Lajme

Dasma madhështore e Jeff Bezos në Venecia ka kushtuar deri në 48 milionë euro

Themeluesi i Amazon-it dhe ish-gazetarja televizive u martuan në ishullin San Giorgio Maggiore. Ishulli ndodhet pranë Kanalit të Madh, me pamje nga qendra historike e qytetit, dhe çifti e zhvilloi ceremoninë në praninë e miqve të ngushtë, yjeve botërore dhe miliarderëve, raportoi “Index”.

Ajo shkëlqeu në një fustan nusërie nga Dolce & Gabbana
Sánchez kaloi në altar me një fustan dantelle me mëngë të gjata nga Dolce & Gabbana. Fustani kishte një bel të ngushtë me korse, jakë të lartë dhe kopsa, i frymëzuar nga fustani i nuses që Sophia Loren veshi në filmin “Houseboat” nga viti 1958 kur u martua me Cary Grant. Nusja ndau në Instagram fotot e dasmës.

Nusja 55-vjeçare i kishte kapur flokët në një topuz të thjeshtë, me disa fije që kornizonin fytyrën nën një vell dantelle. Ajo gjithashtu kishte veshur vathë luksoz “Dolce & Gabbana Alta Gioielleria Miracolo” me katër diamante të prera nga një gur i vetëm dhe të vendosura në ar të bardhë.

Ceremoni simbolike
Sipas “Daily Mail”, çifti është martuar zyrtarisht më shumë se një muaj më parë në SHBA.
“Martesa e tyre është plotësisht e vlefshme ligjërisht dhe e regjistruar sipas ligjit amerikan. Që në përgatitjet e para, ata bënë të qartë se ceremonia në Itali do të ishte vetëm simbolike, pasi dokumentet i kishin nënshkruar më herët,” ka thënë një burim anonim për “Daily Mail”.
Çifti nuk ka kërkuar as leje martesore në Itali, pasi nuk iu ka nevojitur.

Shumë fytyra të njohura morën pjesë në festën treditore
Festa nisi të enjten, më 26 qershor, me një pritje në ishullin Madonna dell’Orto.
Festa, që përfshinte ardhjen e të ftuarve me avionë privatë, darka luksoze, festa në jahtet më të shtrenjta dhe ceremonia në një vend historik, e shndërroi Venecian në qendër të elitës botërore.
Në dasmë morën pjesë figura të njohura nga biznesi, politika dhe showbiz-i. Masat e sigurisë dhe logjistika e dasmës ishin më të mëdha se shumica e eventeve hollivudiane.

Ndër të ftuarit ishin Ivanka Trump, Kim dhe Khloé Kardashian, Kendall dhe Kylie Jenner, Tom Brady, Orlando Bloom, Usher, Kris Jenner me partnerin Corey Gamble, Leonardo DiCaprio me të dashurën Vittoria Ceretti, Oprah Winfrey dhe Gayle King.
Festa do të kulmojë sot me një ballo luksoze në Arsenalin e vjetër të Venecias – një ish-ndërmarrje ndërtimi anijesh e kthyer në hapësirë ekskluzive nën masa të rrepta sigurie.

Kostoja e dasmës: nga 40 deri në 48 milionë euro
Dasma e Jeff Bezos dhe Lauren Sánchez në Venecia pritet të kushtojë ndërmjet 40 dhe 48 milionë euro. Në këtë shumë përfshihen:
• Marrja me qira e 90 avionëve privatë dhe 30 taksive ujore
• Rezervimi i 5 hoteleve luksoze për 200–250 të ftuar
• Ngjarje për tre ditë: pritje, festa me temë (p.sh. festa glamuroze dhe tema “The Great Gatsby”), ceremonia kryesore në Arsenal, festa me pizhamë, darka dhe të tjera
• Donacione për komunitetin lokal: 1 milion euro për ruajtjen e lagunës, plus fonde shtesë për institucione kulturore e shkencore

Disa burime përmendin kosto më të ulëta nga 15 deri në 20 milionë dollarë, por të dhënat zyrtare nga rajoni Veneto mbështesin vlerësimet më të larta.

Kritika nga aktivistët lokalë
Aktivistë të pavarur lokalë dhe ambientalistë kanë kritikuar ashpër luksin dhe logjistikën e dasmës. Masat e sigurisë dhe zhvendosja e aktivitetit nga qendra e qytetit rriti ndjeshëm koston dhe kompleksitetin e organizimit.
Në prag të dasmës, aktivistët shpalosën një pankartë gjigante me fytyrën e Bezos dhe mesazhin: “Nëse mund ta marrësh Venecian me qira për dasmën tënde, atëherë mund të paguash më shumë taksa.”

Lajme

Superlajm për tifozët e Shkëndijës së Tetovës

Tifozët e KF Shkëndijës dhe dashamirësit e futbollit do të kenë mundësinë të ndjekin sërish nga afër paraqitjen e kuqezinjve në skenën evropiane.

Televizioni Publik TVM2 ka siguruar të drejtat e transmetimit direkt për ndeshjen e rëndësishme të raundit të tretë kualifikues të Ligës së Konferencës.

Ekipi nga Tetova do të përballet në udhëtim me skuadrën skoceze Hibernian, në një duel që premton emocione të mëdha dhe rivalitet të lartë për kalimin në fazën tjetër.

Lajme

Shtrenjtohet edhe më shumë nafta në Maqedoninë e Veriut

Komisioni Rregullor për Energjetikë (KRRE) ka marrë vendim të ri për çmimet e derivateve të naftës, të cilat do të pësojnë ulje dhe ngritje, duke filluar nga mesnata.

Sipas vendimit të fundit, çmimi i benzinave do të ulet për 2 denarë për litër. Nga ana tjetër, çmimi i derivateve të tjera shënon rritje: nafta do të shtrenjtohet për 1 denarë, ndërsa vaji ekstra i lehtë për 0,5 denarë për litër.

Çmimet e reja të derivateve të naftës:

EUROSUPER BS-95: 91,0 denarë/litër

EUROSUPER BS-98: 93,0 denarë/litër

EURODIESEL (Nafta): 99,5 denarë/litër

Vaji ekstra i lehtë (EL-1): 98,5 denarë/litër

Çmimet e reja do të hyjnë në fuqi pas mesnate dhe do të vlejnë në të gjitha pikat e karburanteve në vend.

Lajme

Rrahja brutale në Gostivar, policia identifikon katër veta

Ministria e Brendshme përmes një njoftimi informoi se ka identifikuar tre persona të cilët, sipas një videoje në rrjetet sociale, kanë sulmuar dhunshëm dy të rinj në Gostivar.

Policia shpjegon se personat e identifikuar janë dy të mitur nga Gostivari dhe një 20-vjeçar nga Shkupi.

„Dy të mitur nga Gostivari janë thirrur në stacionin policor për bisedë zyrtare, ndërsa dokumentet e tyre të udhëtimit janë konfiskuar me urdhër të prokurorit publik. Personi i tretë është V.D. (20) nga Shkupi, për të cilin është dërguar njoftim zyrtar në Stacionin Policor në Shkup për procedurë të mëtutjeshme“, njoftoi policia.
Ata theksojnë se ndaj të treve do të zbatohet një procedurë e përshpejtuar para gjykatës sapo të kompletohet dokumentacioni i plotë për rastin. Sipas autoriteteve, sulmi ka ndodhur në orët e para të mëngjesit të 2 gushtit në rrugën „Borçe Jovanoski“, ku dy të rinj janë goditur me mjete dhe shkopinj druri.

Në rrjetet sociale u shfaq një video-incizim shqetësues nga Gostivari, në të cilin shfaqet një përleshje e ashpër fizike mes një grupi më të madh të rinjsh.

Sipas informacioneve të publikuara, gjatë rrahjes, njëri nga djemtë është goditur në pjesën e kokës, pas së cilës ka rënë në tokë dhe ka mbetur i palëvizshëm.
Përkundër faktit se po shtrihej në rrugë, në incizim shihet se sulmi ka vazhduar me goditje të shumta ndaj trupit të tij, gjë që ka shkaktuar reagime dhe dënime të ashpra në rrjetet sociale.(INA)