Lajme

Pritet rritje drastike e çmimit të cigareve

Komisioni i Bashkimit Evropian po synon të rrisë ndjeshëm tatimin mbi produktet e duhanit, një masë që po kundërshtohet fort nga industria dhe disa politikanë evropianë. Sipas tyre, ky plan do të çojë në një rritje drastike të çmimeve, duke nxitur në mënyrë të pashmangshme tregun e zi.

Propozimi i Komisionit synon të rrisë normën minimale të taksës për 1000 cigare nga 90 Euro në 215 Euro. Për duhanin e prerë imët, tarifa do të rritet nga 60 Euro në 215 Euro për kilogram. Si rezultat i këtij ndryshimi, industria e duhanit paralajmëron se çmimi i një pakete cigaresh në vende si Gjermania do të shkonte nga rreth 8.50 Euro në mbi 12 Euro, ndërsa një qese 30-gramëshe me duhan do të kushtonte më shumë se 18 Euro shkruan DW.

Sipas drejtuesit të Shoqatës Federale të Industrisë së Duhanit dhe Produkteve të Reja, Jan Mücke, kjo rritje është “plotësisht joproporcionale” dhe do të shërbente si “paketë stimulimi ekonomik për tregun e zi”. Ai thekson se rrjetet kriminale po bëhen gjithnjë e më fitimprurëse dhe se shumë konsumatorë po kalojnë nga blerja ligjore në atë të paligjshme për shkak të çmimeve të larta.

Kritika për këtë plan vjen edhe nga ana politike. Eurodeputeti i CSU-së, Markus Ferber, paralajmëron se kush e “shtrëngon shumë vidën e taksave” rrezikon të dëmtojë bizneset e ndershme dhe të ndihmojë kontrabandistët. Aprovimi i propozimit mbetet i pasigurt, pasi për miratimin e tij kërkohet edhe vota e shteteve anëtare dhe e Parlamentit Evropian.

Lajme

Mexhiti uron Kurtin për fitoren: Kosova sot votoj për vazhdimësi dhe besim në rrugën e nisur

Bashkëkryetari i partisë VLEN, Izet Mexhiti, ka deklaruar se fitorja e VV-së, është një konfirmim i qartë i besimit të qytetarëve të Kosovës në drejtimin politik të vendit.
“Urime për këtë rezultat dhe për vazhdimin e mandatit të ri, miku im, kryeministër Albin Kurti. Kjo fitore është shenjë e qëndrueshmërisë së vullnetit demokratik dhe e vazhdimësisë së një agjende qeverisëse që ka marrë mbështetje të gjerë.
Kosova sot e ka dhënë mesazhin e saj qartë. Ka votuar për vazhdimësi dhe besim në rrugën e nisur.
Urime Kosovë!”, ka shkruar Mexhiti.

Lajme

Abdixhiku: Shënojmë rritjen më të madhe! Kemi fituar 20 deputetë

Kandidati i LDK-së për kryeministër, Lumir Abdixhiku në konferencën për media u shpreh se Kosova edhe njëherë dëshmoi prekuri demokratike.

Për këtë gjë bëri një falënderim për të gjithë qytetarët dhe siç u shpreh, në veçanti votuesit e LDK-së.

“Kosova dëshmoi edhe njëherë pjekuri demokratike. Për këtë meritoni një falënderim qytetarë. Falënderim të veçantë dua t’u bëj edhe institucioneve përgjegjëse. Dua t’i falënderojë mbështetësit dhe votuesit e Lidhjes Demokratike të Kosovës”, tha ai.

Abdixhiku, për rezultatet e këtyre zgjedhjeve tha se LDK-ja sonte shënon rritjen më të madhe që ndonjë subjekt politik ka siguruar në këto zgjedhje.

“Lidhja Demokratike e Kosovës sonte shënon rritjen më të madhe që një subjekt politik ka siguruar në këto palë zgjedhje. Në vetëm një muaj fushatë, me kaq pak kohë, LDK-ja ka kaluar nga 13 për qind, në 18 për qind, përkatësisht në 20 mandate”, tha ai.

Lajme

Osmani: VV-ja s’e ka asnjë arsye ta refuzojë emrin tim për presidente

Kandidatja për presidente nga radhët e LDK-së, Vjosa Osmani, tha se Lëvizja Vetëvendosje nuk ka fare arsye që ta refuzojë atë që ta rimarrë këtë post.

Këto fjalë i tha në adresimin e parë për media pas daljes së rezultateve preliminare të zgjedhjeve të parakohshme parlamentare.

“Lëvizja Vetëvendosje nuk ka asnjë arsye që ta refuzojë emrin tim për presidente të shtatë të Republikës së Kosovës. Kaq është përgjigja ime”, tha Osmani në konferencë për media.

Lidhja Demokratike të Kosovës numëron 17 për qind bazuar në rezultatet në fjalë.