Lajme

Gjykata austriake lejon përdorimin e Sheriatit në arbitrazh privat

Nje vendim i fundit nga Gjykata Rajonale e Vjenës, ka lejuar përdorimin e ligjit islam (Sheriatit) për zgjidhjen e mosmarrëveshjeve në arbitrazh privat, nëse palët bien dakord për këtë, kanë njoftuar mediat lokale.

Rasti kishte të bënte me dy burra që kishin nënshkruar një kontratë ku parashikohej që, në rast konflikti, një tribunal arbitrazhi do të vendoste “bazuar në ligjin islam (Ahlus-Sunnah wal-Jamaah), në përputhje me drejtësinë dhe me njohuritë dhe bindjen më të mirë.”
Termi “Ahlus-Sunnah wal-Jamaah” i referohet komunitetit islamik sunit. Pas një mosmarrëveshjeje financiare, tribunali i arbitrazhit vendosi kundër paditësit, duke e detyruar atë të paguante një shumë prej 320,000 eurosh.

Paditësi më pas e sfidoi këtë vendim në Gjykatën Rajonale të Vjenës, duke argumentuar se ligji islam është i paqartë dhe interpretohet ndryshe nga dijetarë të ndryshëm. Ai shtoi se pranimi i Sheriatit si bazë vendimmarrjeje bie në kundërshtim me vlerat themelore të sistemit juridik austriak.

Gjykata, megjithatë, vendosi se marrëveshja e arbitrazhit ishte e vlefshme dhe se vendimi i tribunalit nuk binte në kundërshtim me rendin publik apo vlerat bazë të Austrisë.

Gjykata theksoi se, në rastet që lidhen me pretendime pasurore, palët kanë të drejtë të zgjedhin vetë rregullat që do të zbatohen në arbitrazh – përfshirë edhe ligjin islam.

“Zbatimi i ligjit islam nuk mund të verifikohet në mënyrë të plotë, por ajo që ka rëndësi është që vendimi nuk bie ndesh me vlerat bazë të rendit juridik austriak,” thuhej në vendimin e gjykatës.

Lajme

“Merimanga” në aksion, largohen 135 makina në Qendër të Shkupit

135 makina të parkuara në mënyrë të parregullt janë larguar me automjetet speciale “Merimanga” në territorin e Komunës Qendër të Shkupit, gjatë javës së kaluar. Sipas Ndërmarrjes Publike “Parkingjet e Komunës Qendër”, automjetet janë larguar në periudhën nga 5 deri më 11 tetor, pasi pengonin zhvillimin normal dhe të sigurt të komunikacionit. Nga ndërmarrja njoftojnë se aksionet do të vazhdojnë çdo ditë, me qëllim rritjen e sigurisë në trafik dhe ndërgjegjësimin e shoferëve për parkimin e duhur.

Lajme

“Shpulla” rikthehet si mjet edukimi në bankat shkollore në Danimarkë

Qeveria e Danimarkës ka paraqitur një projektligj që do t’u lejojë mësimdhënësve të përdorin forcë fizike ndaj nxënësve në situata të caktuara, me qëllim ruajtjen e rendit dhe sigurisë në shkolla.

Sipas Ministrisë së Arsimit, ndërhyrja do të lejohet në rastet kur nxënësit pengojnë rëndë mësimin, rrezikojnë veten ose të tjerët, ushtrojnë dhunë fizike apo dëmtojnë pronën.

Forca fizike do të përdoret vetëm si masë e fundit, pasi të jenë provuar mënyra të tjera të ndërhyrjes. Ajo duhet të jetë proporcionale, sa më e butë dhe të zgjasë sa më pak.

Projektligji u paraqit në parlamentin danez më 8 tetor. Nëse miratohet, rregullat e reja pritet të hyjnë në fuqi në gusht të vitit 2027.
Propozimi ende nuk është miratuar.

Lajme

Digjet vetura zyrtare e zëvendësdrejtorit të Lotarisë Shtetërore

Një veturë zyrtare e Lotarisë Shtetërore të Maqedonisë, e përdorur nga zëvendësdrejtori i përgjithshëm Ahmet Miftari, është djegur gjatë natës, pas mesnate, në Shkup.

Informacioni është konfirmuar edhe nga Ministria e Punëve të Brendshme (MPB), e cila për median „Fokus“ bëri të ditur se bëhet fjalë për një automjet zyrtar të Lotarisë Shtetërore.

„Më 13.10.2026, në orën 02:12, në SPB Shkup, M.A. (42) nga Shkupi ka raportuar se në rrugën ‘Krste Asenov’ në Shkup ishte djegur një automjet i tipit ‘Beijing Beich’, me targa të Shkupit, në pronësi të Lotarisë Shtetërore të Maqedonisë, të cilin ai e kishte drejtuar më parë“, njoftojnë nga MPB.

Zjarri është shuar nga Brigada e Zjarrfikësve, ndërsa policia po ndërmerr masa për zbardhjen e plotë të rastit.