Lajme

Sot hyn në fuqi, Rregullore e re për miratimin e automjeteve në Maqedoni

Sot hyn në fuqi një Rregullore e re, me të cilën futen risi dhe standarde evropiane për miratimin e tipit të automjeteve, miratimin individual të automjeteve, identifikimin, vlerësimin e gjendjes teknike dhe lëshimin e vërtetimeve për përmbushjen e kërkesave teknike për automjetet.

Ndryshimi kryesor është se, 17 vjet pas miratimit të Ligjit për Automjetet, ai më në fund do të fillojë të zbatohet në përputhje me standardet evropiane, informoi Ministria e Energjetikës, Minierave dhe Burimeve Minerale, e cila kohët e fundit mbajti një takim pune me mbi 40 përfaqësues të autorizuar dhe importues të automjeteve, në të cilin prezantoi ndryshimet në procedurat për miratimin e automjeteve, të cilat do të hyjnë në fuqi nga 1 shtatori.

Ndryshimet në procedurat e miratimit të automjeteve janë: miratimi i tipit të automjetit për të gjitha variantet dhe versionet e tij sipas dokumentit WVTA, përveç nëse importuesi kërkon ndryshe, miratimi i vetëm do të kryhet ekskluzivisht për automjetet për të cilat tipi nuk është miratuar në vend dhe nuk ka një miratim tipi të BE-së përmes Byrosë së Metrologjisë, automjetet me një tip të miratuar më parë në BE ose në vend nuk kanë nevojë për një procedurë të veçantë për miratim të vetëm dhe kalojnë direkt në procedurën për identifikimin dhe vlerësimin e gjendjes teknike, importuesit janë të detyruar të lëshojnë vërtetime për përmbushjen e kërkesave teknike për të gjitha automjetet për të cilat ekziston një miratim tipi evropian (WVTA) ose miratim tipi kombëtar, dhe për automjetet e tjera për të cilat nuk ka miratim tipi të automjetit në vend ose nuk ka miratim tipi të BE-së, importuesit nuk janë të detyruar të lëshojnë vërtetime, automjete të tilla do të sigurojnë vërtetime nga institucione të pavarura të pranuara nga Byroja e Metrologjisë.

Sipas llogaritjes, deri më tani janë shpenzuar 1,3 milion euro në vit për vërtetime TÜV që nuk duhej të kërkoheshin, dhe pjesa më e madhe e mjeteve shkoi te kompanitë e huaja që u paguan – procesi tani do të rregullohet përmes përfaqësuesve të autorizuar, kompanive vendase të RMV-së. Afatet për miratimin e tipit në Byronë e Metrologjisë do të shkurtohen përgjysmë, për një procedurë më të shpejtë dhe më efikase, çmimet e shërbimeve nga Byroja e Metrologjisë do të rregullohen me një rregullore të re, ndërsa vërtetimet për përmbushje të karakteristikave teknike te përfaqësuesit do të kushtojnë 40 deri në 50 euro.

Lajme

Vjedhje prej 5 milionë eurosh në një nënstacion hekurudhor në Shkup

Në nënstacionin për tërheqje elektrike në Draçevë, mes stacioneve hekurudhore Lisiçe dhe Draçevë, është kryer një vjedhje e përmasave të mëdha, gjatë së cilës është shkatërruar një pjesë e konsiderueshme e pajisjeve elektroenergjetike, njoftoi Ndërmarrja për Infrastrukturë Hekurudhore.

Sipas informacioneve, hajdutët kanë rrëzuar me forcë dy transformatorë me peshë mbi 30 tonë, kanë derdhur vajin e transformatorëve dhe kanë vjedhur mbështjelljet e bakrit, si dhe tela bakri, shina dhe pajisje të tjera të domosdoshme për funksionimin e nënstacionit, i cili tani është plotësisht jashtë funksionit.

Nga ndërmarrja vlerësojnë se bëhet fjalë për një sulm serioz ndaj infrastrukturës kritike hekurudhore, me një dëm material të vlerësuar fillimisht rreth 5 milionë euro. Ata kërkojnë një hetim urgjent dhe përgjegjësi penale për autorët dhe për të gjithë ata që kanë qenë të përfshirë në vjedhje dhe në tjetërsimin e mëtejshëm të materialeve të vjedhura.

Lajme

Ministri i Shëndetësisë: Uji në Gostivar ende nuk është i sigurt

Ministri i Shëndetësisë, Sasho Klekovski, gjatë vizitës në Spiatalin Special për Sëmundjet e Mushkërive dhe Tuberkulozin në Leshkë të Tetovës bëri të ditur se situata me helmimin nga uji në Gostivar po përmirësohet dhe se kriza ka hyrë në një fazë qetësimi. Sipas të dhënave të fundit, numri i personave që kërkojnë ndihmë mjekësore është ulur ndjeshëm. Gjatë ditës janë regjistruar 80 raste të reja, që është rreth dy herë më pak krahasuar me ditët paraprake, ndërsa numri i përgjithshëm i të prekurve arrin rreth 4 mijë persona. Ministria e Shëndetësisë dhe institucionet kompetente tashmë kanë nisur një analizë të plotë epidemiologjike, me qëllim përcaktimin e saktë të zhvillimit të situatës dhe ndarjen e rasteve të shkaktuara nga epidemia prej rasteve të zakonshme të gastroenteritit. Megjithëse numri i pacientëve është në rënie, uji nga rrjeti i ujësjellësit të Gostivarit ende nuk lejohet të përdoret as për qëllime teknike, pasi analizat e fundit kanë treguar nivel të pamjaftueshëm të klorit.

SASHO KLEKOVSKI, MINISTËR I SHËNDETËSISË

“Siguria e ujit vlerësohet edhe përmes sasisë së klorit që përmban ai, por ende nuk është arritur niveli i kërkuar. Aktualisht po kryhen analiza të vazhdueshme në disa pika të ndryshme dhe, sapo klorinimi të arrijë nivelin e duhur, do të jepet leja për përdorimin e ujit teknik”.

Duke iu referuar informacioneve se edhe uji në Leshkë është i papërshtatshëm për konsum dhe nuk duhet të pihet, Klekovski tha se kjo situatë nuk është e re dhe nuk është mbajtur e fshehtë. Sipas tij, problemi në këtë zonë vazhdon prej më shumë se një dekade.

SASHO KLEKOVSKI ,MINISTËR I SHËNDETËSISË

“Gjatë kësaj jave pritet të kryhen dy testime për të vërtetuar se uji nga ujësjellësi nuk do të jetë më vetëm për përdorim teknik, por do të jetë i përshtatshëm edhe për pije, si për spitalin ashtu edhe për të gjithë banorët e zonës”.

Ndërkohë, ditët e fundit nga opozitarja LSDM kanë deklaruar se rasti i Gostivarit nuk është një rast i izoluar, por pasqyron dobësi sistemore dhe mungesë efikasiteti të institucioneve. Duke u thirrur në një raport të siguruar nga sinjalizues, kryetari i LSDM-së, Venko Filipçe, deklaroi se uji në Spitalin Special për Sëmundje të Mushkërive dhe Tuberkuloz në Leshkë ka qenë i ndotur. Ai kërkoi kontroll të jashtëzakonshëm urgjent dhe analiza të të gjitha sistemeve të furnizimit me ujë në vend. /SHENJA/

Lajme

2 turke arrestohen pasi i sulmuan policët në “Bit Pazar” të Shkupit

Më 24.07.2026 në orën 23:40, në zonën e Bit Pazarit, nëpunës policorë nga Stacioni Policor Bit Pazar i privuan nga liria B.D. (23) dhe E.D. (54), të dyja nga Turqia me qëndrim të rregulluar në Shkup, për shkak se kanë sulmuar fizikisht nëpunës policorë të cilët kanë kryer veprime zyrtare.

Të dy u ndaluan në stacion policor dhe pas dokumentimit të plotë të rastit kundër tyre do të ngrihet kallëzim përkatës.