Lajme

Turqia shënon 15 Korrikun, Ditën e Demokracisë dhe Unitetit Kombëtar

Turqia sot shënon 15 Korrikun, Ditën e Demokracisë dhe Unitetit Kombëtar, që shënon edhe përvjetorin e nëntë kur organizata terroriste FETO kreu një tentativë të dështuar grusht shteti, raporton Anadolu.

Aktivitetet e këtij viti në kuadër të 15 Korrikut në Turqi dhe në mbarë botën organizohen nën sloganin “Emri i Fitores është Turqia”. Aktivitete do të organizohen edhe në vendet e rajonit.

Gjithashtu ambasadat dhe konsullatat turke në mbarë botën organizojnë aktivitete përkujtimore, duke theksuar rëndësinë ndërkombëtare të përpjekjes së mposhtur të grushtit të shtetit.

Tentativa e dështuar për grusht shteti u krye nga organizata terroriste FETO më 15 korrik 2016, e udhëhequr nga Fetullah Gülen, i cili jetonte në Shtetet e Bashkuara të Amerikës (SHBA) për vite me radhë, ekstradimin e të cilit Ankaraja e kishte kërkuar zyrtarisht më parë nga SHBA-ja.

Gülen vdiq në kampusin Monroe të Spitalit St. Luke më 20 tetor 2024. Vdekja e udhëheqësit terrorist u zyrtarizua me një dokument që Departamenti amerikan i Shtetit i dërgoi autoriteteve turke.

Anëtarët e kësaj organizate terroriste kanë punuar për vite me radhë duke manipuluar provimet, duke u infiltruar kështu në institucionet shtetërore. Më pas, duke filluar nga dhjetori i vitit 2013, mbështetësit e FETO-s në gjyqësorin turk u përpoqën të ndiqnin penalisht shumë zyrtarë të lartë në një gjyq të montuar për korrupsion të dyshuar.

Disa vjet më vonë, pati një përpjekje të përgjakshme për grusht shteti nga terroristët e FETO-s, përkatësisht nga oficerë që ishin infiltruar në ushtrinë turke nga FETO.

Hetimi ndaj organizatës terroriste FETO ka treguar se ajo është një rrjet global që përbën kërcënim jo vetëm për Turqinë, por edhe për çdo vend tjetër në të cilin është aktive. Kjo është theksuar vazhdimisht nga zyrtarët turq.

Në natën e 15 korrikut, terroristët e FETO-s vranë 253 persona ndërsa plagosën mijëra të tjerë.

Lajme

Ferati-Hricová: Bashkëpunim më i fuqishëm për integrimin evropian dhe zhvillimin institucional

Ministri i Marrëdhënieve ndërmjet Bashkësive, Agon Ferati zhvilloi një takim pune me ambasadoren e Republikës së Sllovakisë në Maqedoninë e Veriut, Iveta Hricová.

Në takim u diskutua për avancimin e bashkëpunimit bilateral dhe mbështetjen ndaj proceseve që promovojnë dialogun ndërmjet bashkësive, barazinë dhe përfshirjen sociale.

Ministri Ferati dhe ambasadorja Hricová vlerësuan rëndësinë e shkëmbimit të përvojave në zbatimin e standardeve evropiane dhe forcimin e institucioneve që kontribuojnë në kohezionin shoqëror.

U theksua gatishmëria për të intensifikuar bashkëpunimin në fusha me interes të përbashkët, përfshirë zhvillimin e kapaciteteve institucionale, mbështetjen e projekteve që promovojnë tolerancën dhe diversitetin, si dhe bashkëpunimin në kuadër të procesit të integrimit evropian të Maqedonisë së Veriut.

Të dyja palët shprehën bindjen se marrëdhëniet e mira ndërmjet dy vendeve krijojnë një bazë të fortë për iniciativa të reja në dobi të qytetarëve.

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.