool në gjak.
Gjithashtu, në orën 02:40, në rrugën rajonale Tetovë – f. Vollkovi, në f. Brvenicë, punonjësit e policisë nga Stacioni Policor për Sigurinë e Komunikacionit Rrugor Tetovë e kanë privuar nga liria personin N.S. (40) nga f. Brvenicë. Gjatë kontrollit në komunikacionin rrugor, punonjësit e policisë kanë ndaluar automjetin e tipit “Mercedes”, të cilin e drejtonte N.S., dhe pas masave të marra është konstatuar se ai ishte nën ndikimin e alkoolit, gjegjësisht i janë matur 1.63 promilë alkool në gjak.
Ata janë mbajtur në stacionin policor dhe pas dokumentimit të rasteve do t’u hartohen parashtresa përkatëse sipas nenit 297-a “Drejtim i pakujdesshëm i automjetit motorik”.

Lajme

Gashi dhe Al-Ghanim diskutojnë bashkëpunimin politik, ekonomik dhe parlamentar

Kryetari i Kuvendit Afrim Gashi, ka njoftuar se në kuadër të Doha Forum 2025 ka zhvilluar një takim me Hasan bin Abdullah Al-Ghanim, Kryetar i Këshillit të Shuratit të Katarit.
“Diskutuam për forcimin e marrëdhënieve bilaterale dhe për mundësitë e reja të bashkëpunimit politik, ekonomik dhe parlamentar.
Theksova rëndësinë e diplomacisë parlamentare dhe gatishmërinë tonë për intensifikimin e dialogut në të gjitha nivelet. Shpreha vlerësimin tim për rolin konstruktiv dhe paqeruajtës të Katarit në çështjet rajonale dhe globale, ndërsa nënvizuam angazhimin e përbashkët për një partneritet edhe më dinamik në të ardhmen, përfshirë edhe në platformat multilateral”, ka deklaruar Gashi.