Lajme

Sondazhi i parë online për Tearcën/ Daut Memishi i VLEN me përparësi bindëse ndaj Nazim Taipit

Zgjedhjet lokale po afrohen dhe temperatura politike nëpër komuna po rritet dita-ditës. Një nga komunat më të përfolura është Komuna e Tearcës, ku tashmë janë bërë publike emrat e kandidatëve që do të garojnë për postin e kryetarit të komunës. Në këtë kuadër, platforma online “Tetova 1” ka organizuar një sondazh 24-orësh për të matur preferencat e qytetarëve mes dy kandidatëve kryesorë: Daut Memishi nga koalicioni VLEN dhe Nazim Taipi nga Fronti Europian (FE).

Rezultatet e këtij sondazhi flasin qartë për një epërsi bindëse të kandidatit të VLEN, Daut Memishi. Ai ka siguruar 62% të votave, krahasuar me 37% të mbështetjes që ka marrë kandidati i Frontit Europian, Nazim Taipi. Ky rezultat tregon një tendencë të qartë të qytetarëve të Tearcës për të kërkuar një drejtim të ri, të udhëhequr nga figura të reja dhe me një vizion ndryshe për të ardhmen e komunës.

Daut Memishi, i cili vjen nga radhët e VLEN – një koalicion i përbërë nga parti shqiptare në pushtet – po shihet si një alternativë serioze për qeverisjen lokale. Ai ka ndërtuar profilin e tij mbi transparencën, afërsinë me qytetarët dhe idetë konkrete për zhvillimin e Tearcës në fusha si infrastruktura, arsimi, bujqësia dhe përfshirja e të rinjve në proceset vendimmarrëse.

Përkrahja që po merr Memishi në këtë fazë paraprake, megjithëse vetëm nga një sondazh online, është një sinjal i qartë për një ndryshim të mundshëm në këtë komunë. Qytetarët duket se janë të lodhur nga premtimet e pambajtura dhe po kërkojnë një qasje më pragmatike dhe me prioritet interesin publik.

Ndërkohë, kampi i Frontit Europian, i përfaqësuar nga Nazim Taipi, përballet me një sfidë të vështirë për të rikuperuar terrenin e humbur dhe për të bindur qytetarët se përfaqësimi i tyre është ende relevant dhe i besueshëm. Taipi, megjithë përvojën e tij, po përballet me një rënie të besueshmërisë që i atribuohet një pakënaqësie të përgjithshme ndaj strukturave aktuale që kanë qenë pjesë e pushtetit vendor në vitet e fundit.

Sondazhe të tilla, edhe pse nuk janë përfundimtare dhe nuk përfaqësojnë domosdoshmërisht rezultatin zyrtar të zgjedhjeve, japin një pasqyrë të qartë mbi frymën politike që mbretëron në prag të zgjedhjeve lokale. Në këtë rast, fryma duket të jetë në favor të ndryshimit – dhe ky ndryshim përfaqësohet nga Daut Memishi.

Nëse ky trend vazhdon, Komuna e Tearcës mund të jetë një nga komunat ku opozita arrin një fitore domethënëse në zgjedhjet e ardhshme. Tani për tani, qytetarët kanë folur – dhe mesazhi i tyre është i qartë: ata kërkojnë freski, ide të reja dhe një drejtim të ri.

Lajme

Uji në Gostivar pastrohet nga ndotja

Më në fund uji në Gostivar është pastruar nga ndotja fekale dhe tash mund të përdoret si ujë teknik, por jo për pije dhe për përgatitje të ushqimit. Kjo u bë e ditur nga Komiteti Drejtues për menaxhim me kriza. Emilija Anevska nga “Ujësjellësi i Shkupit” tha se janë marrë gjashtë mostra nga konsumatorët në Gostivar dhe për tri ditë radhazi nuk janë evidentuar baktere koliforme. Megjithatë, monitorimi do të vazhdojë deri në konfirmimin se uji është i sigurt edhe për pije.

“Dua të them se uji mund të përdoret teknikisht, por gjithsesi qytetarët të mos e përdorin për pije dhe gatim. Në ditët në vazhdim do ta rrisim numrin e vendeve matëse në komunën e Gostivarit dhe do ta bëjmë kontrollin themelor në përputhje me rregulloren për ujë të pijshëm. Me monitorim të vazhdueshëm do të mund të vërtetojmë se uji në ditët në vazhdim do të mund të përdoret edhe për pije”, tha Emilija Anevska nga “Ujësjellësi i Shkupit”.

Ministri i Punëve të Brendshme, Pançe Toshkovski, u bëri apel drejtorëve të ndërmarrjeve publike dhe të gjithë personave që kanë lidhje direkte ose indirekte me cilësinë e ujit, që të veprojnë me përgjegjësi maksimale. Ai tha se shëndeti dhe siguria e qytetarëve duhet të jenë prioritet dhe se çdo përgjegjës duhet t’i zbatojë obligimet ligjore, veçanërisht në sigurimin e ujit të sigurt për pije.

“Dua t’u dërgoj një mesazh për të ardhmen të gjithë përgjegjësve në kuadër të komunave në territorin e Maqedonisë. Shpresoj që kjo të shërbejë si mësim dhe që, njëherë e përgjithmonë, në të ardhmen të veprojnë me profesionalizëm maksimal dhe në përputhje me kompetencat e tyre të përcaktuara me ligj sa i përket kontrollit të cilësisë së ujit. Sepse me shëndetin dhe sigurinë e qytetarëve nuk bëhet lojë. Çdo përgjegjësi duhet të merret me seriozitetin dhe profesionalizmin më të madh, veçanërisht përgjegjësia që lidhet me ujin, qoftë ujë teknik për përdorim apo ujë për pije”, tha , Pançe Toshkovski.

Edhe nga Komuna e Gostivarit njoftuan se uji nga rrjeti i ujësjellësit tashmë mund të përdoret për qëllime teknike.
Nga Komuna thanë se falë angazhimit të institucioneve lokale dhe qendrore, si dhe të gjitha palëve të përfshira në proces, po ndërmerren masat e nevojshme për sanimin e gjendjes.

Lajme

Nga 1 gushti shtrenjtohet ngrohja qendrore në Shkup, faturat rriten për rreth 140 denarë

Komisioni Rregullator për Energjetikë (KRRE) ka vendosur që çmimi i ngrohjes për konsumatorët e EMV-së të rritet mesatarisht me 5,96%, duke e rritur faturën mesatare mujore për rreth 140 denarë (nga 2.353 në 2.493 denarë), përcjell TV21. Për konsumatorët që furnizohen përmes ish-Ngrohtores “Shkup Veri”, tani kompania Energy Ecolink, çmimi do të rritet mesatarisht me 3,6 për qind, ndërsa për shfrytëzuesit e ESM Energjetika shtrenjtimi do të jetë rreth 5 për qind. Sipas KRRE-së, vendimi është marrë pas analizave ekonomike dhe teknike, ndërsa gjatë sezonit të kaluar sistemit të ngrohjes i janë bashkuar 1.521 konsumatorë të rinj.

Lajme

BDI: VLEN në panik, kur nuk i ke numrat, i porosit anketat

Bashkimi Demokratik për Integrim (BDI) ka reaguar ndaj anketës së publikuar nga koalicioni VLEN, duke e akuzuar atë se po përpiqet të krijojë një epërsi të rreme përmes, siç i quan, “anketave të fabrikuara”.

Sipas BDI-së, anketa nuk ofron transparencën e nevojshme, pasi, sipas reagimit, nuk dihet se kush e ka porositur dhe financuar, si është përzgjedhur mostra, kur është zhvilluar terreni dhe cilat kanë qenë pyetjet e plota të anketimit.

Në reagim thuhet gjithashtu se agjencia që ka realizuar anketën nuk ka pasur aktivitet serioz publik në matjen e opinionit gjatë dy viteve të fundit dhe se është riaktivizuar pikërisht në periudhën kur, sipas BDI-së, VLEN-it i nevojiten rezultate për të mbuluar rënien e mbështetjes politike.

BDI përmend edhe emrin e Vesna Kuzmanoviq, duke ngritur dyshime se, sipas saj, nuk bëhet fjalë për një matje të mirëfilltë të opinionit publik, por për një “operacion propagandistik” me qëllim krijimin e një perceptimi të favorshëm për VLEN-in.

Në fund të reagimit, BDI vlerëson se publikimi i anketave nuk mund të ndryshojë vullnetin e qytetarëve, duke e cilësuar materialin e publikuar si “propagandistik” dhe duke akuzuar VLEN-in për, sipas saj, servilizëm në Qeveri, degradim të përfaqësimit shqiptar dhe përpjekje për të fshehur dobësinë politike.