Lajme

Emir Sulejmani viziton fshatin Merovë: Zgjedhjet e 19 Tetorit janë referendum për të ardhmen e shqiptarëve

Kandidati për kryetar komune në Zhelinë nga BDI, Emir Sulejmani, sot zhvilloi një vizitë të rëndësishme në fshatin Merovë, një prej vendbanimeve kyçe në komunën e Zhelinës. Gjatë qëndrimit të tij, Sulejmani bashkëbisedoi me banorët e këtij komuniteti, ku diskutuan për sfidat dhe pritshmëritë e tyre lidhur me të ardhmen e Merovës dhe të gjithë komunës.

Në këtë takim, Emir Sulejmani theksoi rëndësinë e zgjedhjeve lokale që do të mbahen më 19 Tetor, duke i cilësuar ato si një referendum të rëndësishëm për të përcaktuar të ardhmen e shqiptarëve në këtë rajon. Ai u shpreh se koha ka ardhur që qytetarët të marrin fatin e tyre në dorë dhe të vendosin për një drejtim të ri, më të mirë e më perspektivë për brezat e ardhshëm.

“Merova, në zemër të malësisë, është një komunitet i fortë dhe i bashkuar. Rinia dhe burrat e këtij vendi janë të vendosur për të ruajtur dinjitetin, traditat dhe vlerat e tyre, por edhe për të ndërtuar një të ardhme të ndritur për fshatin dhe për të gjithë komunën e Zhelinës. Kjo është arsyeja pse këto zgjedhje nuk janë thjesht një proces formal, por një mundësi e artë për ndryshim dhe zhvillim”, tha Sulejmani.

Ai bëri thirrje që gjithë banorët të jenë pjesëmarrës aktiv në këtë proces zgjedhor dhe të mbështesin vizionin e tij për një komunë ku shërbimet publike do të jenë më të mira, infrastruktura do të përmirësohet dhe do të investohet më shumë në arsim dhe zhvillim ekonomik.

Banorët e Merovës mirëpritën kandidatin Sulejmani me entuziazëm dhe ndanë me të shqetësimet dhe pritshmëritë e tyre. Ata theksuan nevojën për më shumë investime në rrugë, ujësjellës, arsimin lokal dhe krijimin e vendeve të punës, duke shprehur besimin se me një udhëheqje të re dhe të përgjegjshme, këto nevoja do të përmbushen.

Ky takim i kandidatit për kryetar komune nga BDI në Merovë dëshmon angazhimin e tij të sinqertë dhe dëshirën për të qenë zëri i komunitetit në organet vendore të pushtetit, duke u përpjekur për të sjellë ndryshime pozitive që do t’u shërbejnë të gjithëve pa përjashtim.

Në prag të zgjedhjeve, Emir Sulejmani vijon takimet me qytetarët e komunës së Zhelinës, duke mbledhur ide dhe propozime për një plan të qartë dhe të realizueshëm për zhvillimin e komunës. Ai premton punë të palodhshme dhe angazhim maksimal për t’u përgjigjur pritshmërive të banorëve dhe për të ndërtuar një komunë më të fortë, më të pasur dhe më bashkëpunuese.

“Në Merovë dhe në çdo cep të komunës së Zhelinës, ne jemi bashkë për një të ardhme më të mirë!” – përfundoi Sulejmani.

Banorët e Merovës dhe të gjithë komunës së Zhelinës presin me shpresë dhe besim ditën e zgjedhjeve, duke e parë te Emir Sulejmani mundësinë për një ndryshim të vërtetë.

Lajme

30 përqind më shtrenjtë, por kontejnerët e papastruar. Kumanovarët ankohen!

Kështu duken disa nga rrugët kryesore të Kumanovës në pikë të verës, ku qyteti gëlon gjithkah, pasi këtu janë edhe mërgimtarët.

Temperaturat arrijnë rreth 40°C e kontejnerët e mbeturinave mbeten të tejmbushur me javë.

Jo vetëm në bulevardet kryesore, por edhe në disa rrugë e rrugica që i denoncuan qytetarët.

Nga ana tjetër prej muajit korrik janë shtrenjtuar për 30% faturat e mbeturinave në Kumanovë.

Vendimi i Këshillit komunal ka irrituar qytetarët, të cilët shprehin revoltën e tyre gjatë pagesave në sportele. Ata thonë jo vetëm që u kushton më shumë, por vonesat në mbledhje të plehrave po ndodh tani në 6 muajt e fundit. Druajnë për ndonjë epidemi nga papastërtitë nëpër rrugë.

Nga N.P. “Pastrimi dhe Gjelbërimi” në Kumanovë thonë se në sezon të verës janë kurbetçinjtë që po bëjnë konsum të shtuar dhe si rrjedhojë ka mbingarkesë të mbeturinave në qytet. Ushtruesi detyrës drejtor Sasho Tomiq tha se kanë vënë të gjitha kapacitet në funksion, por aq kanë fuqi.

“Në këtë periudhë, në 30 ditët e fundit, ka numër të shtuar të bashkë qytetarëve tanë, të cilët përkohësisht janë duke punuar në vendet perëndimore, andaj këtu është rritur frekuentimi në Kumanovë dhe vendbanimet përreth qytetit, njëkohësisht është rritur dhe sasia mbeturinave nëse rëndomë kemi hequr 60 ton mbeturina në ditë, tani heqim 70-80 ton mbeturina në ditë”, tha Sasho Tomiq – u.d drejtor i N.P “Pastrimi dhe Gjelbërimi” – Kumanovë.

Përndryshe, nga drejtoria ankohen se po punojnë me kamionë të vjetruar dhe në numër të paktë, ku ka mungesa edhe në punëtorë. Madje, ushtruesi detyrës që udhëheqë ndërmarrjen tha se e ka gjetur të mbytur në borxhe, ku vetëm ndaj DAP kanë paguar 20 milionë denarë për 8 muaj. Borxhe kanë edhe ndaj kompanive që blejnë pjesë rezervë të kamionëve dhe ndaj pagave të punëtore, disa prej të cilëve kanë nisur procese gjyqësore. Ndërsa, veç rreth 80% e faturave paguhen rregullisht nga ana e qytetarëve, të cilëve u bëhet thirrje të shlyejnë borxhet me kohë, duke iu mundësuar pagesat me këste, për ti evituar shpenzimet e noterëve dhe përmbaruesve.

Lajme

Tajfuni godet Kinën, evakuohen mbi 1 milion banorë

Kina po përgatitej prej disa ditësh për mbërritjen e stuhisë në bregdetin lindor, ndërsa puna dhe shërbimet e transportit ishin pezulluar në disa zona përgjatë trajektores së parashikuar të saj.

Qendra e tajfunit kaloi mbi bregdetin afër qytetit Yuhuan, në provincën Zhejiang, rreth orës 17:30 (09:30 GMT), tha Qendra Kombëtare Meteorologjike e Kinës në një postim online, shkruan Yahoo News.
Shpejtësia maksimale e erës afër qendrës së tajfunit ishte mbi 150 kilometra në orë në momentin kur ai preku tokën, njoftoi Qendra Meteorologjike. Në pjesët qendrore dhe lindore të Zhejiang-ut pritet të bien nga 250 deri në 500 mm reshje shiu.

Autoritetet zhvendosën më shumë se 900,000 banorë nga qyteti i Wenzhou-ut dhe hapën më shumë se 1,000 strehimore emergjente.

Rreth 1,400 fluturime nga dhe drejt dy aeroporteve kryesore të pasagjerëve në Shanghai u anuluan të dielën, raportoi transmetuesi shtetëror CCTV.

Lajme

Vuçiq: Deklarata e Zelenskyt, goditja më e madhe kundër shqiptarëve në 14 vjet

Presidenti i Serbisë, Aleksandar Vuçiç, ka thënë se në Prishtinë po bëhet “gjueti shtrigash” kundër presidentit ukrainas, Volodymyr Zelensky, pas deklaratës së tij kundër pavarësisë së Kosovës në Beograd.

“Prishtina ka reaguar shumë ashpër kundër Zelenskyt. Atje po bëhet një gjueti shtrigash kundër tij. Vetëm imagjinojeni çfarë rezultati do të ishte sikur të vinte dhe të thoshte: ‘Po, Kosova është Serbi’. A kanë pasur shqiptarët goditje më të fortë se kjo në 14 vitet e fundit?”, ka thënë Vuçiç të dielën në Beograd.

Ai është pyetur nga gazetarët nëse pret ndonjë pasojë për serbët e Kosovës pas kësaj. Ai ka thënë se “e di që është shumë e vështirë për ta, por ne nuk mund të luftojmë kundër NATO-s”.