Sport

Dueli mes dy Shkëndijave kishte vetëm fitues, haraçinasit vlerësojnë pritjen vëllezërore

Një komb, një emër, dy ekipe kuqezi dhe vetëm një vend në çerekfinale për njërën nga skuadrat vëllezërore. Spektakël në tribuna mes dy tifozerive “Ballistë” e “Çlirimtarë” dhe pjesa tjetër e publikut që pa dallim duartrokiste njejtë dy ekipet. Ndeshje për tu shijuar ishte ajo e djeshmja në Tetovë.

Pas shumë viteve në një ndeshje zyrtare u ndeshën dy Shkëndijat. Të mërkurën Tetova fitoi 1:0 Haraçinën dhe kaloi në çerekfinale të Kupës, mirëpo duke parë atmosferën para, gjatë dhe pas ndeshjes, duke se nga ky duel nuk pati humbës. Tetovarët sipas pritjeve u kualifikuan, haraçinasit kishin paraqitje dinjitoze, derisa lihet mbrapa një duel që përfundimisht forcon lidhjen dhe marrëdhënien ndërmjet dy klubeve, tifozerive e qyteteve.

Shkëndija e Tetovës e nisi e para që në paralajmërim me plotë kënaqësi e komplimente kur shorti vendosi të luajnë me “emnakun” e vet nga Haraçina. Pasuan postimet e haraçinasve në të njejtin drejtim, derisa kryesia e tetovarëve me moton “Për vllazni s’ka kufij” do të komunikonin vendimin për hyrje pa pagesë të publikut në respekt të tifozerisë mysafire.

Ndeshja dhuroi imazhe impresive, duartrokitje nga dy palët për dy ekipet dhe shtërngim duarsh e përqafime pas ndeshjes, pa ndjerë dëshpërimin se njëra skuadër dilte jashta Kupës.

E për fund, Shkëndija e Haraçinës mbyll këtë histori të bukur me një postim plotë mirënjohje e falenderim për Shkëndijën e Tetovës dhe publikun tetovar, si rumbullaksim i fitores së madhe vëllezërore që solli kjo ndeshje e Kupës.

Postimi i Shkëndijës së Haraçinës:

“Mikpritja që na rezervoi ekipi kundërshtar KF Shkëndija ishte e veçantë dhe e respektueshme, duke treguar vlerat e vërteta të sportit. Ata na pritën me nder, duke dëshmuar se garat sportive nuk janë vetëm përballje në fushë, por edhe shprehje e solidaritetit dhe respektit reciprok. Ne e vlerësojmë këtë sjellje dhe besojmë se e bën sportin më të bukur dhe më domethënës.

Ndonjëherë nuk është i rëndësishëm rezultati por përpjekja për kontributin e dhënë në fushë.

Çdo ditë e më shumë klubi ynë po dëshmon se është i gatshëm të garon aty ku takon,vetëm duhet që të qëndrojmë më të bashkuar se kurrë.

Tifozë të dashur, mbështetja juaj është forca jonë! Së bashku kemi kaluar sfida dhe kemi arritur suksese të mëdha. Tani, më shumë se kurrë, na duhet që të ecim përpara me besim dhe energji të pashtershme. Le të jemi bashkë për çdo moment të kësaj rruge, duke dhënë gjithçka për ngjyrat tona. Nuk ka pengesë që nuk mund të kapërcehet kur jemi të bashkuar. Para!

Çlirimtarët Haraçinë sot ishit të jashtëzakonshëm!”

Lajme

Mbrëmja e “Duelit Sportiv” përfundon me incident në mes të Liridon Lecit dhe Edonisa Aliut

Televizioni Dukagjini ka njoftuar ndërprerjen e menjëhershme të bashkëpunimit me panelistin Liridon Leci, pas një incidenti që ka ndodhur të dielën mbrëma, pas përfundimit të emisionit “Dueli Sportiv”.

Sipas reagimit të televizionit, incidenti ka ndodhur mes Lecit dhe mysafires së emisionit, ish-futbollistes Edonisa Aliu.

Drejtori i Informacionit në TV Dukagjini, Dibran Istrefi, ka bërë të ditur përmes një njoftimi në rrjetin social Facebook, se vendimi është marrë pas shqyrtimit të rrethanave të rastit.

Televizioni ka theksuar se situata të tilla janë të papranueshme, ndërsa ka bërë të ditur se me rastin po merren organet e rendit dhe të drejtësisë.

TV Dukagjini ka shprehur gatishmërinë për bashkëpunim të plotë me organet përkatëse, të cilat pritet të sqarojnë rrethanat e incidentit.

Lajme

“Ballistët” formojnë strukturën e re organizative!

Tifogrupi i Shkëndijës ka formuar sonte strukturën e re organizative, pas mbledhjes së mbajtur më 4 tetor. Kryesia e ngushtë do të përbëhet nga 6 anëtarë, ndërsa për kryetar është zgjedhur Shaban Zeneli.

Kryesia e re do të ketë përkrahjen edhe të një grupi punues, i cili do të funksionojë si strukturë më e gjerë në mbështetje të kryesisë dhe tifogrupit.

Organizimi i parë i këtij kapitulli të ri do të jetë të dielën, më 11 tetor, në udhëtimin për ndeshjen Shkëndija e Haraçinës – Shkëndija, që do të zhvillohet në stadiumin e Çairit.

Lajme

Shkëndija dhe Universiteti i Tetovës bashkojnë sportin me dijen

KF Shkëndija dhe Universiteti i Tetovës kanë nënshkruar Memorandum Bashkëpunimi, duke formalizuar një bashkëpunim të ri institucional, me synim lidhjen më të ngushtë mes sportit, arsimit dhe shkencës, si dhe krijimin e mundësive konkrete për zhvillimin e të rinjve.

Memorandumi është nënshkruar në Tetovë nga Drejtori Ekzekutiv i KF Shkëndijës, Valdrin Uka, dhe Rektori i Universitetit të Tetovës, Prof. Dr. Kushtrim Ahmeti. Marrëveshja parasheh bashkëpunim në disa fusha, duke nisur nga praktika profesionale e studentëve pranë strukturave të klubit, deri te ligjëratat, seminaret dhe punëtoritë praktike me ekspertë të të dyja institucioneve.

Një fokus i rëndësishëm i marrëveshjes është edhe kërkimi shkencor dhe testimet sportive, ku kapacitetet akademike dhe laboratorike të Universitetit të Tetovës mund të kontribuojnë në monitorimin dhe zhvillimin e performancës së futbollistëve, përgatitjes fizike, rikuperimit dhe metodologjive bashkëkohore të stërvitjes.

Bashkëpunimi hap gjithashtu mundësi për projekte të përbashkëta vendore dhe ndërkombëtare, përfshirë Erasmus+ Sport, organizimin e konferencave dhe aktiviteteve sportive, si dhe mbështetjen e futbollistëve të rinj të Shkëndijës në ndjekjen e studimeve universitare përmes konceptit të karrierës së dyfishtë.

Memorandumi, i cili është i vlefshëm për një periudhë trevjeçare, krijon bazën për iniciativa dhe projekte të reja që mund të konkretizohen në vazhdim, me zhvillimin e sportit, dijes dhe gjeneratave të reja në qendër të këtij bashkëpunimi.