Lajme

Bujar Osmani i reagon Kurtit: Skandaloze, e pafalshme, po inkurajon Gjykatën Kushtetuese të RMV-së

“Skandaloz, i dëmshëm dhe i pabazuar në fakte…inkurajimi që zoti Kurti i dha Gjykatës Kushtetuese [së Maqedonisë së Veriut] është i pafalshëm”.

Ky është vështrimi i ish-Ministrit të Punëve të Jashtme të Maqedonisë së Veriut, Bujar Osmanit, ndaj vlerësimit të Kryeministrit të Kosovës, Albin Kurti, se nuk bëhet fjalë për rrezikim të përdorimit të gjuhës shqipe në Maqedoni të Veriut.

“Jo, nuk po rrezikohet”, tha prerazi Kurti, pyetur për këtë shqetësim tashmë të ngurtësuar në diskursin publik; ndërsa tha se në Maqedoni të Veriut “nuk ka ligj për gjuhën shqipe por, për gjuhët”.

“Ekziston ligji që përmend shifërn 20%, por ai nuk është ligj për shqipen, por përdorimin e gjuhëve. Në anën tjetër, besoj që duhet të gjithë të presim për një vendim të drejtë të Gjykatës Kushtetuese atje, i cili nuk bën as përjashtime dhe as diskriminim dhe i cili e respekton shumëgjuhësinë atje”, tha Kurti.

Enkapsulimin mohues Kurti e dha kështu: “Në Repbulikën e Maqedonisë së Veriut nuk mund të thuhet se shqipja ka qenë gjuhë zyrtare e tash po u rrezikohet”.

Për ish-kryediplomatin shqiptar në Maqedoni të Veriut, ajo çfarë ka bërë Kurti në këto deklarime është “inkurajum i Gjykatës Kushtetuese” për të shfuqizuar nene të Ligjit mbi Përdorim e Gjuhëve.

E kjo, tha Osmani, “është e pafalshme”.

“Vlerësimi ishte skandaloz, i dëmshëm dhe i pabazuar në fakte. Gjuha shqipe është gjuhë zyrtare dhe e garantuar me Kushtetutë dhe ligj. Ky ligj u miratua 15 vite pas Marrëveshjes së Ohrit, pasi ishte një nga pikat më të kontestuara dhe të vështira të marrëveshjes”, tha Osmani në një përgjigje me shkrim për Nacionale.

“Pala maqedonase kishte vlerësuar se gjuha shqipe duhej të ishte zyrtare vetëm në komuna, ndërsa pala shqiptare kishte këmbëngulur që gjuha shqipe të ishte zyrtare në nivel shtetëror. Sot, me miratimin e ligjit, është e qartë se ky është ligji që përcakton përdorimin e gjuhës shqipe (…)”

“(…) nga vula e Presidentit të shtetit deri te çdo dokument shtetëror dhe publik, të cilat janë në dy gjuhë. Anulimi, madje edhe i një presjeje të këtij ligji, do ta bënte atë të pavlefshëm”, na tha Bujar Osmani.

“Inkurajimi që zoti Kurti i dha Gjykatës Kushtetuese për të abroguar nene të këtij ligji është i pafalshëm. Prekja e gjuhës shqipe është gozhda e fundit në arkivolin e Marrëveshjes së Ohrit”, përfundoi Bujar Osmani.

Për të demantuar Kurtin se “nuk ka ligj të gjuhës shqipe” dhe “nuk ka gjuhë zyrtare shqipe” në rend të parë, Osmani na referon në Ligjin për Përdorimin e Gjuhëve ku tekstualisht shkruhet e kundërta.

“Gjuhë tjetër që flasin së paku 20 e qytetarëve (gjuha shqipe) gjithashtu është gjuhë zyrtare dhe alfabeti i saj, në pajtim me këtë ligj”, thuhet në Nenin 1, pika 2.

Lajme

27 vjet nga marrëveshja e Kumanovës

Sot bëhen 27 vjet nga nënshkrimi i marrëveshjes ushtarako-teknike të Kumanovës, me të cilin iu dha fund luftës në Kosovë, duke u dorëzuar ish-ushtria e Jugosllavisë dhe kapitullimi i kriminelit Sllobodan Millosheviq.

Me këtë marrëveshje, Serbia është detyruar të tërheqë të gjitha forcat e saj policore dhe ushtarake nga Kosova. Marrëveshjen e Kumanovës, ndërmjet NATO-s dhe RFJ-së, e nënshkruar më 9 qershor 1999, hyri në fuqi më 11 qershor 1999. Atë e nënshkruan Michael Jackson, komandanti i parë i KFOR-it në Kosovë, dhe ish-shefi i Shtabit të Armatës serbe, gjenerali Nebojsha Pavkoviq, i akuzuari i Hagës për krime lufte dhe gjenocid.

Marrëveshja është arritur pas fushatës së bombardimeve të NATO-s mbi caqet serbe, e cila ka zgjatur për 78 ditë me radhë, si dhe pas përpjekjeve të ndryshme diplomatike për t’i dhënë fund luftës në Kosovë, gjatë të cilës mbi 10 mijë njerëz janë vrarë, rreth 5 mijë të tjerë të zhdukur dhe mbi 1 milion shqiptar të zhvendosur. Shkatërrimet materiale po ashtu kanë qenë masive.

Ndër të tjera në marrëveshje parashihej:

c) që nga Kosova të largohen të gjithë personat dhe organizatat me aftësi militare duke përfshirë armatën e rregullt dhe forcat e marinës, civilë të armatosur, paramilitarë, forcat ajrore, garda kombëtare, policia kufitare, rezervistët, policia ushtarake, shërbimet informative, MUP-it, policia lokale, speciale, antirebeliste, antiterroriste dhe çdo grup i përcaktuar kështu nga KFOR-i.

d) u caktua një zonë sigurie ajrore 25 kilometra përtej kufirit të Kosovës

e) u caktua një zonë 5 kilometrash përtej kufirit me RFJ-në që nuk guxonte të vendosen armatimet e rënda dhe ushtria, përveç ushtarët kufitarë.

Më 12 qershor të vitit 1999, në Kosovë kanë zbarkuar trupat e para të këmbësorisë së NATO-s, ndërsa ka nisur largimi i forcave serbe.

Sekretari i përgjithshëm i NATO-së, Havijer Solana, më 10 qershor 1999 kishte lëshuar urdhrin për ndalimin e bombardimit dhe Këshilli i Sigurisë së OKB-së miratoi rezolutën 1244, ku u dërguan 37.200 ushtarë të KFOR-it nga 36 shtete.

Misioni ishte i ndarë në pesë zona të përgjegjësisë, që i përkisnin KFOR-it amerikan, anglez, francez, gjerman dhe italian.

Me hyrjen e NATO-s, në Kosovë ka nisur edhe vendosja e misionit të përkohshëm të Organizatës së Kombeve të Bashkuara, i cili do të administronte vendin për një periudhë të caktuar kohore.

Në të njëjtën kohë, është shpërbërë edhe Ushtria Çlirimtare e Kosovës, për t’u shndërruar në Trupat Mbrojtëse të Kosovës.

Lajme

Mbi 1,600 gra të lindura në Maqedoni të Veriut lindën foshnje në Gjermani vitin e kaluar

Numri i përgjithshëm i shtetasve të RMV-së të regjistruar si të huaj që jetojnë në Gjermani deri në dhjetor të vitit të kaluar ishte 161.120, që është 2.000 më shumë se në vitin 2024, kur ky numër ishte 158.995.

Nga viti 2015 deri në vitin 2025, numri i qytetarëve të RMV të regjistruar si të huaj në Gjermani është rritur me më shumë se 65,000.

Statistikat tregojnë se vetëm vitin e kaluar në Gjermani kanë lindur 1.620 të porsalindur, të cilët, sipas klasifikimit statistikor gjerman, kanë nëna që kanë lindur në Maqedoni të Veriut.

Gjermania mbetet një nga destinacionet më të dëshirueshme për qytetarët e RMV-së që kërkojnë mundësi më të mira ekonomike, të ardhura më të larta dhe një të ardhme më të sigurt për fëmijët e tyre. Mijëra qytetarë të RMV-së janë zhvendosur atje vitet e fundit dhe disa prej tyre tashmë po krijojnë familje dhe po bëhen prindër, gjë që kontribuon në rritjen e numrit të fëmijëve të lindur në maternitetet gjermane nga prindër me origjinënga RMV-ja.

Lajme

Pesëvjeçari nga Gostivari u helmua me barna, dërgohet në Klinikën e Pediatrisë

Më 8 qershor 2026, rreth orës 18:40, në Stacionin Policor të Gostivarit është raportuar se në Repartin e Pediatrisë ishte pranuar një fëmijë pesëvjeçar nga fshati Çegran, i cili kishte pësuar helmim nga barnat.

Sipas informacioneve fillestare, fëmija ka rënë në kontakt me barna të lëna në një vend të arritshëm dhe i ka gëlltitur ato. Pas marrjes së ndihmës së parë mjekësore, ai është transportuar në Klinikën e Fëmijëve në Shkup për trajtim dhe ekzaminime të mëtejshme.

“Më 08.06.2026 në ora 18:40 në Stacionin Policor Gostivar është
raportuar se në Repartin e Pediatrisë, për shkak të helmimit me barna,
është sjellë një fëmijë pesëvjeçar nga fshati Çegran i Gostivarit. Sipas
raportimit, fëmija ka rënë në kontakt me barna që ishin lënë në një vend
të arritshëm dhe i ka gëlltitur ato. Fëmija është transportuar në Klinikën
e Fëmijëve në Shkup për kujdes dhe ekzaminime të mëtejshme”, thuhet në njoftimin e policisë.