Ish-trajneri i Kombëtares së Shqipërisë, Christian Panucci ka marrë meritat për afrimin e mbrojtësit Ardian Ismajli te kuqezinjtë, pasi ka thënë se ishte ai që e ndoqi dhe e bindi ta lë Kombëtaren e Kosovës, ku ishte kapiten i ekipit U-21.

Mbrojtësi shqiptar i Empolit është njëri nga emrat më të përfolur ditëve të fundit, pasi paraqitjet e tij të mira në Serie A kanë bërë që ai të lidhet me një transferim te gjiganti italian, Juventusi.

Marrë shkak nga kjo, ish-trajneri i Shqipërisë, italiani Panucci ka folur për herë të parë se si ishte ai që bindi Ismajlin të zgjidhte kombëtaren kuqezi.

“Kjo është hera e parë që flas për të dhe më gëzon. Si trajner i Shqipërisë, kam udhëtuar nëpër Evropë në 2018-ën duke kërkuar lojtarë të rinj për të thirrur”, ka thënë fillimisht Panucci për Tuttosport.

“Unë personalisht e skautova dhe e pashë në Kroaci, ku Ardiani luante për Hajdukun e Splitit. Ai më fitoi menjëherë. Hyra në aksion dhe fillova të bisedoja me të për ta bindur që të zgjidhte Shqipërinë, duke qenë se tashmë ishte në kombëtaren e Kosovës”.

“Ai e pranoi Shqipërinë për shkakun tim dhe për atë se sa mundohesha ta bindja. Ai ishte njeri i fjalës. Kosova nuk donte ta humbiste, por Ardiani e mbajti premtimin që më dha”.

“Askush nuk e njihte në federatën shqiptare. Kur e thirra për herë të parë, as që e dinin se kush ishte”, përfundoi trajneri italian. /Telegrafi/

Klubi i Shkëndijës nga Tetova, ka reaguar për referimin e djeshëm të arbitrit Aleksandar Stavrev, në ndeshjen kundër Sileksit.

Sipas klubit tetovar, arbitri kishte disa vendime diskutabile, që ndikuan dukshëm në rezultatin përfundimtar të ndeshjes.

Ja dhe komunikata e plotë:

Dje (e shtunë, 05.10.2024), në ndeshjen e xhiros së 9-të të Ligës së Parë, Sileksi – Shkëndija (0:0), e luajtur në Kratovë, për fat të keq, përsëri protagonizmin nga loja e vodhi arbitri Aleksandar Stavrev me disa vendime tepër diskutabile. Ndër të tjera, ai mori dy vendime për kartona të kuq ndaj lojtarëve tanë, të cilët janë tërësisht të diskutueshëm (sidomos i pari i Trumçit në minutën e 55-të). 

Si klub, jemi lodhur nga ankesat e pafundme dhe reagimet tona ndaj mënyrës së ndarjes së drejtësisë në fushë, që vazhdimisht ka ndikuar në rezultatet tona. Kësaj radhe, përveç ankesës zyrtare që i është drejtuar Komisionit të Arbitrave pranë FFM-së, dalim publikisht me këtë komunikatë për të shprehur shqetësimin tonë të thellë për dëmet që na janë shkaktuar vazhdimisht nga arbitrat, dhe konkretisht nga Stavrev.

Nuk është hera e parë që ndeshjet direkte mes Sileksit dhe Shkëndijës referohen nga Stavrev, dhe për më shumë se një dekadë këto ndeshje kanë qenë të shoqëruara me “gabime” që, për çudi, gjithmonë ndodhin në dëm të Shkëndijës. Vendimet e tij kanë ndikuar drejtpërdrejt jo vetëm në rezultatin e ndeshjeve, por shpesh edhe në pozicionin tonë përfundimtar në renditjen e kampionatit.

Pyesim publikisht: Çfarë ka Stavrev kundër Shkëndijës? Pse këto gabime të përsëritura ndodhin vetëm ndaj nesh?

Apelojmë fuqimisht te organet kompetente të FFM-së që të marrin masa konkrete dhe të mos justifikojnë më gabimet e arbitrave. Kjo duhet të jetë hera e fundit që ne të jemi “viktima” e padrejtësive në fushë nga arbitrat në përgjithësi dhe Stavrevi në veçanti.

Kombëtarja shqiptare do t’i luajë dy ndeshjet e radhës në UEFA Nations League, ndaj Çekisë (11 tetor, “Epet Arena”, 20:45) dhe Gjeorgjisë (14 tetor, “Mikheil Meskhi Stadium”, 20:45).

Trajneri Silvinjo ka publikuar sot (e premte) listën me 24 lojtarë të grumbulluar për dy ndeshjet në transfertë, njofton Federata Shqiptare e Futbollit, transmeton “Zëri”.

Në portë janë Thomas Strakosha, Elhan Kastrati dhe Alen Sherri. Në mbrojtje Elseid Hysaj, Ivan Balliu, Mario Mitaj, Andi Hadroj, Ardian Ismajli, Berat Gjimshiti, Arlind Ajeti, Marash Kumbulla dhe Enea Mihaj.

Në mesfushë Ylber Ramadani, Kristjan Asllani, Amir Abrashi, Adrion Pajaziti, Qazim Laçi, Nedim Bajrami dhe Ernest Muçi.

Në sulm Jasir Asani, Taulant Seferi, Arbër Hoxha, Myrto Uzuni dhe Mirlind Daku.
Grumbullimi i lojtarëve do të nisë që të dielën në Tiranë me futbollistët që do të përfundojnë më herët impenjimet me skuadrat e tyre, ndërsa grupi i lojtarëve pritet të jetë i plotë të hënën më 7 tetor. Seancat stërvitore do të zhvillohen në “Shtëpinë e Futbollit”, ndërsa të enjten kuqezinjtë do të udhëtojnë drejt Çekisë.