Lajme

Mickoski: Zgjedhjet lokale pritet të mbahen më 19 tetor

Kryeministri Hristijan Mickoski sot duke u përgjigjur në pyetje me disa akuza nga opozitarja LSDM, zbuloi se raundi i parë i zgjedhjeve lokale do të mbahet më 19 tetor.

“LSDM ka retorikën e saj, ka komunikimin e vetë politik. Unë nuk do ta komentoja. Të presim të vijë 19 tetori, në ora 20 do t’i dëgjoni rezultatet dhe gjithçka do të jetë e qartë. Dmth zgjedhjet, raundi i parë do të jetë më 19 tetor? Po, ashtu është nga ajo që e kam marrë si informacion nga Kuvendi. Do të shpallen diku 7-8 gusht, raundi i parë duhet të jetë më 19 tetor”, tha Mickoski.

Ndërsa kryetari i Kuvendit, Afrim Gashi, në konferencën e sotme me gazetarët tha se do t’i shpallë zgjedhjet lokale në gjysmën e parë të gushtit.

I pyetur nëse do t’i shpallë ato më 8 gusht, Gashi theksoi se është e mundur dhe se gjithçka do të jetë brenda afateve të parapara.

“Mund të shpallen më 8 gusht. Gjithçka do të jetë brenda afateve. Kodi Zgjedhor ka dy dispozita nga të cilat udhëhiqemi. E para është dispozita që nuk duhet të jetë më shumë se 90 ose më pak se 70 ditë. Pika e dytë orientuese është Ligji për Vetëqeverisjen Vendore, i cili thotë se zgjedhjet duhet të mbahen në gjysmën e dytë të tetorit. Brenda këtyre dy periudhave, ne do t’i shpallim zgjedhjet. Me shumë mundësi në gjysmën e parë të gushtit”, tha kryetari i Kuvendit.

Lajme

Superlajm për tifozët e Shkëndijës së Tetovës

Tifozët e KF Shkëndijës dhe dashamirësit e futbollit do të kenë mundësinë të ndjekin sërish nga afër paraqitjen e kuqezinjve në skenën evropiane.

Televizioni Publik TVM2 ka siguruar të drejtat e transmetimit direkt për ndeshjen e rëndësishme të raundit të tretë kualifikues të Ligës së Konferencës.

Ekipi nga Tetova do të përballet në udhëtim me skuadrën skoceze Hibernian, në një duel që premton emocione të mëdha dhe rivalitet të lartë për kalimin në fazën tjetër.

Lajme

Shtrenjtohet edhe më shumë nafta në Maqedoninë e Veriut

Komisioni Rregullor për Energjetikë (KRRE) ka marrë vendim të ri për çmimet e derivateve të naftës, të cilat do të pësojnë ulje dhe ngritje, duke filluar nga mesnata.

Sipas vendimit të fundit, çmimi i benzinave do të ulet për 2 denarë për litër. Nga ana tjetër, çmimi i derivateve të tjera shënon rritje: nafta do të shtrenjtohet për 1 denarë, ndërsa vaji ekstra i lehtë për 0,5 denarë për litër.

Çmimet e reja të derivateve të naftës:

EUROSUPER BS-95: 91,0 denarë/litër

EUROSUPER BS-98: 93,0 denarë/litër

EURODIESEL (Nafta): 99,5 denarë/litër

Vaji ekstra i lehtë (EL-1): 98,5 denarë/litër

Çmimet e reja do të hyjnë në fuqi pas mesnate dhe do të vlejnë në të gjitha pikat e karburanteve në vend.

Lajme

Rrahja brutale në Gostivar, policia identifikon katër veta

Ministria e Brendshme përmes një njoftimi informoi se ka identifikuar tre persona të cilët, sipas një videoje në rrjetet sociale, kanë sulmuar dhunshëm dy të rinj në Gostivar.

Policia shpjegon se personat e identifikuar janë dy të mitur nga Gostivari dhe një 20-vjeçar nga Shkupi.

„Dy të mitur nga Gostivari janë thirrur në stacionin policor për bisedë zyrtare, ndërsa dokumentet e tyre të udhëtimit janë konfiskuar me urdhër të prokurorit publik. Personi i tretë është V.D. (20) nga Shkupi, për të cilin është dërguar njoftim zyrtar në Stacionin Policor në Shkup për procedurë të mëtutjeshme“, njoftoi policia.
Ata theksojnë se ndaj të treve do të zbatohet një procedurë e përshpejtuar para gjykatës sapo të kompletohet dokumentacioni i plotë për rastin. Sipas autoriteteve, sulmi ka ndodhur në orët e para të mëngjesit të 2 gushtit në rrugën „Borçe Jovanoski“, ku dy të rinj janë goditur me mjete dhe shkopinj druri.

Në rrjetet sociale u shfaq një video-incizim shqetësues nga Gostivari, në të cilin shfaqet një përleshje e ashpër fizike mes një grupi më të madh të rinjsh.

Sipas informacioneve të publikuara, gjatë rrahjes, njëri nga djemtë është goditur në pjesën e kokës, pas së cilës ka rënë në tokë dhe ka mbetur i palëvizshëm.
Përkundër faktit se po shtrihej në rrugë, në incizim shihet se sulmi ka vazhduar me goditje të shumta ndaj trupit të tij, gjë që ka shkaktuar reagime dhe dënime të ashpra në rrjetet sociale.(INA)