Lajme

Mexhiti dhe Osmani premtojnë modernizimin e komunës së Çairit me arkitekt botëror

Gara për Çairin sa vjen e bëhet më e fortë. Dy kandidatët për kryetar të kësaj komune, forcat po i masin edhe përmes prezantimit të arkitektëve të huaj që sipas tyre do ta modernizojnë Çairin Izet Mexhiti nga VLEN ka zgjedhur ekspertin e urbanizmit Bayram Vardar, i cili ishte pjesë e ekipit të presidentit Rexhep Taip Erdogan në qytetin e Stambollit dhe urbanist kryesor në qytetin e Bursës, për të gjetur zgjidhje për lagjet më të dendura të kësaj komune.

Izet Mexhiti, kandidat i VLEN për Çairin

“Neve na duhet zgjidhje më shumë për Dizhonin, Serovën dhe Gazi Babën. Këto janë tre segmentet më të dendura me shtëpi individuale. Na duhet zgjidhje gjithashtu për komunikacionin. Kjo rrugë duhet të zgjerohet-Rruga Cvetan Dimov”.

E, eksperti Bayram Vardar zotohet se do punoj mbi këto problematika, duke shtuar se të njejtat probleme janë edhe në disa lagje në Bursa dhe Stamboll.

Bayram Vardar, ekspert i urbanizmit

“Të njejtat probleme që ekzistojnë në Çair, të njejtat probleme ekzistojnë edhe në lagjen Zafer të Bursës, në Osmangazi të Bursës, në lagjen Esenler të Stambollit dhe në Bayrampasa…Ne jemi këtu për të punuar. Do të analizojmë, pastaj do të punojmë mbi të”.

Në anën tjetër, kandidati i BDI-së Bujar Osmani, ka zgjedhur arkitekt meksikan. Michel Rojkind thotë se me Osmanin po punojnë për skenarin më të mirë për Çairin.

Michel Rojkind, arkitekt

“Kemi folur për rivitalizimin e qendrës historike, mundësinë e lëvizshmërisë dhe rëndësinë e vendit ku parkohen veturat dhe cilat janë mundësitë e krijimit të këtyre qyteteve që janë më shumë për këmbësorë, hapësira të gjelbërta”.

Osmani shprehet se Çairi meriton shumë se vetëm një rindërtim, meriton një vizion që do ta shndërrojë në një vend urban, bashkëkohor dhe modern për të jetuar.

Bujar Osmani, kandidat i BDI-së Çairin

“Në vizionin e ri, Çairi do të zhvillohet si një komunë moderne, funksionale dhe e sigurt, ku nevojat e qytetarëve do të jenë në qendër të strategjisë: qasje e lehtë, hapësira publike, estetikë e pastër dhe liri lëvizjeje”.

Zgjedhjet janë caktuar për më 19 tetor, ndërsa duket sikur “fushata” kryesore e dy koalicioneve shqiptare është përqendruar kryesisht në Çair.

Lajme

Incident në Pallaticë: Qytetarët raportojnë kërcënime pas një debati mes bashkëfshatarëve

Një rast kërcënimi është raportuar më 12 janar 2026 në SPB Tetovë nga A.B. (64) nga fshati Pallaticë, komuna e Zhelinës. Sipas denoncimit, rreth orës 16:30, derisa ndodhej në objektin e tij hotelierik bashkë me djalin e tij V.S., ka ndodhur një debat paraprak me një bashkëfshatar, pas së cilit personi me iniciale G.N. dyshohet se i ka kërcënuar ata.

Ngjarja ka shkaktuar shqetësim te të përfshirët, ndërsa rasti është raportuar menjëherë në polici. Zyrtarët policorë kanë nisur procedurat hetimore dhe po ndërmarrin masa për zbardhjen e plotë të rrethanave të incidentit, si dhe për dokumentimin e provave përkatëse.

Nga SPB Tetovë njoftojnë se pas kompletimit të rastit do të veprohet në përputhje me dispozitat ligjore.

Lajme

Për një vit, mbi 11 mijë punëtorë nga Maqedonia kanë marrë leje pune në Kroaci

Kryetari i Lidhjes së Sindikatave të Maqedonisë, Slobodan Trendafillov në një postim në Facebook thotë se mbi 11 mijë punëtorë të kualifikuar nga Maqedonia kanë shkuar për të punuar në Kroaci, përcjell TV21. Trendafillov thotë se biznesi po përballet me mungesë të fuqisë punëtore.

“Në vitin 2025, 11.384 punëtorë nga Maqedonia kanë marrë leje pune për të punuar në Kroaci, dhe shumë të tjerë janë larguar drejt Malit të Zi, Sllovenisë, Gjermanisë etj, ndërsa punëdhënësit e Maqedonisë kanë zëvendësuar vetëm 8.500 prej tyre me punëtorë nga Bangladeshi, Nepali dhe India (për të cilët dyshohet se kanë qëndruar në Maqedoni). Punëdhënësit ankohen se nuk kanë punëtorë të kualifikuar, qeveria mendon se nuk duhet të rriten pagat, ndërsa punëtorët largohen nga Maqedonia”, thotë kreu i LSDM-së.

Lajme

LSDM: Mickoski e çon vendin drejt izolimit me fushatë anti-BE

Qeveria aktuale e Kryeministrit Mickoski, në vend të integrimit, po e çon vendin drejt izolimit, akuzojnë sot nga LSDM.

“Një bashkëpunëtor i ngushtë i Mickoskit dhe zv. kryeministrit në qeverinë e tij është Ivan Stoilkoviq, qëndrimet e hapura pro-ruse dhe lidhjet e drejtpërdrejta të të cilit me Moskën përbëjnë një kërcënim serioz për orientimin euroatlantik të vendit.

Vetëm pak ditë më parë, zëvendëskryeministri Ivan Stoilkovic mori pjesë në festimin e Ditës së Republikës Serbe së bashku me grupin “Ujqërit e Natës”, të njohur për mbështetjen e Putinit dhe përhapjen e narrativave anti-perëndimore.

Edhe më keq se kjo është se vetë kryeministri Mickoski, pavarësisht deklaratave publike për bashkëpunim strategjik me SHBA-në dhe integrimin në BE, me veprimet e tij dhe lidhjet e ngushta me Vuçiqin dhe SNS-në, po bën gjithçka të kundërtën, duke e çuar Maqedoninë drejt izolimit.

Reformat e BE-së shmangen qëllimisht, konfliktet me fqinjët krijohen qëllimisht, arsyet shpiken për të bllokuar negociatat. E gjitha është një skenar i sajuar, pjesë e një fushate anti-BE që qeveria të vazhdojë të plaçkitë vendin.

Sipas hulumtimit të fundit nga viti 2025, deri në 70% e qytetarëve të Maqedonisë së Veriut mbështesin anëtarësimin në BE, dhe 77% e shohin anëtarësimin në NATO si pozitiv”, thonë nga LSDM.