Lajme

Emir Sulejmani: 19 Tetori – Dita e popullit, e bashkimit dhe e shpresës për Zhelinën

Në një deklaratë të fuqishme që rezonon thellë me zemrat e qytetarëve, kandidati për kryetar komune, Emir Sulejmani, ka shpallur 19 Tetorin si një datë historike për Zhelinën – një ditë jo vetëm zgjedhore, por simbol i ndryshimit të shumëpritur, i bashkimit dhe i betimit për një të ardhme me dinjitet.

“19 Tetori nuk është një e diel si gjithë të tjerat. Është dita kur Zhelina do të zgjohet ndryshe. Dita kur hija e padrejtësisë bie, dhe lind drita e së ardhmes”, ka thënë Sulejmani, duke nënvizuar rëndësinë e kësaj date si një moment historik për të gjithë qytetarët e komunës.

Ai e ka cilësuar këtë ditë si “Ditën e Popullit”, ku çdo votë bëhet një akt besimi dhe çdo dorë e ngritur një flamur shprese. “Çdo votë është betim për dinjitet, çdo zë që ngrihet është zëri i popullit që nuk mund të heshtet më”, theksoi ai.

Sulejmani, i cili ka fituar mbështetje të gjerë në mesin e qytetarëve për qasjen e tij të drejtpërdrejtë dhe vizionin për një Zhelinë më të drejtë dhe më të zhvilluar, ka sqaruar se nuk garon për pushtet apo për privilegje personale.

“Hyj në këtë garë jo për karrige, por për bashkimin, dinjitetin dhe ndryshimin e vërtetë. Ky është misioni im. Ky është premtimi im. Dhe me ju, më 19 Tetor, ne do ta kthejmë shpresën në fitore.”

Ai i ka bërë thirrje qytetarëve të bashkohen në këtë ditë të madhe, për ta kthyer 19 Tetorin në një pikë kthese për komunën, ku zëri i popullit të jetë vendimi final dhe vullneti i shumicës të respektohet.

“Dita e Popullit, Dita e Vendimit! 19 Tetori do të shkruhet me shkronja të arta në historinë tonë. Është dita jonë!”, përfundon mesazhin e tij Emir Sulejmani.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.