Lajme
Ansambli i këngëve dhe valleve “Bajram Shabani” sot kremton 79 vite të shndritshme nga themelimi
Ansambli i këngëve dhe valleve “Bajram Shabani” nga Kumanova organizon koncert me moton “79 Vjet Art, Kulturë, Traditë”. Koncerti do të mbahet sonte me fillim nga ora 18:00 në Pallatin e Kulturës në Kumanovë në vigjilje të Festave të Nëntorit, një periudhë krenarie dhe kujtese për rrënjët tona, njofton Portalb.mk.
Ky ansambël, i formuar 79 vite më parë nga përkushtimi i intelektualëve dhe kulturdashësve të Kumanovës, u bë i pari ansambël shqiptar në trojet tona, duke e nderuar e lartësuar kulturën tonë. Me përkushtim të pandalshëm, ai vazhdon edhe sot, duke ruajtur dhe përcjellë me krenari kulturën, artin dhe traditat tona shekullore.
Driton Ramadani, drejtor i Ansamblit i këngëve dhe valleve “Bajram Shabani” nga Kumanova për Portalb.mk tha se fton të gjithë artëdashësit të jenë pjesë e këij koncerti madhështorë, sepse sa më shumë publik edhe artistët do të ndahen më të kënaqur.
“Zakonisht ne në përvjetorët e shoqërisë marrim pjesë vet, d.m.th. gjitha seksionet e ansamblit, duke filluar prej grupit të fëmijëve, veteranët, grupi folklorik dhe muzika popullore me orkestër. Programi nuk do të jetë shumë i ngjeshur por do të ketë pika artistike të cilat janë të zgjedhura prej drejtorit artistik Ilir Latifi”, tha Ramadani.
Se sa është e vështirë për ta mbajtur kaq kohë të gjatë një ansambël në skenë Ramadani edhe më tej shton:
“Ansambli “Bajram Shabani” është themeluar në vitin 45, dhe nga historiatet të cilat i kemi parë edhe nga ansamblet e tjera, është një ndër ansamblet më të vjetra, të të gjitha trevave shqiptare.
Ky ansambël ka pasur edhe rritjet dhe uljet e tij në këtë jetëgjatësi, për shkak edhe të situatave të ndryshme politike, por për shkak të angazhimit të njerëzve, normal janë në këto ansamblet që punohet me vullanterizëm. Por duke pasur parasyshë që në një kohë kur kanë qenë sistemet tjera shoqërore normalisht që ka pasur edhe vështirësitë e veta. Kohët e fundit ky ansambël ka një rritje të mirë falë aktivistëve dhe profesionistëve të cilët po merren me shumë shumë e lanë, dita ditës sa vjen e shtohet numri i antarëve, dhe të valltarëve. Mund të them lirisht që ky është një ndër ansamblet më të organizume, për momentin në të gjitha trevat shqiptare për shkak se në vete ngërthen të gjitha seksionet, seksionin folklorik, veteranët e valles burimore, por edhe kemi edhe vallet e përpunuara të cilët punojnë në dy grupe, grupi i fëmijëve dhe grupi i parë. Qershia mbi tortë janë edhe orkestra dhe këngëtarët e muzikës popullore”, theksoi Ramadani.
Në kuadër të manifestimit, do të zhvillohet një përkujtim memorial për doajenin e paharruar të muzikës kumanovare Luan Rushitit. Ky personalitet i shquar do të mbetet gjithmonë si një shembull i shkëlqyer i përkushtimit ndaj artit dhe kulturës sonë. Me kontributin e tij të vyer, ai ka lënë një trashëgimi të pasur që vazhdon të na frymëzojë dhe të mbajë gjallë traditat tona.
Ky koncert mbështetet nga Ministria e Kulturës së RMV-së, nga Komuna e Kumanovës dhe disa donatorë të tjerë.
Lajme
Në ditën e parë u shitën mbi 24.5 milionë kopje të GTA 6, 2.36 miliardë dollarë të ardhura
Pas 13 vitesh pritje, videoloja e shumëpritur Grand Theft Auto 6 (GTA 6) ka debutuar me një sukses të jashtëzakonshëm tregtar. E publikuar më 19 nëntor, loja ka arritur të kthehet brenda pak orësh në një nga lançimet më të mëdha në historinë e industrisë së argëtimit.
Sipas vlerësimeve paraprake të kompanisë analitike Sensor Tower, shitjet e GTA 6, duke përfshirë edhe porositë paraprake, kanë kaluar 24.5 milionë kopje. Të ardhurat vlerësohen në rreth 2.36 miliardë dollarë.
Nëse këto shifra konfirmohen, GTA 6 do të regjistrojë një nga debutimet më të mëdha tregtare të të gjitha kohërave. Kompania mëmë Take-Two Interactive dhe zhvilluesi Rockstar Games nuk kanë publikuar ende shifra zyrtare të shitjeve, por e kanë përshkruar kërkesën për lojën si të paprecedentë.
Sipas agjencisë Reuters, vlerësimet e Sensor Tower tregojnë se GTA 6 ka shitur pothuajse trefishin e kopjeve që kishte shitur paraardhësi i tij, GTA 5, gjatë 24 orëve të para të publikimit në vitin 2013.
Të ardhura sa një superprodhim hollivudian
Përmasat e suksesit bëhen edhe më të dukshme kur krahasohen me industrinë e filmit. Sipas të dhënave të cituara në raport, filmi Spider-Man: Brand New Day ka grumbulluar rreth 2.5 miliardë dollarë nga shitja e biletave në kinematë botërore.
GTA 6 ka arritur t’i afrohet kësaj shifre që në ditën e parë të publikimit, duke përfshirë edhe porositë paraprake.
Ndërkohë, kompania kërkimore e tregut Niko Partners parashikon se të ardhurat nga loja mund të kalojnë 3 miliardë dollarë deri në fund të vitit 2026.
Miliona lojtarë në pritje, rekord edhe në trafikun e internetit
Publikimi i GTA 6 ka shkaktuar një mobilizim të jashtëzakonshëm të lojtarëve në mbarë botën. Shumë prej tyre kanë qëndruar zgjuar gjatë natës për të nisur menjëherë aventurën e re, ndërsa të tjerë kanë planifikuar të marrin pushim nga puna për t’i kushtuar më shumë kohë lojës.
Interesi masiv është reflektuar edhe në trafikun e internetit. Në Britaninë e Madhe, operatori Virgin Media O2 ka regjistruar nivele rekord të transferimit të të dhënave, për shkak të shkarkimeve dhe instalimeve paraprake të lojës.
GTA 6 zë rreth 212 GB hapësirë, çka kërkon një sasi të konsiderueshme të dhënash për shkarkim dhe instalim.
Një nga videolojërat më të shtrenjta në histori
Pas këtij projekti qëndron një investim gjigant. Kostoja e zhvillimit të GTA 6 vlerësohet të ketë kaluar 1 miliard dollarë, shifër që, nëse konfirmohet, do ta rendiste atë ndër videolojërat më të shtrenjta të prodhuara ndonjëherë.
Rockstar Games ka punuar për më shumë se një dekadë për të sjellë pasardhësin e GTA 5, i cili u publikua në vitin 2013 dhe u shndërrua në një prej lojërave më të suksesshme komerciale të të gjitha kohërave.
Ngjarjet e lojës zhvillohen në Leonida, një shtet imagjinar i frymëzuar nga Florida, ndërsa qendra kryesore e historisë është Vice City, e ndërtuar mbi modelin e Majamit.
Protagonistët janë Lucia dhe partneri i saj Jason, dy personazhe të përfshirë në botën e krimit, grabitjeve dhe ndjekjeve të rrezikshme. Loja ndërthur aksionin me satirën sociale, duke trajtuar kulturën amerikane dhe anën e errët të ëndrrës amerikane.
Rockstar ka ende dy burime të mëdha të ardhurash
Pavarësisht suksesit të jashtëzakonshëm të ditëve të para, potenciali tregtar i GTA 6 mund të rritet edhe më tej.
Për momentin, loja është e disponueshme për PlayStation 5 dhe Xbox Series X|S. Ende nuk është njoftuar një datë zyrtare për versionin e kompjuterëve, ndërsa pritet edhe prezantimi i modalitetit online, ku lojtarët do të mund të ndërveprojnë dhe të zhvillojnë misione së bashku përmes internetit.
Përvoja e GTA 5 tregon rëndësinë që mund të ketë kjo pjesë e lojës. GTA Online u shndërrua në një burim të rëndësishëm të ardhurash për kompaninë, përmes blerjeve virtuale, automjeteve luksoze, pronave dhe përmbajtjeve të tjera shtesë.
Kufizime në disa tregje
Përmbajtja e lojës, e cila përfshin skena të dhunshme dhe materiale të destinuara për të rritur, ka sjellë edhe kufizime në disa tregje ndërkombëtare.
Në Japoni janë raportuar ndërhyrje për përshtatjen e përmbajtjes me rregullat vendase, ndërsa në Kinën kontinentale loja nuk ka marrë miratimin për shitje zyrtare.
Megjithatë, këto kufizime nuk duket se kanë ndikuar në interesin e jashtëzakonshëm global.
Me më shumë se 24.5 milionë kopje të shitura sipas vlerësimeve paraprake dhe të ardhura që kapin rreth 2.36 miliardë dollarë, GTA 6 po vendos një standard të ri për industrinë e videolojërave. Për Rockstar Games, debutimi i 19 nëntorit mund të jetë vetëm fillimi i një suksesi që pritet të vazhdojë edhe në vitet e ardhshme.
Lajme
Era e fuqishme në Tetovë dhe Pollog! Rreth 15 intervenime, pa të lënduar
Erërat e fuqishme që përfshinë mbrëmë Tetovën dhe rajonin e Pollogut shkaktuan dëme të shumta materiale. Pemë të rrëzuara, kulme të dëmtuara, rrugë të bllokuara dhe ndërprerje të energjisë elektrike në disa vendbanime. Ekipet e zjarrfikësve intervenuan në rreth 15 raste, ndërsa në terren gjatë gjithë natës ishin edhe ekipet e ndërmarrjes publike komunale për largimin e pemëve dhe degëve të rrëzuara.
“Patëm rreth 15 intervenime, dy zjarre, disa kulme të rrëzuara, rrugë të bllokuara, si dhe shtylla elektrike të dëmtuara. Kemi intervenuar në të gjitha rastet dhe situatën e kemi pasur nën kontroll. Fatmirësisht, nuk kemi persona të lënduar”, deklaroi Avni Ameti, shef i NjTKZ Tetovë.
Komuna e Tetovës u ka bërë apel qytetarëve që të kenë kujdes gjatë motit të lig dhe të shmangin lëvizjet e panevojshme. Deri më tani, në Komunë nuk është paraqitur asnjë kërkesë zyrtare për kompensimin apo evidentimin e dëmeve.
“Komuna e Tetovës mbrëmë doli me apel për qytetarët që të kenë kujdes dhe të shmangin lëvizjet gjatë erërave të fuqishme. Deri më tani nuk kemi pasur denoncime nga banorët për dëmet materiale, por nëse paraqiten raste të tilla, Komuna së bashku me inspektoratin do të dalë në terren për verifikimin e tyre dhe marrjen e masave të nevojshme”, deklaroi Besarta Ramadani, zëdhënëse e Komunës së Tetovës.
Në polici është raportuar edhe dëmtimi i një automjeti nga tjegullat e një kulmi në rrugën industriale. Ekipet e SPB Tetovë, zjarrfikësit dhe ndërmarrja publike komunale kanë bashkëpunuar për sigurimin dhe pastrimin e rrugëve. Deri më tani, as në Qendrën për Menaxhim me Kriza nuk janë raportuar dëme më të mëdha materiale. Fatmirësisht, nga të gjitha incidentet nuk ka persona të lënduar.
Lajme
Imer Aliu: PPD, BDI dhe VLEN – emra të ndryshëm, e njëjta filozofi politike!
35 vite pluralizëm, emra të rinj partish, por e njëjta formulë politike: kompromiset për pushtet në kurriz të interesave të shqiptarëve. Kështu e përshkruan përfaqësimin politik shqiptar në Maqedoninë e Veriut, Imer Aliu, përfaqësues i lartë i PDSH-së.
Sipas Aliut, nga PPD-ja te BDI-ja dhe VLEN-i, partitë kanë ndryshuar emrat, por jo filozofinë politike, duke e vendosur qëndrimin në pushtet mbi interesat e shqiptarëve.
Ai thekson se PDSH-ja ka përfaqësuar një koncept tjetër, të bazuar në dinjitetin kombëtar, barazinë politike dhe refuzimin e nënshtrimit për interesa pushteti.
“Sa herë duhet të ndryshojnë emrat e partive që më në fund të kuptoni se po votoni për të njëjtin model politik?”, pyet Aliu.
-
Lajme12 months agoZbulohet Identiteti i Personit Të Vrarë Në Tetovë
-
Lajme2 years agoDetaje nga ngjarja tronditëse në Tetovë: Burri vrau gruan dhe vajzën 4 vjeçe, pastaj qëlloi djalin 9 vjeç dhe veten e tij
-
Lifestyle3 years agoTrashet miqësia me maqedonë në familjen e Adelina Tahirit
-
Lajme3 years agoKëto ministri dhe poste zv ministrash do ti takojnë VLEN-it
-
Lajme12 months agoAplikacion që zbulon kamerat radar, shoferët e shkarkojnë masivisht
-
Lajme3 years agoJa kush janë 13 deputetët e koalicionit “VLEN” (Lista)
-
Lajme3 years agoBurrin e Shkurte Fejzës e godet vetura (PAMJE)
-
Lajme1 month agoÇmimi i naftës shënon rënie
