Lajme

Shtëpia e Bardhë e mbajti top sekret operacionin deri në sekondën e fundit

Presidenti Trump sapo njoftoi në Truth Social se ShBA ka hedhur bomba mbi tre objekte bërthamore iraniane sot. “Ne kemi përfunduar me sukses të madh sulmin tonë ndaj tre objekteve bërthamore në Iran, përfshirë Fordow, Natanz dhe Esfahan. Të gjitha avionët tani janë jashtë hapësirës ajrore të Iranit. Një ngarkesë e plotë me BOMBA është hedhur në objektivin kryesor, Fordow,” shkroi ai.

“Të gjithë avionët janë të sigurt dhe po kthehen në atdhe. Urime për Luftëtarët tanë të mëdhenj Amerikanë. Nuk ka një ushtri tjetër në botë që mund ta kishte bërë këtë. TANI ËSHTË KOHA PËR PAQE! Faleminderit për vëmendjen tuaj ndaj kësaj çështjeje.” – shtoi Trump.

Ky operacion, që u mbajt top sekret nga publiku, erdhi si befasi edhe për shumë media ndërkombëtare, të cilat deri pak orë më parë raportonin se Presidenti ende po shqyrtonte opsionet ushtarake. Ndërkohë, ai ishte duke përgatitur deklaratën për rrjetin e tij social.

Sipas raportimeve të New York Times dhe Wall Street Journal disa orë më parë, disa bombardues B-2, të pajisur me armë të afta për të depërtuar në struktura nëntokësore – veçanërisht të dizajnuara për objektiva si Fordow – u panë duke u nisur nga Missouri drejt perëndimit.

Fillimisht besohej se ishin drejtuar për në Guam, por, sipas NTY, nuk është konfirmuar nëse këta avionë morën pjesë në sulmin e sotëm.

Tri objektet që Trump tha se u goditën përfshijnë dy nga qendrat më të rëndësishme të pasurimit të uraniumit të Iranit , objektin nëntokësor në Fordow dhe kompleksin në Natanz, i cili ishte goditur më herët gjatë javës nga sulme me raketa nga Izraeli.

Objektivi i tretë, afër qytetit të Isfahanit, është vendi ku besohet se Irani ruan uraniumin e pasuruar pranë nivelit për armë bërthamore, një sasi që është verifikuar nga inspektorët vetëm dy javë më parë.

Nëse këto objekte janë dëmtuar rëndë, sipas NYT, kjo mund ta ngadalësojë ndjeshëm programin bërthamor iranian për disa vite – përveç nëse Irani ka objekte të tjera të fshehta ende të paidentifikuara.

Trump ka qenë nën trysni të madhe nga disa prej aleatëve të tij politikë që kundërshtojnë përfshirjen ushtarake, për të mos ndërmarrë veprime të tilla. Megjithatë, në dy ditët e fundit, qëndrimi i disa prej tyre ndryshoi, duke kërkuar që çdo ndërhyrje të jetë e kufizuar dhe pa angazhim afatgjatë.

Ky është rasti i parë që prej revolucionit iranian të vitit 1979 që SHBA ndërmerr sulme ajrore të drejtpërdrejta ndaj objektivave madhore brenda territorit iranian – një veprim që konsiderohet akt lufte.

Lajme

EVN: Vjedhje e energjisë elektrike me vlerë mbi 22,000 euro u zbulua në Kodrën e Diellit

EVN-Maqedoni ka bërë të ditur se në koordinim me Policinë e Tetovës dhe ekipet e tyre në Qendrën e Energjisë së Konsumatorëve në Tetovë zbuluan përdorim të paautorizuar të energjisë elektrike në një kompleks biznesi në Kodrën e Diellit, shkruan Portalb.mk.

Sipas tyre, gjatë inspektimit është zbuluar përdorim i paligjshëm i energjisë elektrike përmes një kutie lidhëse të kabllove, lidhje e drejtpërdrejt e paautorizuar me një kabllo me tension të ulët (4x16mm2).

“U përpilua një procesverbal për përdorim të paautorizuar. U parashtrua një ankesë për përdorim të paautorizuar të energjisë elektrike në Ministrinë e Brendshme sipas nenit 235-a të Kodit Penal. U përgatit një faturë për kompensim dëmi në shumën prej 1,361,599.00 denarësh apo rreth 22.000 euro”, thonë nga atje.

Gjithashtu edhe nga MPB për Portalb.mk e kanë konfirmuar aksionin policor në Kodrën e Diellit. Nga atje thonë se bashkë me punonjësit e EVN-Maqedoni kanë kryer inspektime mbi dyshimet për vjedhje të energjisë elektrike.

“Më datë 28.03.2026, në periudhën nga ora 15:00-18:00, është kryer kontroll në dy lokacione në Kodrën e Diellit, përkatësisht në një hotel në pronësi të L.Sh.(42) nga fshati Pirok dhe në një market në pronësi të B.M.(31) nga Tetova. Aksioni është realizuar në bashkëpunim me punonjësit e EVN-Maqedoni, të cilët kanë denoncuar veprën penale ‘vjedhje e energjisë elektrike’. Pas inspektimit, punonjësit e EVN-së kanë konstatuar se lokalet nuk posedonin njehsor elektrik, ndërkohë që në ato momente ishin të furnizuara me energji elektrike”, thonë nga MPB.

Pas dokumentimit të plotë të rastit, ndaj pronarëve të objekteve do të dorëzohen parashtresat përkatëse ligjore.

Lajme

Pas rebelimit ndaj VLEN-it, Arben Fetai ka kohë që mungon në punë dhe në seancat qeveritare

“Sa për ironi, zv kryeministri për Qeverisje të Mirë, Arben Fetai nuk paraqitet në punë. Nga Qeveria pa përgjigje konkrete, ata thonë se pyetjet tona duhet t’i adresojmë direkt te Arben Fetai.”

Si trup kolektiv, Qeveria funksionon pa pengesa dhe me kapacitet të plotë. Lidhur me pyetjet që kanë të bëjnë me angazhimin në punë, ju udhëzojmë që direkt t’i adresoni te Arben Fetai”, deklaruan nga Qeveria.

*Qeveria funksionon pa pengesa dhe me kapacitet të plotë
*Lidhur me angazhimun në punë, ju udhëzojmë që direkt t’i adresoni te Arben Fetai

Alsat kërkoi sqarim nga Arben Fetai nëse janë të vërteta këto pretendime, por nuk morëm përgjigje.

Rebelimi i Arben Fetait, vjen pas papajtueshmërive të tij me liderët e VLEN-it, ndërsa është një nga emrat më të përfolur që mund të përfshihet në rikonstruimin e Qeverisë në qershor. Përndryshe, Arben Fetai dhe Azir Aliu u ndanë nga Arben Taravari në maj të vitit 2025 kur ky i fundit braktisi Qeverinë dhe përfundoi në koalicion me BDI-në./Alsat.mk

Lajme

LSDM: Gruevski ka pasaportë hungareze dhe serbe

Nga partia opozitare maqedonase LSDM thonë se, sipas informacioneve të fundit që kanë siguruar, Nikolla Gruevski tashmë posedon pasaporta hungareze dhe serbe.

“Nëse i arratisuri nga drejtësia ka marrë pasaportë serbe dhe hungareze, atëherë është e qartë se pas kësaj qëndrojnë aleatët dhe mbrojtësit e tij politikë, Orban dhe Vuçiç – të cilët i konsiderojmë mentorë politikë të Mickoskit. Mosveprimi i qeverisë dhe refuzimi i vazhdueshëm për të dërguar një kërkesë të re për ekstradim tregon për një përpjekje të qëllimshme për t’i krijuar hapësirë dhe për ta mbrojtur Gruevskin”, thonë nga LSDM.

Ata shtojnë se, ndërkohë që vende të tjera si Polonia veprojnë shpejt në raste të ngjashme, sipas tyre, Mickoski po i jep kohë Gruevskit.

“Mickoski dhe VMRO-DPMNE nuk po ndërmarrin asnjë hap. Ata nuk duan që Gruevski të kthehet në Maqedoni dhe të përballet me drejtësinë. Kjo përbën një mbrojtje klasike të Nikola Gruevskit nga ana e Hristijan Mickoskit”, deklarojnë nga LSDM.