Komuna e Bërvenicës, ku sipas regjistrimit të fundit shqiptarët përbëjnë rreth 54% të popullsisë, ndërsa maqedonasit 45%, të dielën, më 18 tetor, do të zgjedhë kryetarin e ri në zgjedhjet e parakohshme lokale.

Zgjedhjet mbahen pas vdekjes së papritur të kryetarit Jovica Ilievski në qershor të këtij viti.

Në bllokun politik shqiptar, gara zhvillohet ndërmjet kandidatëve të VLEN-it dhe BDI-së, ndërsa në fletëvotim është edhe një kandidate e pavarur shqiptare.

Koalicioni VLEN garon me Jakup Huseinin, magjistër i shkencave juridike dhe nëpunës në administratën komunale. VLEN thekson se përvoja e tij institucionale i mundëson të fillojë menjëherë punën.

Nga ana tjetër, BDI-ja dhe koalicioni AKI kanë kandiduar Arkin Jahiji, jurist dhe këshilltar shtetëror në Ministrinë e Drejtësisë. Jahiji në fushatën e tij ka theksuar bashkimin e qytetarëve dhe tejkalimin e ndarjeve në komunë.

Në garë merr pjesë edhe kandidatja e pavarur Arife Idrizi, e cila synon mbështetjen e votuesve jashtë blloqeve kryesore partiake.

Ndërkohë, në bllokun maqedonas, VMRO-DPMNE garon me Stojançe Radiçeskin, i cili premton vazhdimin e projekteve infrastrukturore, ndërsa LSDM-ja me Jovica Radeskin, i cili ka vënë theksin te përkujdesja sociale dhe pensionistët. Kandidat i pavarur është edhe Dushan Bogdanovski.

Kryeministri Hristijan Mickoski ka shprehur mbështetje për kandidatin e VMRO-DPMNE-së dhe ka deklaruar se pret fitore që në raundin e parë.

Në zgjedhjet lokale të vitit 2025, gara në Bërvenicë ishte jashtëzakonisht e ngushtë. Jovica Ilievski fitoi ndaj kandidatit të VLEN-it, Haqim Ramadani, me vetëm 145 vota diferencë në raundin e dytë.

Votimi për personat e sëmurë dhe të pafuqishëm do të zhvillohet të shtunën, ndërsa të dielën vendvotimet hapen në orën 07:00.

Nëse asnjëri nga gjashtë kandidatët nuk siguron shumicën e nevojshme, do të mbahet raundi i dytë pas dy javësh.

Mënyra se si shoferët në Maqedoni paguajnë taksat rrugore mund të ndryshojë. Autoritetet po analizojnë një model të ri për mbledhjen e taksave në Maqedoni, i cili do të zvogëlonte radhët dhe pritjet në pikat e pagesës, dhe tarifa do të llogaritej sipas distancës së përshkuar, apo çmimi të varet nga numri i kilometrave të përshkuara në autostradë. Sistemi i ri po analizohet aktualisht për Korridorin 8 dhe pyetja më e madhe për qytetarët është nëse një ndryshim i tillë do të sjellë kosto më të ulëta apo më të larta udhëtimi. Studimi i ri i fizibilitetit për mbledhjen e taksave rrugore në Korridorin 8, duhet të tregojë nëse taksat rrugore do të mblidhen përmes një sistemi të mbyllur në autostradën nga Shkupi përmes Tetovës, Gostivarit, Kërçovës deri në Ohër, përkatësisht Strugës dhe pikës kufitare Qafëthanë drejt Shqipëri.

Studimi do të përcaktojë nëse kryqëzimet ekzistuese ose të planifikuara të autostradave (hyrje/dalje) janë të përshtatshme për instalimin e një sistemi të mbyllur të mbledhjes së taksave, cilat teknologji të mbledhjes së taksave janë të përshtatshme (manuale, automatike, elektronike, me rrjedhë të lirë)..

Sipas drejtorit të Ndërmarrjes Publike për Rrugët Shtetërore, Koce Trajanovski, analizat e para kanë të bëjnë me rrugën Kërçovë – Ohër, dhe më pas po shqyrtohet mundësia e aplikimit të tij në Korridorin 8 dhe pjesët e autostradës që po ndërtohen nga “Bechtel dhe Enka”. Sistemi i ri do të mbështetej në etiketa elektronike dhe regjistrimin e automjeteve në hyrje dhe dalje të autostradës, me qëllim që të mundësohet pagesa më e shpejtë pa ndalesa të panevojshme. Futja e tij do të kërkojë analiza teknike, përshtatje të infrastrukturës dhe një kornizë të përshtatshme ligjore.

Kjo metodë e tarifimit mund të jetë më e favorshme për shoferët që përdorin vetëm një pjesë të shkurtër të autostradës. Megjithatë, nëse ata do të paguajnë më pak do të varet nga tarifat që do të vendosen përfundimisht.

Ndryshe, të ardhurat nga taksat rrugore përfaqësojnë një burim të rëndësishëm fondesh për infrastrukturën rrugore në Maqedoni. Në gjashtë muajt e parë të vitit 2026, shteti mblodhi një rekord prej 31 milionë euro, nga mbledhja e taksave. Nga mbledhja e taksave vitin e kaluar (deri më 23 dhjetor), u arrit një xhiro prej 67,6 milion euro dhe kjo shifër, duke pasur parasysh frekuencën e shtuar në korrik, gusht dhe shtator, me siguri do të tejkalohet gjatë këtij viti kalendarik. Ndërmarrja Publike për Rrugë Shtetërore informon se stacioni më i shpeshtë i pagesës së taksave është Tetova, ndërsa sipas mjeteve të mbledhura dhe çmimit të biletave, të ardhurat më të larta janë në Romanovcë, pranë Kumanovës, e ndjekur nga Miladinovci, Petrovec, Glumova, Zhelina, Tetova, Stobi, Preod, Gostivari, Sopoti, Gjevgjelia, Kadrifakova, Otovica dhe Demir Kapija.

Pjesa e mbledhjes elektronike të taksave me M-Card dhe M-TAG në qarkullimin total të taksave është 36 përqind, nga një total prej 11 stacionesh pagesash ku është futur në përdorim. (koha.mk)

Edhe këtë të premte Tirana është zgjuar mes valës së protestave të të rinjve, të cilët po protestojnë kundër rritjes së kostove të arsimit dhe korrupsionit dhe kërkojnë dorëheqjen e kryeministrit Edi Rama. Protesta po zhvillohen edhe në qytete të tjera të Shqipërsië si, Lezha, Shkodra, Burreli, Laçi, Elbasani, Korça, Vlora, Gjirokastra, Dibra, dhe Pogradeci. Të rinjtë, gjimnazistë dhe studentë, kanë bojkotuar mësimin dhe kanë dalë në rrugë për të protestuar. Edhe në këto qytete, sikurse në Tiranë, protestat janë zhvilluar në një atmosferë të tensionuar.

Në Lezhë ka pasur tensione mes protestuesve dhe Policisë, ku palët janë përplasur fizikisht dhe ka pasur të lënduar policë dhe një protestuese. Në drejtim të një gjimnazi janë hedhur gurë. Më pas, Policisë i është dhënë urdhër të tërhiqet dhe të shmangë përplasjet me të rinjtë.

Në Tiranë protestuesit janë grumbulluar para Ministrisë së Arsimit ku ka nisur përplasja me policinë.

Ndërkaq, kryeministri Edi Rama ka reaguar nga një prej kioskave të djegura në qendër të Tiranës, Rama përsëriti dhe njëherë, se kjo nuk është dorë e studentëve. Ai tha se, ata që fshihen pas këtij kaosi, po i rrezikojnë jetën të miturve, duke i maskuar e nxitur drejt dhunës e shkatërrimit.

Edi Rama, Kryeministër i Shqipërisë

“Këta nuk janë studentët, as ata që marrin peng qytetin gjatë ditës nuk janë studentët, e as ata që në mbrëmje predikojnë lëvizjen, përpjekjen, revoltën studentore s’kanë të bëjnë me ju. Si mund të nxirren të miturit në rrugë, si mund të nxiten të miturit të vënë maska, të shkulin trotuarët që mirëmbahen përditë me taksat tuaja dhe të qëllojnë policinë. Si mund të rrezikohet jeta e të miturve duke u hedhur në rrugë për agjentë të tjerëkujt”.

Që nga 13 tetori, protestat e studentëve janë shoqëruar me përplasje me Policinë, djegie dhe dëmtime të pronës publike e private. Policia ka ndërhyrë me gaz lotsjellës dhe ujë me presion për t’i shpërndarë turmat dhe për të vënë situatën nën kontroll.