Lajme

Emir Sulejmani: Bashkimi kombëtar nuk është opsion politik, por obligim historik

Kryetari i degës së BDI-së në Zhelinë, Emir Sulejmani, ka komentuar bashkimin e tre liderëve të partive shqiptare opozitare, duke e cilësuar këtë si një moment historik më shumë se politik.

“Bashkimi kombëtar është obligim historik, jo opsion politik!
Kur dinjiteti ynë vihet në pikëpyetje, nuk ka asnjë arsyetim për qëndrim të heshtur.
Të bashkohemi jo vetëm me fjalë, por me vepra për gjuhën, identitetin dhe të ardhmen tonë!
Me bashkim, jemi të pamposhtur!”, ka shkruar Sulejmani.

Kjo deklaratë vjen në një kohë ku sipas sondazheve të fundit, bashkëpunimi mes BDI-së dhe dy Aleancave për Shqiptarët po rezulton me rritje të madhe për kandidatin e BDI-së edhe në komunën e Zhelinës.

Sipas të njëjtave sondazhe, kandidati i VLEN-it, Blerim Sejdiu, ka pësuar një rënie të dukshme në mbështetje, duke e llogaritur një humbje për garën e tij në zgjedhjet lokale të tetorit për shkak edhe kandidimit tē tretë të tij.

Lajme

Incident në Pallaticë: Qytetarët raportojnë kërcënime pas një debati mes bashkëfshatarëve

Një rast kërcënimi është raportuar më 12 janar 2026 në SPB Tetovë nga A.B. (64) nga fshati Pallaticë, komuna e Zhelinës. Sipas denoncimit, rreth orës 16:30, derisa ndodhej në objektin e tij hotelierik bashkë me djalin e tij V.S., ka ndodhur një debat paraprak me një bashkëfshatar, pas së cilit personi me iniciale G.N. dyshohet se i ka kërcënuar ata.

Ngjarja ka shkaktuar shqetësim te të përfshirët, ndërsa rasti është raportuar menjëherë në polici. Zyrtarët policorë kanë nisur procedurat hetimore dhe po ndërmarrin masa për zbardhjen e plotë të rrethanave të incidentit, si dhe për dokumentimin e provave përkatëse.

Nga SPB Tetovë njoftojnë se pas kompletimit të rastit do të veprohet në përputhje me dispozitat ligjore.

Lajme

Për një vit, mbi 11 mijë punëtorë nga Maqedonia kanë marrë leje pune në Kroaci

Kryetari i Lidhjes së Sindikatave të Maqedonisë, Slobodan Trendafillov në një postim në Facebook thotë se mbi 11 mijë punëtorë të kualifikuar nga Maqedonia kanë shkuar për të punuar në Kroaci, përcjell TV21. Trendafillov thotë se biznesi po përballet me mungesë të fuqisë punëtore.

“Në vitin 2025, 11.384 punëtorë nga Maqedonia kanë marrë leje pune për të punuar në Kroaci, dhe shumë të tjerë janë larguar drejt Malit të Zi, Sllovenisë, Gjermanisë etj, ndërsa punëdhënësit e Maqedonisë kanë zëvendësuar vetëm 8.500 prej tyre me punëtorë nga Bangladeshi, Nepali dhe India (për të cilët dyshohet se kanë qëndruar në Maqedoni). Punëdhënësit ankohen se nuk kanë punëtorë të kualifikuar, qeveria mendon se nuk duhet të rriten pagat, ndërsa punëtorët largohen nga Maqedonia”, thotë kreu i LSDM-së.

Lajme

LSDM: Mickoski e çon vendin drejt izolimit me fushatë anti-BE

Qeveria aktuale e Kryeministrit Mickoski, në vend të integrimit, po e çon vendin drejt izolimit, akuzojnë sot nga LSDM.

“Një bashkëpunëtor i ngushtë i Mickoskit dhe zv. kryeministrit në qeverinë e tij është Ivan Stoilkoviq, qëndrimet e hapura pro-ruse dhe lidhjet e drejtpërdrejta të të cilit me Moskën përbëjnë një kërcënim serioz për orientimin euroatlantik të vendit.

Vetëm pak ditë më parë, zëvendëskryeministri Ivan Stoilkovic mori pjesë në festimin e Ditës së Republikës Serbe së bashku me grupin “Ujqërit e Natës”, të njohur për mbështetjen e Putinit dhe përhapjen e narrativave anti-perëndimore.

Edhe më keq se kjo është se vetë kryeministri Mickoski, pavarësisht deklaratave publike për bashkëpunim strategjik me SHBA-në dhe integrimin në BE, me veprimet e tij dhe lidhjet e ngushta me Vuçiqin dhe SNS-në, po bën gjithçka të kundërtën, duke e çuar Maqedoninë drejt izolimit.

Reformat e BE-së shmangen qëllimisht, konfliktet me fqinjët krijohen qëllimisht, arsyet shpiken për të bllokuar negociatat. E gjitha është një skenar i sajuar, pjesë e një fushate anti-BE që qeveria të vazhdojë të plaçkitë vendin.

Sipas hulumtimit të fundit nga viti 2025, deri në 70% e qytetarëve të Maqedonisë së Veriut mbështesin anëtarësimin në BE, dhe 77% e shohin anëtarësimin në NATO si pozitiv”, thonë nga LSDM.