Lajme

Mickoski: Në Shkup edhe në të ardhmen do të luhet “Shota”

Kryeministri i Maqedonisë së Veriut, Hristijan Mickoski tha se askush në Maqedoni nuk është kundër gjuhës shqipe. Pozicioni i shqiptarit në vendin e tij, thotë ai, është një temë artificiale që mundohen ta imponojnë individët.

“Më besoni, kjo nuk është shqetësuese, askush nuk është kundër gjuhës shqipe. Përkundrazi. Kjo është një temë artificiale. Kjo nuk është një temë që e pengon dikë apo jo, kjo është një temë që hijet e së kaluarës po mundohen ta imponojnë sepse nuk kanë temë tjetër”, tha Mickoski, në një intervistë për “RTK” të Kosovës .

Ai ka thënë se Ligji për Përdorimin e Gjuhëve ka pesë vite që është në sirtar të Gjykatës Kushtetuese dhe se pikërisht gjatë mandatit të qeverisë së tij, kjo temë është sërish në rend dite.

Ai tha se përdorimi i gjuhës shqipe në Maqedoni nuk është i kërcënuar.

Kryeministri Mickoski gjithashtu tha se “jemi të bashkuar si qytetarë në dallimet tona”.

“Në Shkup është luajtur edhe vallja “Shota” dhe “kolo serbe”, “çyçeku turk” dhe vallja maqedonase “Teshkoto”. Do të ketë edhe në të ardhmen. Ne jemi të bashkuar në dallimet tona. Sa të jem unë në krye të Qeverisë, do të luajmë me atë që do të na bashkojë dhe nuk do të na ndajë. Kështu është shteti dhe ne jemi të bashkuar në diversitet”, tha Mickoski.

Duke folur për marrëveshjen për kalimet e përbashkëta ndërmjet Kosovës dhe Maqedonisë, Mickoski është pyetur nëse veteranët e UÇK-së do të ndalohen në bazë të fletarresteve nga Serbia, për të cilën ai ka përsëritur se kushdo që nuk ka shkelur ligjet dhe Kushtetutën e Maqedonisë ka të drejtë të hyjnë në vend ose për të qëndruar./Telegrafi/

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!