Lajme

Taravari: Dhënia e çelsit të Prishtinës Ali Ahmetit, ofendim për shqiptarët e Maqedonisë

Kreu i Komunës së Prishtinës, Përparim Rama, i dorëzoi dje “Çelësin e Qytetit” liderit të Bashkimit Demokratik për Integrim, Ali Ahmeti. Ky veprim ka ngjallur reagime të ashpra nga njëri nga krerët e VLEN-it, Arben Taravari, |i cili e ka cilësuar këtë nderim si një ofendim të madh për shqiptarët e Maqedonisë.

Taravari theksoi se ky është një veprim absurd, duke u nisur nga fakti se Ahmeti është shpallur nga Ambasada Amerikane si një person i përfshirë në afera korruptive dhe se ai ka abuzuar me besimin e popullit për më shumë se dy dekada. Ai shtoi se për këto arsye, dhënia e “Çelësit të Qytetit” Ahmetit është një ofendim për shqiptarët e Maqedonisë, që kanë vuajtur nga politika e tij.

“Ali Ahmeti ka keqpërdorur popullin shqiptar për 22 vjet, duke e varfëruar dhe pasuruar të afërmit e tij. Ky është një akt që reflekton papërgjegjshmëri dhe është ofendim për shqiptarët e Maqedonisë”, shkroi Taravari në rrjetet sociale.

Lajme

Ali Ahmeti pret sportistin e ri nga Tetova, Muhammed Dauti

Kryetari i Bashkimit Demokratik për Integrim, z. Ali Ahmeti, sot priti në takim sportistin e ri 12-vjeçar nga Tetova, Muhammed Dauti, i cili ka arritur një sukses të veçantë në paraqitjen e tij të parë në disiplinat Kickboxing & MMA.

Muhammed Dauti u shpall fitues në Garat Ballkanike të Sporteve Marciale, të zhvilluara në Tetovë, duke dëshmuar talentin, disiplinën dhe përkushtimin e tij në këtë fushë sportive.

Gjatë takimit, z. Ali Ahmeti e përgëzoi sportistin e ri për këtë rezultat të rëndësishëm dhe vlerësoi angazhimin e tij, duke theksuar rëndësinë e mbështetjes së të rinjve që me punë, vullnet dhe përkushtim arrijnë suksese dhe bëhen shembull për gjeneratat e reja.

Me këtë rast, Muhammed Dauti shprehu mirënjohjen e tij për pritjen dhe përkrahjen, duke i dedikuar z. Ali Ahmeti medaljen dhe diplomën e tij të parë si shenjë respekti dhe falënderimi për mbështetjen gjatë rrugëtimit të tij.

Ky takim ishte një moment motivimi për sportistin e ri, i cili synon të vazhdojë me përkushtim rrugën e tij sportive dhe të sjellë shumë suksese të tjera për Tetovën dhe vendin tonë.

Urime Muhammed Dautit për këtë arritje dhe suksese të mëtejshme në karrierën e tij sportive!

Ja postimi plotë:

Sot pata kënaqësinë të mirëpres sportistin e ri 12-vjeçar nga Tetova, Muhammed Dauti, i cili ka arritur një sukses të jashtëzakonshëm në paraqitjen e tij të parë në disiplinat Kickboxing & MMA, duke u shpallur fitues në Garat Ballkanike të Sporteve Marciale, të organizuara në Tetovë.

Ky sukses është dëshmi e talentit, përkushtimit dhe punës së palodhur të Muhammedit, si dhe një motivim për të gjithë të rinjtë që merren me sport.

I urova Muhammedit suksese të vazhdueshme në rrugëtimin e tij sportiv, me bindjen se ky është vetëm fillimi i një karriere të ndritur dhe i shumë arritjeve të tjera që do ta bëjnë krenare Tetovën dhe vendin tonë.

Urime për këtë sukses të merituar!

Lajme

Zeqiri: Uji në Tetovë është i pijshëm, qytetarët mund ta konsumojnë lirisht

Pas rastit me ndotjen e ujit në Gostivar, në Tetovë po bëhen çdo ditë analizat e ujit, përcjell TV21. Drejtor i NPK “Sharri”, Valon Zeqiri siguroi se në Tetovë uji është i pijshëm.

“Analizat na tregojnë se uji në Tetovë është i pijshëm dhe nuk ka asnjë problem, prandaj qytetarët mund ta konsumojnë lirisht”, tha mes tjerash Zeqiri.

Lajme

Një grua e moshuar është lënduar nga rënia e një peme në Karposh

Më 20.7.2026 në orën 20:25, SPB Shkup ka marrë njoftim se në zonën e Karposhit ka rënë një pemë dhe K.M. (86) nga Shkupi ka pësuar lëndime të rënda trupore, pas së cilës është transferuar në Institucionin Shëndetësor Publik “Shën Naumi i Ohrit” për ndihmë mjekësore.

Gjithashtu, një qytetar ka raportuar se, gjatë kërkimit të çantës së gruas së lënduar, ka gjetur një mjet shpërthyes, i cili më vonë është marrë nga vendi i ngjarjes për veprime të mëtejshme.

Prokurori publik është njoftuar dhe po merren masa për sqarim të ngjarjes./Telegrafi/