Lajme

NTP nuk ua vazhdon biletat studentëve për transport falas në Shkup

Biletaritë e Ndërmarrjes së Transportit Publik (NTP) “Shkupi” nuk ua vazhdojnë biletat vjetore për vitin në vijim studentëve për transport publik falas në kryeqytet.

Kryetari i Asamblesë Studentore Universitare të Universitetit “Kirili dhe Metodi”, Aleksandar Nikoloski, tha se tashmë kanë dërguar ankesë deri te Qeveria, Ministria e Arsimit dhe Shkencës, Këshilli i Qytetit të Shkupit, kryetarja Danela Arsovska dhe NTP-ja siç tha ai “të deklarohen publikisht nëse janë paraparë mjete për transport falas të studentëve në qytetin e Shkupit”.

“Pasi biletat për vitin 2025 nuk rinovohen në biletaritë e NTP-së. Nga ana tjetër, Ministria e Arsimit dhe Shkencës njoftoi se janë siguruar mjete. Kryetari i komunës gjatë muajit shtator deklaroi se ka borxh të papaguar prej disa milionë denarë që duhet paguar, përveç Ministrisë dhe Qeverisë. Mbetet të presim përgjigje nga institucionet. Nëse jo, USS dhe UKM do të marrë reagimet dhe masat e duhura për të shprehur qëndrimin e saj. Është qesharake që studentët të mos kenë transport falas, masë kjo e parashikuar për dhjetë vjet radhazi nga Qeveria”, tha Nikoloski.

Në pyetjen se çfarë shpjegimi kanë marrë nga institucionet, ai u përgjigj se “një pjesë e tyre thonë se nuk do të ketë transport falas në qytet”, ndërsa nga NTP-ja në një komunikim telefonik u është thënë se “pritet vendim nga Qyteti i Shkupit”.

“Përgjigjja nga Ministria e Arsimit dhe Shkencës është se janë siguruar mjete, presim vendim nëse do të ketë apo jo që tashmë t’ua vazhdojnë biletat studentëve. Ne komunikojmë çdo ditë, gjatë javës së ardhshme tashmë duhet të ketë një përgjigje nga institucionet”, tha kryetari i organizatës studentore të UKM-së.

Lajme

E dhimbshme, tifoz i Fenerbahçes ndërron jetë gjatë ndeshjes

Një tifoz i Fenerbahçes, Yaşar Gerçek, ka ndërruar jetë gjatë ndeshjes pas një sulmi në zemër.

Klubi e ka konfirmuar lajmin me dhimbje, duke shprehur ngushëllime për familjen, të afërmit dhe gjithë komunitetin e Fenerbahçes.

Në të njëjtën ndeshje, Fenerbahçe u mposht në shtëpi nga Beşiktaşi me rezultat 2-1.

Lajme

Skandal në Tetovë! I akuzuari pengoi mjekët teksa po shpëtonin të lënduarin

Tetovë – Incident gjatë një ndërhyrjeje të Ndihmës së Shpejtë në Tetovë. Një 40-vjeçar nga qyteti është shoqëruar në polici pasi dyshohet se ka penguar ekipin mjekësor teksa po i jepte ndihmë një këmbësori të lënduar në një aksident trafiku.

Ngjarja ka ndodhur më 5 shtator, rreth orës 19:10, në rrugën “Ilinden” në Tetovë.

Sipas denoncimit të bërë në SPB Tetovë nga një punonjës i Shërbimit të Ndihmës së Shpejtë, gjatë ofrimit të ndihmës mjekësore, R.U. (40) nga Tetova dyshohet se ka prishur rendin dhe qetësinë publike me bërtitje, ngritje zëri dhe sjellje të papërshtatshme ndaj ekipit mjekësor.

Policia e ka shoqëruar personin në stacion dhe ndaj tij është përgatitur parashtresa përkatëse.

Lajme

163 km/h në rrugë ku lejoheshin 80!

Rumuni “fluturon” nëpër Maqedoni, kapet në Tabanoc

Shpejtësi marramendëse në autostradën A1! Një shtetas rumun është ndaluar nga policia pasi është kapur duke drejtuar automjetin me 163 kilometra në orë, në një pjesë të rrugës ku shpejtësia maksimale e lejuar ishte vetëm 80 km/h.

Ngjarja ka ndodhur më 4 shtator 2026, rreth orës 06:30, në autostradën A1, pranë Demir Kapisë.

Sipas policisë, 49-vjeçari H.V.S. nga Rumania po drejtonte një automjet tip Audi, me targa rumune, kur sistemi i mbikëqyrjes “Qyteti i Sigurt” regjistroi shkeljen.

Ai u identifikua si person që dyshohet se ka kryer veprën penale “drejtim i pamatur i automjetit”, sipas nenit 297-a të Kodit Penal.

Rreth orës 11:20, kur automjeti po dilte nga vendi përmes pikës kufitare Tabanoc, policia e ndaloi dhe e arrestoi shtetasin rumun.

Ai u dërgua në Stacionin Policor të Negotinës për procedurë të mëtejshme, ndërsa ndaj tij pritet të ngrihet kallëzim penal përkatës.

Nga 80 në 163 km/h – më shumë se dyfishi i shpejtësisë së lejuar!