Lajme

Kandidati musliman për kryetar të New Yorkut: Kërcënimi i Trumpit për deportim “sulm ndaj demokracisë”

Kandidati musliman që fitoi zgjedhjet paraprake për kryetar bashkie të Partisë Demokratike në New York të SHBA-së, Zohran Mamdani reagoi ndaj deklaratës së presidentit Donald Trump se do ta deportonte nëse ai do të parandalonte praktikat kundër emigrantëve të parregullt, transmeton Anadolu.

Me një deklaratë që e ndau në llogarinë e tij në X, Mamdani iu përgjigj deklaratave të Trumpit që e shënjestronin atë.

Mamdani tha se Trump e ka kërcënuar me marrjen e shtetësisë dhe deportim për arsyen se ka thënë që nuk do të bashkëpunojë me oficerët e Imigracionit dhe Doganave (ICE) kur të zgjidhet kryetar bashkie.

“Trump i tha këto fjalë jo sepse unë shkela ligjin, por sepse nuk do të lejoja që ICE të terrorizonte qytetin tonë”, shtoi Mamdani.

Pasi theksoi se nuk do t’i nënshtrohet “kërcënimit” të Trumpit, Mamdani tha: “Deklaratat e Trumpit nuk janë vetëm sulm ndaj demokracisë sonë, ato gjithashtu i dërgojnë mesazh çdo banori të New Yorkut që refuzon të heshtë: ‘Nëse ngrini zërin, ata do t’ju ndjekin’. Ne nuk do ta pranojmë këtë kërcënim”.

Trump bëri deklarata në shënjestrim të Mamdanit gjatë vizitës së tij dje në qendrën e paraburgimit të quajtur “Krokodili i Alkatrazit” në Florida, ku do të mbahen emigrantë të parregullt.

Duke vënë në dukje se nëse Mamdani nuk do të bashkëpunojë me autoritetet e imigracionit, ata do të duhej ta arrestojnë dhe deportojnë, Trump tha: “Nuk kemi nevojë për një komunist në këtë vend, por nëse ka, unë do ta vëzhgoj me shumë kujdes në emër të kombit”.

– Kandidati musliman Mamdani fitoi zgjedhjet paraprake për kryetar bashkie

Sipas rezultateve zyrtare të shpallura dje në SHBA, Mamdani, anëtar i Dhomës së Përfaqësuesve fitoi zgjedhjet paraprake për kryetar bashkie të Partisë Demokratike të mbajtura në New York.

Mamdani mori 56 për qind të votave, duke mposhtur me 12 pikë diferencë kundërshtarin e tij më të fortë, ish-guvernatorin e New Yorkut, Andrew Cuomo.

Zohran Mamdani 33 vjeç do të jetë kryetari i parë musliman dhe nga Azia Jugore i New Yorkut nëse fiton zgjedhjet që do të mbahen më 4 nëntor.

Lajme

30 përqind më shtrenjtë, por kontejnerët e papastruar. Kumanovarët ankohen!

Kështu duken disa nga rrugët kryesore të Kumanovës në pikë të verës, ku qyteti gëlon gjithkah, pasi këtu janë edhe mërgimtarët.

Temperaturat arrijnë rreth 40°C e kontejnerët e mbeturinave mbeten të tejmbushur me javë.

Jo vetëm në bulevardet kryesore, por edhe në disa rrugë e rrugica që i denoncuan qytetarët.

Nga ana tjetër prej muajit korrik janë shtrenjtuar për 30% faturat e mbeturinave në Kumanovë.

Vendimi i Këshillit komunal ka irrituar qytetarët, të cilët shprehin revoltën e tyre gjatë pagesave në sportele. Ata thonë jo vetëm që u kushton më shumë, por vonesat në mbledhje të plehrave po ndodh tani në 6 muajt e fundit. Druajnë për ndonjë epidemi nga papastërtitë nëpër rrugë.

Nga N.P. “Pastrimi dhe Gjelbërimi” në Kumanovë thonë se në sezon të verës janë kurbetçinjtë që po bëjnë konsum të shtuar dhe si rrjedhojë ka mbingarkesë të mbeturinave në qytet. Ushtruesi detyrës drejtor Sasho Tomiq tha se kanë vënë të gjitha kapacitet në funksion, por aq kanë fuqi.

“Në këtë periudhë, në 30 ditët e fundit, ka numër të shtuar të bashkë qytetarëve tanë, të cilët përkohësisht janë duke punuar në vendet perëndimore, andaj këtu është rritur frekuentimi në Kumanovë dhe vendbanimet përreth qytetit, njëkohësisht është rritur dhe sasia mbeturinave nëse rëndomë kemi hequr 60 ton mbeturina në ditë, tani heqim 70-80 ton mbeturina në ditë”, tha Sasho Tomiq – u.d drejtor i N.P “Pastrimi dhe Gjelbërimi” – Kumanovë.

Përndryshe, nga drejtoria ankohen se po punojnë me kamionë të vjetruar dhe në numër të paktë, ku ka mungesa edhe në punëtorë. Madje, ushtruesi detyrës që udhëheqë ndërmarrjen tha se e ka gjetur të mbytur në borxhe, ku vetëm ndaj DAP kanë paguar 20 milionë denarë për 8 muaj. Borxhe kanë edhe ndaj kompanive që blejnë pjesë rezervë të kamionëve dhe ndaj pagave të punëtore, disa prej të cilëve kanë nisur procese gjyqësore. Ndërsa, veç rreth 80% e faturave paguhen rregullisht nga ana e qytetarëve, të cilëve u bëhet thirrje të shlyejnë borxhet me kohë, duke iu mundësuar pagesat me këste, për ti evituar shpenzimet e noterëve dhe përmbaruesve.

Lajme

Tajfuni godet Kinën, evakuohen mbi 1 milion banorë

Kina po përgatitej prej disa ditësh për mbërritjen e stuhisë në bregdetin lindor, ndërsa puna dhe shërbimet e transportit ishin pezulluar në disa zona përgjatë trajektores së parashikuar të saj.

Qendra e tajfunit kaloi mbi bregdetin afër qytetit Yuhuan, në provincën Zhejiang, rreth orës 17:30 (09:30 GMT), tha Qendra Kombëtare Meteorologjike e Kinës në një postim online, shkruan Yahoo News.
Shpejtësia maksimale e erës afër qendrës së tajfunit ishte mbi 150 kilometra në orë në momentin kur ai preku tokën, njoftoi Qendra Meteorologjike. Në pjesët qendrore dhe lindore të Zhejiang-ut pritet të bien nga 250 deri në 500 mm reshje shiu.

Autoritetet zhvendosën më shumë se 900,000 banorë nga qyteti i Wenzhou-ut dhe hapën më shumë se 1,000 strehimore emergjente.

Rreth 1,400 fluturime nga dhe drejt dy aeroporteve kryesore të pasagjerëve në Shanghai u anuluan të dielën, raportoi transmetuesi shtetëror CCTV.

Lajme

Vuçiq: Deklarata e Zelenskyt, goditja më e madhe kundër shqiptarëve në 14 vjet

Presidenti i Serbisë, Aleksandar Vuçiç, ka thënë se në Prishtinë po bëhet “gjueti shtrigash” kundër presidentit ukrainas, Volodymyr Zelensky, pas deklaratës së tij kundër pavarësisë së Kosovës në Beograd.

“Prishtina ka reaguar shumë ashpër kundër Zelenskyt. Atje po bëhet një gjueti shtrigash kundër tij. Vetëm imagjinojeni çfarë rezultati do të ishte sikur të vinte dhe të thoshte: ‘Po, Kosova është Serbi’. A kanë pasur shqiptarët goditje më të fortë se kjo në 14 vitet e fundit?”, ka thënë Vuçiç të dielën në Beograd.

Ai është pyetur nga gazetarët nëse pret ndonjë pasojë për serbët e Kosovës pas kësaj. Ai ka thënë se “e di që është shumë e vështirë për ta, por ne nuk mund të luftojmë kundër NATO-s”.