Lajme

Emir Sulejmani viziton banorët e Pallaticës: Nga një kafe e zakonshme, te një vendim i madh për ndryshim në Zhelinë

Mbrëmë, në zemër të Lagjes së Epërme, në Pallatic, ndodhi ajo që shumëkush e quan e zakonshme, por që shpesh është fillimi i gjërave të mëdha – një kafe mes miqsh, bashkëbisedim i hapur dhe fjala e lirë e popullit që, kur dëgjohet me vëmendje, shndërrohet në vendim.

Kandidati për kryetar të Komunës së Zhelinës nga radhët e BDI-së, Emir Sulejmani, ishte i pranishëm në këtë takim të përzemërt, ku biseda e lirë mes banorëve të lagjes u kthye në një moment reflektimi dhe vendosmërie për të ardhmen e komunës. Ajo që nisi si një takim i zakonshëm shpejt u kthye në një zë të përbashkët për ndryshim të madh dhe të domosdoshëm.

“Ndryshimi nuk nis gjithmonë nga podiumet apo sallat e mëdha – ai lind nga shtëpia, nga sofra, nga kafenetë ku njerëzit flasin me zemër, ku shprehjet janë të sinqerta dhe të çliruara. Aty ku nuk ka filtra, aty ku populli flet drejt,” – u shpreh Emir Sulejmani gjatë këtij takimi.

Në diskutim dolën shumë nga sfidat me të cilat përballen qytetarët e Zhelinës: mungesa e investimeve të qëndrueshme, infrastruktura e lënë pas dore, mungesa e mbështetjes për të rinjtë dhe bujqit, por edhe nevoja për një komunë që i dëgjon dhe i përfaqëson të gjithë, pa dallim.

Emir Sulejmani theksoi se platforma e tij është ndërtuar pikërisht mbi këtë frymë: bashkim, dëgjim dhe veprim për të mirën e përbashkët. Ai u zotua se Zhelina do të jetë një komunë që nuk do të mbetet më peng i premtimeve të pambajtura apo politikave të vjetra që i kanë lodhur qytetarët.

“Koha e monologëve ka kaluar. Tani është koha e dialogut, e dëgjimit të ndërsjellë dhe e ndërtimit të një Zheline që nuk e braktisin të rinjtë, por e zgjedhin për të jetuar e për të ndërtuar të ardhmen,” – tha Sulejmani.

Takime të tilla, sipas tij, do të vazhdojnë në çdo lagje dhe fshat të komunës, sepse ndryshimi i vërtetë nuk imponohet – ai ndërtohet me njerëzit dhe për njerëzit.

Në fund të takimit, banorët e Lagjes së Epërme shprehën mbështetje të hapur për kandidaturën e Emir Sulejmanit, duke e cilësuar si një zë të ri, me ide të qarta dhe vullnet të fortë për ta nxjerrë Zhelinën nga stanjacioni.

Lajme

Kumanovari dhuron 26 mijë euro për rrugën që mundëson qasjen në xhaminë më të vjetër në rajon

Husejn Bajrami, djali i të ndjerit hoxhë Nexhmedin Bajrami nga Kumanova, ka financuar blerjen e rrugës që mundëson qasjen në Xhaminë “Koxha Mehmed Beu” në fshatin Tabanoc.

Marrëveshja për blerjen u nënshkrua më 19 tetor 2026, në prani të myftiut të Kumanovës, h. Abedin ef. Imeri, dhe anëtarëve të familjes Selmani nga Llojani.

Rruga ka një sipërfaqe prej 529 metrash katrorë, me gjerësi prej shtatë metrash, ndërsa vlera e blerjes arrin në 26.450 euro, shumë e paguar nga Husejn Bajrami.

Muftinia e Kumanovës e falënderoi z.Bajrami për këtë kontribut, si dhe familjen Selmani për bashkëpunimin, duke shprehur lutjen që kjo vepër të pranohet si sadaka dhe të shpërblehet me të mira.

Lajme

Të dielën nis ora dimërore, akrepat lëvizin një orë prapa

Ora verore këtë vit përfundon të dielën, më 25 tetor në orën 3:00 të mëngjesit duke u zhvendosur një orë prapa.

Në vitin 2018, Komisioni Evropian shqyrtoi heqjen e ndërrimit të kohës sezonale dhe më pas zhvilloi një konsultim publik në të cilin morën pjesë rreth 4.6 milionë njerëz.

Megjithatë, ndonëse 84 përqind e të anketuarve ishin në favor të heqjes së tij, anëtarët nuk arritën të arrinin një marrëveshje se cila kohë do të ishte e përhershme, kështu që propozimi nuk u zbatua.

Vendet e BE-së ende kalojnë në orën e verës në pranverë dhe në orën e dimrit në vjeshtë.

Në Azi, Kina, India, Japonia, Koreja e Jugut, Tailanda, Vietnami, Indonezia, Malajzia dhe Singapori nuk e përdorin kohën e kursimit të verës.

Kina e hoqi orën e verës në vitin 1991.

Në Lindjen e Mesme , Arabia Saudite, Emiratet e Bashkuara Arabe, Katari, Kuvajti dhe Bahreini nuk e ndryshojnë orën gjatë vitit.

Irani e hoqi ndërrimin sezonal të orës në vitin 2022, dhe që nga viti 2023 nuk e ndryshon më kohën midis verës dhe dimrit.

Në Amerikën e Jugut , Brazili, Argjentina, Kolumbia, Peruja dhe Ekuadori nuk e përdorin kohën sezonale.

Në Australi, rregullat ndryshojnë sipas shtetit. Uellsi i Ri Jugor, Viktoria, Australia Jugore, Tasmania dhe Territori i Kryeqytetit Australian po kalojnë në orën verore, ndërsa Queensland, Australia Perëndimore dhe Territori Verior nuk e ndryshojnë orën, raportoi portali Maariv.

Ndër arsyet për heqjen e ndërrimit të kohës sezonale janë funksionimi më i thjeshtë i jetës së përditshme , shmangia e problemeve në sistemet kompjuterike, transportin dhe biznesin, si dhe fakti që në vendet pranë ekuatorit, gjatësia e ditës nuk ndryshon ndjeshëm gjatë vitit.

Lajme

„Pesë veta rrahin një fëmijë dhe e filmojnë“: Dëshmi shqetësuese nga Tetova

Pesë të mitur, të moshës rreth 13 dhe 14 vjeç, sipas pretendimeve të një prindi, kanë ndaluar dy fëmijë 11-vjeçarë në qendër të Tetovës, i kanë kapur për fyti dhe janë përpjekur t’ua heqin xhaketat për të kontrolluar nëse mbanin veshje me simbolet e grupit të tifozëve „Vojvodi“. Incidenti, sipas prindit, ka ndodhur derisa fëmijët po shkonin në stërvitje.

Për rastin ka alarmuar publikisht Darko Gavro, i cili në një postim në grupin e Facebook-ut „Go ljubim Tetovo“ pretendon se djali i tij dhe një fëmijë tjetër janë keqtrajtuar pranë ëmbëltores „Geopiko“ dhe objektit „Nashe dete“.

Sipas dëshmisë së tij, fëmijët ishin rrugës për në Qendrën Sportive, ku duhej të merrnin pjesë në stërvitjen e klubit për fëmijë „Fit Kid“, kur u ndaluan nga grupi i të miturve.

„I kanë kapur për fyti dhe janë përpjekur t’ua heqin xhaketat për të parë nëse janë ‘Vojvodi’“, ka shkruar prindi.

Ai pretendon se njëri prej të miturve e ka filmuar incidentin me telefon celular. Sipas informacioneve që ka marrë, videoja ishte menduar të publikohej në një grup të veçantë në TikTok, ku, siç thotë ai, shpërndaheshin pamje të rrahjeve nëpër Tetovë.

Prindi bën të ditur se rasti është denoncuar në polici dhe se bashkëshortja e tij ka shkuar për të dhënë deklaratë.

Në postimin e tij, ai paralajmëron se nuk bëhet fjalë për një incident të izoluar, pasi pretendon se ka informacione edhe për raste të tjera të keqtrajtimit të fëmijëve, gjatë të cilave të miturve u janë hequr xhaketat dhe trenerkat.

„Policia hesht. Të gjithë e dinë dhe i lëshojnë fëmijët në rrugë me frikë“, ka shkruar Gavro, duke kërkuar shtim të pranisë policore dhe të patrullave nëpër Tetovë.

Ai u ka bërë thirrje publike edhe institucioneve përgjegjëse për delikuencën e të miturve që t’i hetojnë rastet e tilla, duke paralajmëruar se keqtrajtimi i fëmijëve nga grupe po shndërrohet në një problem serioz.

Deri më tani, informacionet për rrethanat e incidentit bazohen në dëshminë publike të prindit. Ministria e Punëve të Brendshme nuk ka dhënë konfirmim zyrtar për denoncimin, as për pretendimet lidhur me filmimin e organizuar dhe publikimin e incidenteve të tilla./Skopje1.mk