Lajme

Mickoski: Prokuroria të hetojë deklaratën e Ahmetit për vendndodhjen e Grubit

“Artan Grubi është mirë dhe ndodhet dikund në hapësirat shqiptare” – ka qenë kjo deklarate e djeshme e kreut të BDI-së, Ali Ahmeti e cila nxiti reagime të shumta në skenën politike në vend. Qeveria kërkon që prokuroria të marrë në pyetje Ahmetin në lidhje me këtë. Kryeministri, Hristijan Mickoski, rikujtoi se, Grubi ndodhet në listën e zezë amerikane dhe porositi se, mënyra më e lehtë për të vërtetuar nëse dikush është fajtor apo jo është të vijë dhe të përballet me drejtësinë.

Hristijan Mickoski, Kryeministër i RMV-së

“Shpresoj që kjo të arrijë në prokurori dhe të ketë një procedurë ligjore në të cilën nëse kemi një person që e di se ku është një i arratisur nga ligji, se do ta thërrasin atë person dhe ata do t’i përgjigjen pyetjes se ku është i arratisuri nga drejtësia. Të njëjtët pa të cilët nuk mund të kalonte kualifikimi përmes Akademisë së Gjyqtarëve dhe Prokurorëve Publikë, tani thonë se dikujt iu mohua drejtësia dhe se kjo ishte përndjekje politike. Më lejoni t’ju kujtoj – i arratisuri i përmendur është në listën e sanksioneve amerikane dhe aty thonë publikisht se ky person së bashku me njëri-tjetrin janë të lidhur me skandale të mëdha korrupsioni. Supozoj se nuk do ta akuzojnë Departamentin e Shtetit për përndjekje politik”.

Ndërkaq, zëvendëskryeministri për qeverisje të mirë, Arben Fetai duke komentuar deklaratën e Ahmetit, tha se, prokuroria ka obligim ligjor ta thërras në pyetje Ahmetin.

Arben Fetai, Zëvendëskryeministër për qeverisje të mirë

“Ali Ahmeti deklaroi se ka njohuri për vendndodhjen e Artan Grubit, për të cilin ka një fletarrest ndërkombëtar. Prokuroria publike, në bazë të kësaj deklarate publike, ka për obligim ligjor ta thërrasë në pyetje z. Ali Ahmeti për ta pyetur se ku ndodhet personi që ndiqet nga drejtësia e vendit”.

Ahmeti të dielen në një prononcim për media, deklaroi se vendndodhja e Grubit është në hapësirat shqiptare dhe se shumë shpejtë do të paraqitet tek organet e drejtësisë. Por, për tu paraqitur tek organet e drejtësisë, Aliu ka thënë se drejtësia nuk duhet të jetë hakmarrëse dhe selektive

Kujtojmë se, Prokuroria Themelore Shkup ka formuar lëndë për ish zëvendëskryeministrin Artan Grubi në lidhje me akuzat e DASH-it për përfshirje në korrupsion të profilit të lartë, për të cilat edhe e shpallën person të padëshiruar në SHBA. Po ashut, Grubi është edhe ndër dy të dyshuarit kryesor në lëndën për keqpërdorimet në Lotarinë Shtetërore. Megjithatë, ai u largua nga vendi para nisjes së këtij hetimi dhe tash më dy javë, është i pakapshëm për organet e drejtësisë në vend dhe MPB ka shpallur flet – arrest ndërkombëtar.

Lajme

Durmishi: Gjithmonë jemi për paga më të larta, por duhet të ketë arsyetim ekonomik

Ministri i Ekonomisë dhe Punës, Besart Durmishi, sonte në emisionin “Biznis21” në TV21 deklaroi se çështja e pagës minimale është shndërruar në një arenë politike ditore dhe se çdo rritje eventuale duhet të ketë arsyetim ekonomik.

“Më vjen keq që një temë kaq serioze si paga minimale është bërë arenë e politikës ditore. Ne kemi rreth 30 mijë persona që marrin pagë minimale, nga gjithsej 750 mijë sa kemi në nivel shteti. Nga këta 30 mijë persona, gjysma prej tyre janë njerëz që kanë hapur vetë biznese, përkatësisht kompani si tregtarë individualë dhe kanë edhe të ardhura të tjera”, tha Durmishi.

Ai shtoi se si qeveri gjithmonë janë të qëndrimit se pagat duhet të rriten, por se duhet të merren parasysh edhe parametra të tjerë ekonomikë.

“Sinqerisht, asnjëherë nuk kemi thënë se rritja është e mjaftueshme. Gjithmonë jemi të qëndrimit se pagat duhet të rriten, por duhet të ketë bazë ekonomike. Duhet të shohim edhe produktivitetin dhe të mos shkaktojmë probleme të tjera. Nëse shkojmë me zgjidhje ad-hoc dhe me përmbushjen e kërkesave populiste të opozitës, nëse reagojmë në këtë mënyrë pa arsyetim ekonomik, mund të shkaktojmë inflacion. Ndërkohë, kompanitë me numër më të vogël të të punësuarve mund të përballen me implikime financiare dhe të detyrohen të ndërmarrin hapa për të larguar punonjës”, deklaroi Durmishi.

Lajme

Kujdes shoferë: Pezullimi i patentës nis pas SMS-it të dytë

Ndalimi i drejtimit të automjetit i vendosur me vendim të formës së prerë të gjykatës nuk do të shënohet më fizikisht në patentën e shoferit. Në vend të kësaj, po futet një sistem dixhital njoftimi nëpërmjet SMS-ve dhe email-it , njofton Ministria e Brendshme.

Sipas metodës së re të zbatimit të sanksionit, procesi i njoftimit zhvillohet në dy faza . Qytetarët fillimisht do të marrin një mesazh fillestar SMS , i cili përmban informacion në lidhje me llojin dhe kohëzgjatjen e ndalimit. Ky mesazh dërgohet afërsisht shtatë ditë pasi të jetë përfunduar deklarata me të dhënat e kontaktit .

Tetë ditë pas marrjes së mesazhit të parë, dërgohet një mesazh i dytë SMS dhe ndalimi i drejtimit të mjetit fillon zyrtarisht të ecë që nga momenti i marrjes së këtij mesazhi të dytë.

Ministria e Brendshme thekson se sistemi i ri eliminon nevojën që qytetarët të marrin një patentë të re shoferi me ndalim, gjë që më parë nënkuptonte kosto shtesë.

Deri më tani, sipas të dhënave të Ministrisë, më shumë se 3,000 ndalime drejtimi mjetesh , të vendosura me vendime gjyqësore të formës së prerë, janë zbatuar nëpërmjet këtij sistemi të ri.

Qytetarëve të cilëve u është lëshuar një sanksion i tillë u kërkohet të përditësojnë të dhënat e tyre të kontaktit – telefonin celular dhe adresën e email-it – në departamentet e çështjeve administrative, në mënyrë që të marrin njoftime në kohë dhe të shmangin keqkuptimet gjatë ekzekutimit të sanksionit.

Lajme

Altron Ismani zgjidhet kryetar i nëndegës së BDI-së në Drenovec

Në degën e Bashkimit Demokratik për Integrim në Tetovë është mbajtur një takim me përfaqësues dhe banorë nga Drenoveci, ku Altron Ismani është zgjedhur me unanimitet kryetar i nëndegës së BDI-së në këtë vendbanim.

Takimi u karakterizua nga një pjesëmarrje e madhe dhe një atmosferë uniteti, duke dëshmuar përkrahjen e fuqishme të qytetarëve për përfaqësuesit e tyre. Mbështetje të madhe mori Altron Ismani, i cili u vlerësua si figura që do ta përfaqësojë Drenovecin në periudhën e ardhshme.

Pas zgjedhjes, Ismani falënderoi bashkëbanorët për besimin e dhënë, duke theksuar se përkrahja që mori përbën një nder të madh, por edhe një përgjegjësi të rëndësishme.

“Ju falënderoj nga zemra secilin prej jush për mbështetjen, besimin dhe respektin që treguat ndaj meje. Ky besim për mua nuk është vetëm një nder, por mbi të gjitha është një përgjegjësi e madhe për të punuar me përkushtim, ndershmëri dhe transparencë për të mirën e lagjes sonë dhe të gjithë banorëve të saj”, tha Ismani.

Gjatë takimit u theksua edhe rëndësia e unitetit dhe bashkëpunimit mes qytetarëve, duke vlerësuar se vetëm përmes angazhimit të përbashkët mund të tejkalohen sfidat dhe të arrihen qëllimet për një të ardhme më të mirë për Drenovecin.