Lajme

Emir Sulejmani: Shitja e tokës publike në komunën e Zhelinës, është krim moral dhe tradhti ndaj qytetarëve

Emir Sulejmani, kandidat i BDI për Kryetar të Komunës së Zhelinës, ka reaguar ashpër ndaj shitjes së tokave publike në këtë komunë, duke e quajtur këtë akt një krim moral dhe tradhti ndaj qytetarëve.

Në një postim të tij, Sulejmani theksoi se toka e Komunës së Zhelinës nuk është pronë private e udhëheqësisë aktuale, por një pasuri e përbashkët e qytetarëve, një trashëgimi e çmuar që është ruajtur dhe mbrojtur për shumë vite nga breza të tërë.

“Shitja e tokave publike është një akt që i dëmton qytetarët dhe është një tradhti ndaj pasurisë që ka qenë e përbashkët e të gjithëve ne. Toka e Komunës së Zhelinës është pasuri që duhet të ruhet dhe të zhvillohet për brezat që do të vijnë, jo të shitet për interesa personale”, shkruan Sulejmani.

Ai premtoi se, në rast se zgjidhet kryetar, do të mbrojë çdo centimetër të tokës publike dhe do të jetë i angazhuar për të rishikuar çdo kontratë të dyshimtë që lidhet me shitjen e tokës. Sulejmani theksoi se do të kërkojë llogari nga ata që janë përgjegjës për këto veprime dhe do të luftojë për ndalimin e çdo shitjeje të padrejtë.

“Unë nuk premtoj mrekulli, por premtoj që çdo kontratë e dyshimtë do të rishikohet dhe çdo njeri që ka vënë firmën mbi shitje të padrejta do të japë llogari”, tha ai.

Sulejmani e mbylli mesazhin e tij me angazhimin për të mbrojtur tokën e Komunës së Zhelinës dhe për të ndërtuar një të ardhme më të mirë për qytetarët, duke nënvizuar se kjo tokë është një amanet i brezave që kanë kaluar dhe duhet të mbrohet për ata që do të vijnë.

“Ne nuk mund ta lejojmë që toka e Zhelinës të shitet për interesa personale. Ajo është për t’u ndërtuar dhe zhvilluar, për brezat që do të vijnë”, përfundoi Sulejmani.

Për një të ardhme më të drejtë dhe të zhvilluar për Komunën e Zhelinës!

https://www.facebook.com/share/p/19N2EgzyLt/?mibextid=wwXIfr

Lajme

Unioni i Shoqatave Shqiptare në Mërgim shpërndan 6 mijë litra ujë për banorët e Gostivarit

Unioni i Shoqatave Shqiptare të Gostivarit në Mërgim ka realizuar sot një aksion humanitar për shpërndarjen e ujit të pijshëm për banorët e komunës së Gostivarit, në kushte të mungesës së ujit.

Gjatë aksionit u shpërndanë 6 mijë litra ujë, të paketuar në 600 bidonë, në afërsi të tregut të madh të qytetit, me synimin që ndihma të arrijë edhe te banorët e lagjeve më të largëta.

Në kumtesën e Unionit thuhet se aksioni nuk synon ta zgjidhë problemin me furnizimin me ujë, por të ofrojë mbështetje për qytetarët në këtë situatë.

“Jemi të vetëdijshëm se me këtë aksion nuk do ta zgjidhim problemin me ujin në Gostivar, por dëshmojmë se jemi krah i Gostivarit dhe i vëllezërve tanë në këto ditë të vështira të mungesës së ujit për pije”, thuhet në kumtesën e Unionit.

Unioni falënderoi ekipin, shoqatat anëtare, vullnetarët dhe donatorët që kontribuan në realizimin e aksionit.

Lajme

6 ditë pas stuhisë, Shkupi ende i mbuluar nga pemët rrëzuara

Ndonëse sot është dita e gjashtë prej kur Shkupi u përfshi nga një stuhi e fuqishme me erë prej 130 km/h, autoritetet komunale ende nuk kanë arritur të mënjanojnë dëmet. Nëpër rrugë e parqe gjithandej, pemët dhe degët e thyera vazhdojnë të pengojnë lëvizjen e lirë të qytetarë.

Komunat më të goditura nga stuhia ishin Karposhi, Çairi, Aerodromi dhe Qendra. Alsat vizitoi edhe sot disa parqe dhe rrugë të Çairit. Në shumë vende përsëri hasëm në degë të thyera. Disa prej tyre ishin grumbulluar në një vend, e të tjera ishin ashtu si kanë mbetur nga dita e martë.

“Ndonëse kanë kaluar gati një javë që nga dita kur stuhi e fuqishme goditi Qytetin e Shkupit, gjithandej nëpër bulevarde dhe parqe shohim se degët nga drunjtë e thyer ende kanë mbetur të pa pastruara”, raporton Zekirija Haxhiu, gazetar.

Drunjtë e rrëzuar dhe degët e thyera, nga stuhia lanë pas vetes shumë vetura e oborre të dëmtuara. Dhjetëra qytetarë nga komuna të ndryshme, kanë paraqitur dëmet tek autoritetet lokale dhe presin komisionet që të bëjnë vlerësimin e tyre.

Lajme

Bastisje në Shkup, arrestohet një 23-vjeçar nga fshati Brezë

Një 23-vjeçar nga fshati Brezë i Shkupit është arrestuar pasi gjatë një bastisjeje në shtëpinë dhe objektet e tij ndihmëse është gjetur një sasi e konsiderueshme kokaine.

Sipas njoftimit të Ministrisë së Punëve të Brendshme, bastisja është kryer nga zyrtarët e Njësisë për Luftimin e Trafikimit të Paligjshëm në bashkëpunim me Njësinë e Policisë Intervenuese pranë SPB Shkup.

“Personi S.B. (23) është privuar nga liria në Stacionin Policor Gazi Babë sipas nenit 215 të Kodit Penal dhe, pas dokumentimit të plotë të rastit, ndaj tij do të parashtrohet kallëzimi përkatës”, thuhet në njoftimin e MPB-së.