Lajme

QMK: Katër zjarre aktive në Maqedoni, me helikopter shuhet zjarri në rrugën Shkup – Bllacë

Për momentin në vendin tonë ka 12 zjarre në qiell të hapur, prej të cilëve katër janë aktivë, një është lokalizuar, ndërsa shtatë janë shuar, njoftoi Qendra për Menaxhim me Kriza (QMK).

Aktive janë zjarret në Komunën Prilep: fshati Beshishtë, ku është kapluar pyll i përzier, në Komunën Makedonski Brod në fshatin Creshnevë ku po digjet pylli me lisa dhe shkurre. Në Komunën Çashkë, ndërmjet burimeve të Babunës, vetëm tym në pjesën tokësore (zjarr pyjor).

Në Komunën e Çuçer Sandevës: midis fshatrave Bllacë dhe Çuçer, është djegur një pyll i përzier dhe bimësi e ulët. Dy helikopterë policie, një helikopter ushtarak, si dhe tre automjete të Drejtorisë për Mbrojtje dhe Shpëtim – një hermelin me një autocisternë, një pinzgauer dhe një automjet fuoristradë amarok – janë angazhuar për të shuar zjarrin që nga ora pesë e mëngjesit të sotëm. Ata po veprojnë në mbështetje të Brigadës për Mbrojtje nga Zjarret, e cila me disa zjarrfikës dhe automjete po shuan zjarrin e madh në një zonë të hapur në territorin e Komunës së Çuçer Sandevës mbi autostradën Shkup – Bllacë, i cili shpërtheu dje pasdite.

Siç deklaroi drejtori i Drejtorisë për Mbrojtje dhe Shpëtim (DMSH), Stojançe Angellov, arsyeja më e shpeshtë për zjarrin në komunën Çuçer Sandevë janë bishtat e cigareve të hedhura nga automjetet në lëvizje ose djegie me qëllim.

“Nga vëzhgimi im i drejtpërdrejtë, mund të them se ky zjarr shpërtheu në afërsi të rrugës kryesore për në Bllacë dhe shkaku i mundshëm është një bisht cigareje i hedhur nga një automjet në lëvizje ose zjarr vënie e qëllimshme. Prandaj, u bëjmë thirrje qytetarëve të sillen me përgjegjësi dhe të mos hedhin kurrë bishta cigaresh jashtë automjetit, edhe kur janë të bindur se janë shuar”, apelon Angelov.

Nëse vërejnë zjarr, theksoi ai, qytetarët menjëherë të lajmërohen në numrin 112.

MPB sot në mëngjes njoftoi se komunikacioni rrugor deri në vendkalimin Bllacë mbrëmë është normalizuar dhe është shfuqizuar ndalesa për automjetet për transportimin e mallrave dhe për autobusët. Komunikacioni në këtë seksion mbrëmë për shkak të zjarrit mbi rrugën magjistrale A4 Shkup – Bllacë te tuneli, i cili u zgjerua, ishte ridrejtuar për automjetet e udhëtarëve, ndërsa ishte vendosur edhe ndalesë për automjetet e mallrave.

Përndryshe, ishte lokalizuar zjarri në komunën Dellçevë ku po digjej deponia e qytetit.

Janë shuar zjarret në Komunën e Sarajit në fshatin Lubin ku digjej bimësi e ulët dhe pyll pishe, në Komunën Gjorçe Petrov në vendbanimin Dame Gruev, përgjatë lumit Lepenec ku u prek bimësia e ulët, pastaj në Komunën e Karposhit pranë spitalit në Bardovcë ku digjej shkurre dhe bimësi e ulët. Në Komunën e Prilepit, zjarri në Fabrikën Partizanka që përfshiu bimësi të ulët dhe një hekurudhë prej druri, digjej kashtë në Komunën e Çeshinovës-Obleshevo në fshatin Çeshinovë, si dhe mbeturina dhe bimësi të ulët në rrugën “Revolucioni i Tetorit” dhe goma dhe mbeturina në autostradën pranë stacionit të benzinës Makpetrol në Komunën e Kumanovës.

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.