Lajme

Shkupi sërish ndër të parët për ndotje, LSDM akuzon Qeverinë

Zëdhënësja e LSDM-së, Bogdanka Kuzeska iu drejtua kryeministrit Hristian Mickosit, duke thënë se gjatë kohës sa ai ishte në opozitë premtoi mbi 1 miliard euro investime për mbrojtjen e mjedisit si dhe premtoi uljen e ndotjes deri në 50%. Ajo pyeti se ku ka mbetur tani miliardi i shpallur për të luftuar ndotjen. Ajo tutje shtoi se Shkupi për disa ditë me radhë është ndër qytetet më të ndotura në botë, ndërsa qytetarët e qyteteve të tjera të vendit thithin ajër të ndotur.

Bogdanka Kuzeska, zëdhënëse e LSDM-së

“VMRO-DPMNE kur kërkoi besimin e qytetarëve premtoi luftë aktive kundër ndotjes së ajrit. Në programin e VMRO-DPMNE, Platforma 1198, thuhet se citoj, përcaktimet prioritare programore të Qeverisë së udhëhequr nga VMRO DPMNE në fushën e mbrojtjes së mjedisit do të jetë: Plani për sigurimin e ajrit të pastër për të gjithë! ‘Ky është një tjetër zhgënjim, një tjetër premtim i parealizuar i Mickoskit”. “Qytetarët shohin se qeveria dhe kryetarët e komunave nga VMRO-DPMNE nuk po bëjnë asgjë për ajrin e ndotur’.

Zëdhënësja Kuzeska po ashtu kujtoi se “gjatë mandatit të LSDM-së janë marrë një sërë masash, duke filluar nga investimet strategjike në gazifikimin, projektet për transport publik ekologjik, e duke përfunduar me masa specifike për financimin e zëvendësimit të sistemeve joekologjike në amvisëri, institucionet publike, kopshtet si dhe shkollat”.

Bogdanka Kuzeska, zëdhënëse e LSDM-së

“Gjatë qeverijes në Qytetin e Shkupit janë blerë 33 autobusë ekologjikë, janë bërë gjelbërim i ri në sipërfaqe 300.000 m2 dhe janë mbjellë mbi 20.000 pemë dhe fidane të reja. Në shkollat e mesme dhe fillore u vendosën fasada energjetike dhe pastrues ajri, u ndërruan kaldaja për ngrohje në ndërtesat shtetërore dhe shkolla”.

Tutje Kuzeska tha se me ardhjen e VMRO-DPMNE-së në pushtet nuk po bëhet asgjë, si dhe thekson duke thënë se edhe “deponitë nuk janë pastruar, mbeturina ka në çdo hap, dhe se nuk shohim asnjë projekt mjedisor apo masa për uljen e ndotjes”. Kuzeska shton duke thënë se VMRO-DPMNE nuk duhet që ta anashkalojë këtë çështjë dhe se duhet që menjëherë të marrë masa kundër ndotjes.

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.

Lajme

Ministri i Shëndetësisë: Uji në Gostivar ende nuk është i sigurt

Ministri i Shëndetësisë, Sasho Klekovski, gjatë vizitës në Spiatalin Special për Sëmundjet e Mushkërive dhe Tuberkulozin në Leshkë të Tetovës bëri të ditur se situata me helmimin nga uji në Gostivar po përmirësohet dhe se kriza ka hyrë në një fazë qetësimi. Sipas të dhënave të fundit, numri i personave që kërkojnë ndihmë mjekësore është ulur ndjeshëm. Gjatë ditës janë regjistruar 80 raste të reja, që është rreth dy herë më pak krahasuar me ditët paraprake, ndërsa numri i përgjithshëm i të prekurve arrin rreth 4 mijë persona. Ministria e Shëndetësisë dhe institucionet kompetente tashmë kanë nisur një analizë të plotë epidemiologjike, me qëllim përcaktimin e saktë të zhvillimit të situatës dhe ndarjen e rasteve të shkaktuara nga epidemia prej rasteve të zakonshme të gastroenteritit. Megjithëse numri i pacientëve është në rënie, uji nga rrjeti i ujësjellësit të Gostivarit ende nuk lejohet të përdoret as për qëllime teknike, pasi analizat e fundit kanë treguar nivel të pamjaftueshëm të klorit.

SASHO KLEKOVSKI, MINISTËR I SHËNDETËSISË

“Siguria e ujit vlerësohet edhe përmes sasisë së klorit që përmban ai, por ende nuk është arritur niveli i kërkuar. Aktualisht po kryhen analiza të vazhdueshme në disa pika të ndryshme dhe, sapo klorinimi të arrijë nivelin e duhur, do të jepet leja për përdorimin e ujit teknik”.

Duke iu referuar informacioneve se edhe uji në Leshkë është i papërshtatshëm për konsum dhe nuk duhet të pihet, Klekovski tha se kjo situatë nuk është e re dhe nuk është mbajtur e fshehtë. Sipas tij, problemi në këtë zonë vazhdon prej më shumë se një dekade.

SASHO KLEKOVSKI ,MINISTËR I SHËNDETËSISË

“Gjatë kësaj jave pritet të kryhen dy testime për të vërtetuar se uji nga ujësjellësi nuk do të jetë më vetëm për përdorim teknik, por do të jetë i përshtatshëm edhe për pije, si për spitalin ashtu edhe për të gjithë banorët e zonës”.

Ndërkohë, ditët e fundit nga opozitarja LSDM kanë deklaruar se rasti i Gostivarit nuk është një rast i izoluar, por pasqyron dobësi sistemore dhe mungesë efikasiteti të institucioneve. Duke u thirrur në një raport të siguruar nga sinjalizues, kryetari i LSDM-së, Venko Filipçe, deklaroi se uji në Spitalin Special për Sëmundje të Mushkërive dhe Tuberkuloz në Leshkë ka qenë i ndotur. Ai kërkoi kontroll të jashtëzakonshëm urgjent dhe analiza të të gjitha sistemeve të furnizimit me ujë në vend. /SHENJA/

Lajme

2 turke arrestohen pasi i sulmuan policët në “Bit Pazar” të Shkupit

Më 24.07.2026 në orën 23:40, në zonën e Bit Pazarit, nëpunës policorë nga Stacioni Policor Bit Pazar i privuan nga liria B.D. (23) dhe E.D. (54), të dyja nga Turqia me qëndrim të rregulluar në Shkup, për shkak se kanë sulmuar fizikisht nëpunës policorë të cilët kanë kryer veprime zyrtare.

Të dy u ndaluan në stacion policor dhe pas dokumentimit të plotë të rastit kundër tyre do të ngrihet kallëzim përkatës.