Lajme

Çfarë do bëj Maqedonia e Veriut me kanabisin e konfiskuar miliona euro

Maqedonia e Veriut ka depozituar kanabis medicinal të sekuestruar me vlerë të lartë nga veprimet e mëparshme që ka bërë ndaj personave juridikë të cilëve u është hequr licenca pas veprimeve të policisë, por nuk dihet nëse do të mund ta shesë.

Vitin e kaluar, më 15 dhjetor, MPB-ja njoftoi se policia dhe prokuroria kompetente, dhe me urdhër të gjykatës së Gostivarit, ka sekuestruar një sasi e përgjithshme prej 4.341 kilogramë marijuanë në vlerë mbi 10 milionë euro. Marihuana është sekuestruar pas vendimit të Qeverisë për heqjen e licencës për kultivimin e kanabisit për qëllime mjekësore të një personi juridik për shkak të parregullsive të konstatuara në operim.

Nga Agjencia për Menaxhimin e Pasurisë së Konfiskuar vetëm na kanë thënë se sasia mbahet në kazermën në Gjorçe Petrov, pa u përgjigjur se cili mund të jetë rezultati i mëtutjeshëm.

Prokuroria Themelore Publike ka saktësuar se sasitë e konfiskuara nuk mund t’i nënshtrohen asnjë veprimi tjetër derisa të përfundojë hetimi dhe procesi gjyqësor, por pa një përgjigje konkrete se çfarë do të ndodhë kur të përfundojë.

Nuk ka përgjigje as komisioni nga Ministria e Shëndetësisë për dhënien e licencave personave juridikë për kultivimin e kanabisit për qëllime mjekësore.

Nga Ministria e Brendshme na thanë se kompetencat e tyre mbarojnë me përfundimin e aksionit, pa vendosur nëse sekuestrimi do të shkatërrohet apo do të ketë një fat tjetër. Në vitet e kaluara qeveria u ka dhënë qindra licenca personave juridikë për kultivimin e kanabisit, dhjetëra kanë humbur ndërkohë interesin për të operuar për shkak të mosplotësimit të kushteve të eksportit dhe disa prej tyre janë gjetur në konflikt me ligjin.(INA)

Lajme

Georgievski: Me shqiptarët, kuptohem më mirë sesa me maqedonasit e “Botës Serbe”

Ish-kryeministri dhe lideri i Partisë OBRM-Popullore, Ljubço Georgievski, ka reaguar publikisht përmes rrjeteve sociale ndaj deklaratave të fundit të liderit të Aleanca për Shqiptarët, Arben Taravari.

Georgievski ka shpërndarë një video nga intervista e Taravarit, duke e shoqëruar me një koment që ka ngjallur reagime në opinionin publik. Ai thekson se pas shumë vitesh pavarësi të shtetit, raportet dhe perceptimet politike në vend po marrin një drejtim të ri.

“Pas 35 viteve pavarësi, ka ardhur koha kur me shqiptarët kuptohem më mirë sesa me maqedonasit e botës serbe”, ka shkruar Georgievski në profilin e tij në Facebook.

Reagimi i tij vjen pas deklaratës së Arben Taravarit, i cili në një intervistë ka shprehur vlerësim të lartë për Georgievskin, duke e cilësuar si një nga figurat politike që e ndjek dhe e respekton më së shumti në Maqedoninë e Veriut.

Taravari ka deklaruar se, ndonëse janë takuar vetëm disa herë shkurtimisht, ai i ndjek rregullisht analizat dhe qëndrimet e ish-kryeministrit, duke vlerësuar njohuritë e tij për zhvillimet historike dhe politike në vend, si dhe për raportet Maqedoni–Bullgari.

“Kur i dëgjoj deklaratat e tij, ai është njohës i mirë i historisë dhe i zhvillimeve në Maqedoni, si dhe i marrëdhënieve ndërmjet Bullgarisë dhe Maqedonisë. Ka analiza të mira dhe unë shpesh e dëgjoj dhe pajtohem plotësisht me të”, është shprehur Taravari.

Në pjesën tjetër të deklaratës së tij, Taravari ka folur edhe për marrëdhëniet ndëretnike dhe orientimin gjeopolitik të shtetit, duke theksuar rolin e faktorit politik shqiptar në kursin euroatlantik të vendit.

Lajme

Ecolog mund të tërhiqet nga Shkëndija, kërkon nga FFM, rishikim të vendimit

Pas vendimit të fundit të Federatës së Futbollit të Maqedonisë (FFM) ndaj KF Shkëndijës, sponsori i klubit ka reaguar ashpër, duke kërkuar që vendimi të rishikohet dhe korrigjohet urgjentisht.

Sipas reagimit, KF Shkëndija konsiderohet si një nga klubet e pakta në vend që ka funksionuar me seriozitet, korrektësi dhe në përputhje të plotë me të gjitha obligimet sportive dhe financiare. Sponsori thekson se investimet, mundi dhe sakrificat e bëra ndër vite kanë qenë të mëdha, ndërsa klubi ka dhënë kontribut të jashtëzakonshëm edhe në arenën ndërkombëtare.

“Shkëndija është klubi që me paraqitjet dinjitoze në Evropë ngriti koeficientin e ligës, nga i cili përfitojnë të gjitha klubet vendore dhe falë të cilit, nga viti i ardhshëm, futbolli ynë do të ketë një vend shtesë në kupat evropiane”, thuhet në reagim.

Sponsori e konsideron të papranueshme që, sipas tij, me vendime të marra në tavolinë të dëmtohet një projekt serioz dhe një kontribut i tillë të shpërblehet me “goditje të qëllimshme”. Për këtë arsye, paralajmërohet se do të shqyrtohet edhe mundësia e tërheqjes nga klubi dhe nga futbolli në Maqedoninë e Veriut.

“Prandaj, është e papranueshme që me vendime të marra në tavolinë të dëmtohet një projekt serioz dhe ky kontribut të shpërblehet me goditje të qëllimshme. Kjo qasje na shtyn të shqyrtojmë edhe opsionin e tërheqjes nga klubi/futbolli në Maqedoni të Veriut. Nëse FFM nuk e tërheq këtë vendim, atëherë ne si sponsor do ta shqyrtojmë seriozisht vazhdimin e mëtutjeshëm, pasi që ky vendim i cenon të drejtat dhe politikat e klubit”, thuhet më tej në deklaratë.

Në fund, sponsori u bën thirrje organeve të FFM-së që të reflektojnë me urgjencë dhe të veprojnë në interes të drejtësisë sportive, të klubit dhe të ardhmes së futbollit në vend.

Lajme

“Safe City” do t’i kapë edhe targat e huaja

Ministri i Brendshëm Pançe Toshkovski paralajmëron përditësim brenda një muaji të sistemit “Safe City” për makinat me targa të huaja. Sipas Toshkovskit puna nuk ka përfunduar dhe se ka ende për t’u bërë.

Ai paralajmëroi se mangësitë për gjobitjen e drejtuesve të makinave me targa të huaja do të mënjanohen.

Deri të përmirësimin e sistemit gjobat për makinat e huaja do të vazhdojnë të regjistrohen automatikisht, edhe pse nuk dihet sa prej tyre paguhen dhe kush është drejtuesi i tyre, pasi sistemi aktualisht njeh vetëm targat e automjeteve.

Nga MPB bënë të ditur se në tre muaj, sistemi “Safe City” kishte regjistruar 33.722 shkelje nga makina me targa të huaja. Më shumë raste janë shënuar në maj 11.258 ndërsa më pak në shkurt 4.301.