Lajme

Zhelina pa asnjë çerdhe pas 8 vitesh pushtet – Emir Sulejmani zotohet për ndryshim të madh në arsimin parashkollor

Në një reagim të fortë dhe me tone të qarta kritike, Emir Sulejmani, kandidati për kryetar të Komunës së Zhelinës nga BDI, ka ngritur zërin ndaj një realiteti të papranueshëm që vazhdon të rëndojë mbi qytetarët: mungesa totale e çerdheve publike në komunë, pavarësisht se janë ndërtuar dhe funksionojnë 6 shkolla komunale.

“❌ 6 shkolla komunale, asnjë çerdhe për fëmijët tanë! Ky është realiteti i hidhur në Zhelinë pas 8 viteve pushtet,” – shkruan Sulejmani në një postim të publikuar në rrjetet sociale, duke sjellë në vëmendje një nga problemet më të mëdha me të cilat përballen familjet e reja në komunë.

Një vizion i ri për fëmijët dhe familjet e Zhelinës

Sipas Sulejmanit, fëmijët e kësaj komune meritojnë më shumë sesa premtime boshe dhe infrastrukturë arsimore të pjesshme. Ai zotohet se nëse merr besimin e qytetarëve, do të hapë për herë të parë në historinë e komunës çerdhen publike komunale dhe do të ndërtojë një sistem të qëndrueshëm kujdesi dhe edukimi për fëmijët e moshës parashkollore.

“✅ Me ne, për herë të parë do të hapet çerdhja komunale dhe çdo shkollë do të ketë një paralele çerdheje. Fëmijët tanë meritojnë kujdes, familjet tona meritojnë mbështetje!” – thekson ai.

Kjo qasje, sipas tij, nuk është vetëm investim në edukim, por një domosdoshmëri për mirëqenien e familjes dhe zhvillimin shoqëror të komunitetit në Zhelinë.

Përtej fjalëve – kohë për zgjidhje konkrete

Sulejmani e ka bërë të qartë se nuk do të jetë një kandidat i fjalëve të mëdha pa mbulim. Ai ka nisur një fushatë që synon të adresojë nevojat reale të qytetarëve, duke vendosur theks të veçantë në:

Fuqizimin e shërbimeve publike për fëmijët

Lehtësimin e jetës për prindërit që punojnë

Ngritjen e standardeve të edukimit në fazën më të hershme të jetës së një fëmije

Ndryshe nga pushteti aktual që, sipas tij, ka lënë në harresë këtë segment të ndjeshëm të shoqërisë, vizioni i tij është që çdo lagje dhe çdo shkollë të jetë një pikë fillestare për zhvillimin e barabartë të çdo fëmije.

“Mjaft më me pritje – është koha të investojmë tek brezi i ardhshëm”

Ky është mesazhi i drejtpërdrejtë që Emir Sulejmani i drejton qytetarëve të Zhelinës, veçanërisht prindërve që çdo ditë përballen me sfida për të siguruar kujdes për fëmijët e tyre të vegjël. Ai i fton qytetarët të bëhen pjesë e një ndryshimi që fillon nga themelet – nga fëmijët dhe e ardhmja e tyre.

Lajme

Kush është Valdrin Uka, drejtori i ri ekzekutiv i Shkëndijës

Më shumë se shtatë vite pjesë e klubit, Uka është një nga kuadrot e rritura dhe të përgatitura brenda strukturave të Shkëndijës, ndërsa ndryshimet e fundit pasqyrojnë planin e klubit për të ndërtuar një menaxhment të qëndrueshëm me njerëz nga brenda.

Ndryshimet e fundit në strukturën e KF Shkëndija nuk janë të rastësishme. Përtej emërimeve të reja në pozita drejtuese, ato pasqyrojnë një filozofi të qartë të klubit për të përgatitur kuadro nga brenda dhe për t’u besuar atyre përgjegjësi gjithnjë e më të mëdha.

Në qendër të këtij riorganizimi është Valdrin Uka, i cili është emëruar Drejtor Ekzekutiv i Shkëndijës. Uka është pjesë e klubit prej më shumë se shtatë vitesh dhe gjatë kësaj periudhe ka qenë pranë strukturave drejtuese, duke ndjekur nga afër funksionimin dhe zhvillimin e klubit. Vitet e kaluara në menaxhmentin e Shkëndijës e kanë shërbyer si një proces i gjatë përgatitjeje dhe kalitjeje për përgjegjësinë e re.

Në të njëjtën linjë janë edhe ndryshimet në Departamentin Sportiv. Erhan Selimi, deri tani Drejtor i Shkollës së Futbollit, avancon në pozitën e Drejtorit Sportiv, ndërsa Festim Ademi, pas rolit të Team Menaxherit, emërohet Drejtor Teknik i Departamentit Sportiv.

Të tre emërimet kanë një të përbashkët: bëhet fjalë për njerëz që tashmë njohin nga afër klubin, strukturën dhe mënyrën e funksionimit të tij. Kjo tregon se Shkëndija prej kohësh ka punuar në krijimin dhe përgatitjen e kuadrove të veta për pozita udhëheqëse.

Me vizionin dhe mbështetjen e drejtuesve dhe sponsorit të klubit, ndryshimet janë pjesë e një plani për një organizim më të balancuar dhe më profesional, duke ndjekur modelin e klubeve moderne ku investimi nuk bëhet vetëm te skuadra, por edhe te njerëzit që e drejtojnë dhe e zhvillojnë organizatën.

Në këtë drejtim, Shkëndija po tregon se kuadrot nuk kërkohen vetëm jashtë klubit, por ndërtohen, zhvillohen dhe përgatiten edhe brenda tij.

Lajme

Ardian Cuculi e mbyll kapitullin si drejtor sportiv i Shkëndijës

Pas tre viteve në pozitën e Drejtorit Sportiv, Ardian Cuculi përfundon angazhimin e tij te Shkëndija, njofton klubi kuqezi.

Pas përfundimit të angazhimit të Ardian Cuculit në pozitën e Drejtorit Sportiv, mbyllet një tjetër kapitull në rrugëtimin e tij të gjatë me klubin kuqezi.

Ish-kapiteni dhe një prej emrave që ka dhënë kontribut të madh për Shkëndijën në periudha të ndryshme, Cuculi përfundoi karrierën e tij si futbollist pikërisht me ngjyrat kuqezi, për të vazhduar më pas për tre vite në pozitën e Drejtorit Sportiv, duke qenë pjesë e sukseseve historike.

Klubi tetovar e falënderon Ardian Cuculin për punën, përkushtimin dhe kontributin e dhënë gjatë gjithë viteve në Shkëndijë, duke i uruar shëndet, suksese dhe çdo të mirë në të ardhmen.